IND vs PAK: టీ20 ప్రపంచకప్లో తోపు టీం ఏది.. హెడ్ టూ హెడ్ రికార్డులు ఎలా ఉన్నాయంటే?
India vs Pakistan T20 World Cup Records: రికార్డులు ఏవైనా, భారత్-పాక్ మ్యాచ్ అంటే గ్రౌండ్లో కొత్త చరిత్ర సృష్టించాల్సిందే. గణాంకాల పరంగా భారత్ బలంగా ఉన్నప్పటికీ, ప్రతి మ్యాచ్ ఒక కొత్త సవాలుతో కూడి ఉంటుంది. 2026లో జరగబోయే టీ20 వరల్డ్ కప్లో ఈ దాయాదుల పోరు ఎలా ఉండబోతుందో వేచి చూడాలి!
India vs Pakistan T20 World Cup Records: క్రికెట్ ప్రపంచంలో భారత్, పాకిస్థాన్ జట్ల మధ్య జరిగే పోరు అంటేనే ఒక యుద్ధంలా ఉంటుంది. ముఖ్యంగా టీ20 వరల్డ్ కప్లో ఈ దాయాదుల పోరుకు ఉండే క్రేజ్ అంతా ఇంతా కాదు. మరి ఈ మెగా టోర్నీ చరిత్రలో ఏ జట్టు రికార్డు మెరుగ్గా ఉంది? ఎవరికి ఎన్ని విజయాలు ఉన్నాయి? అనే ఆసక్తికర విషయాలు ఇప్పుడు తెలుసుకుందాం.
టీ20 ప్రపంచకప్ చరిత్రను పరిశీలిస్తే, పాకిస్థాన్పై టీమిండియాదే స్పష్టమైన ఆధిపత్యం కనిపిస్తుంది. 2007లో ప్రారంభమైన మొదటి ఎడిషన్ నుంచి మొన్నటి 2024 వరల్డ్ కప్ వరకు ఈ రెండు జట్లు అనేకసార్లు తలపడ్డాయి.
హెడ్-టు-హెడ్ రికార్డ్ (Head-to-Head): టీ20 వరల్డ్ కప్ వేదికగా భారత్-పాక్ జట్లు ఇప్పటివరకు 8 సార్లు తలపడ్డాయి. ఇందులో భారత జట్టు ఏకంగా 7 మ్యాచ్ల్లో విజయం సాధించి ఘనమైన రికార్డును కలిగి ఉంది. పాకిస్థాన్ కేవలం ఒక్కసారి (2021లో) మాత్రమే విజయం సాధించగలిగింది.
భారత్ విజయాలు: 7
పాకిస్థాన్ విజయాలు: 1
కీలక మ్యాచ్లు :
2007 (గ్రూప్ స్టేజ్): ఈ మ్యాచ్ టై కావడంతో ‘బౌల్ అవుట్’ ద్వారా భారత్ విజయం సాధించింది.
2007 (ఫైనల్): ఉత్కంఠభరితంగా సాగిన ఫైనల్లో పాక్ను ఓడించి భారత్ తొలి టీ20 వరల్డ్ కప్ విజేతగా నిలిచింది.
2022 (మెల్బోర్న్): విరాట్ కోహ్లీ వీరోచిత పోరాటంతో (82 నాటౌట్) భారత్ అసాధ్యమైన విజయాన్ని అందుకుంది.
2024 (న్యూయార్క్): అతి తక్కువ స్కోరును (119) కాపాడుకుంటూ భారత్ 6 పరుగుల తేడాతో పాక్పై చారిత్రాత్మక విజయం సాధించింది.
ట్రోఫీలు ఎవరికి ఎన్ని? ఐసీసీ టీ20 వరల్డ్ కప్ ట్రోఫీల విషయంలోనూ టీమిండియా ముందంజలో ఉంది.
భారత్: 2 టైటిల్స్ (2007, 2024)
పాకిస్థాన్: 1 టైటిల్ (2009)
పాకిస్థాన్ జట్టు 2007, 2022లో రన్నరప్గా నిలవగా, భారత్ 2014లో రన్నరప్గా నిలిచింది. ఓవరాల్గా చూస్తే, వరల్డ్ కప్ వంటి పెద్ద వేదికలపై ఒత్తిడిని జయించడంలో భారత్ ఎప్పుడూ పైచేయి సాధిస్తూనే ఉంది.