IND vs ENG 4th Test: 353 పరుగులకు ఇంగ్లండ్ ఆలౌట్.. నాటౌట్‌గానే రూట్.. మొదలైన భారత తొలి ఇన్నింగ్స్..

Ind Vs Eng 4th Test

IND vs ENG 4th Test: రాంచీ వేదికగా భారత్, ఇంగ్లండ్ జట్ల మధ్య నాలుగో టెస్టు మ్యాచ్ జరుగుతోంది. మ్యాచ్ రెండో రోజు తొలి సెషన్ లో ఇంగ్లండ్ జట్టు 353 పరుగులకు ఆలౌటైంది. ఇంగ్లండ్ తరపున జో రూట్ సెంచరీ చేసిన తర్వాత నాటౌట్‌గా నిలిచాడు. భారత్ తరపున రవీంద్ర జడేజా అత్యధికంగా 4 వికెట్లు పడగొట్టాడు. తొలి రోజు ఆట ముగిసే సమయానికి ఇంగ్లండ్ 7 వికెట్లకు 302 పరుగులు చేసింది. ఐదు మ్యాచ్‌ల సిరీస్‌లో ప్రస్తుతం టీమిండియా 2-1తో ఆధిక్యంలో ఉంది.

కాగా, తొలిరోజు ఆటలో ఇంగ్లండ్ 7 వికెట్ల నష్టానికి 302 పరుగులు చేసింది. జో రూట్ తన 31వ టెస్టు సెంచరీని సాధించిన తర్వాత ఆలీ రాబిన్సన్‌తో కలిసి నాటౌట్‌గా నిలిచాడు. జో రూట్ 106 పరుగులు చేశాడు. భారత్ తరపున అరంగేట్రం ఆడుతున్న ఆకాశ్ దీప్ 3 వికెట్లు పడగొట్టాడు. మహ్మద్ సిరాజ్ 2 వికెట్లు తీయగా, రవీంద్ర జడేజా, రవిచంద్రన్ అశ్విన్ చెరో వికెట్ తీసిన సంగతి తెలిసిందే.

రెండో రోజు కూడా మంచి బ్యాటింగ్‌ కనబర్చిన ఆలీ రాబిన్‌సన్‌, జో రూట్‌లు పరుగుల సేకరణ ప్రారంభించారు. ఇంతలో, ఒలీ రాబిన్సన్ తన తొలి అర్ధ సెంచరీని పూర్తి చేశాడు. కానీ ఈ హాఫ్ సెంచరీ తర్వాత రాబిన్సన్ (59) వికెట్ పడగొట్టడంలో రవీంద్ర జడేజా సఫలమయ్యాడు. షోయబ్ బషీర్ (0) వచ్చినంత త్వరగా వెనుదిరిగాడు.

అయినప్పటికీ జో రూట్ ఒంటరి పోరాటం కొనసాగింది. జట్టు స్కోరు 350ని కూడా దాటేశాడు. చివరగా జేమ్స్ అండర్సన్ (0) ఔటవ్వడంతో ఇంగ్లండ్ జట్టు 353 పరుగులకే కుప్పకూలింది. ఇంగ్లండ్‌ తరపున జో రూట్ 122 పరుగులతో నాటౌట్‌గా నిలిచాడు. టీమిండియా తరపున రవీంద్ర జడేజా 4 వికెట్లు, ఆకాశ్ దీప్ 3 వికెట్లు తీశారు.

ఇరుజట్ల ప్లేయింగ్ 11..

ఇండియా: రోహిత్ శర్మ (కెప్టెన్), యశస్వి జైస్వాల్, శుభ్‌మన్ గిల్, రజత్ పటీదార్, సర్ఫరాజ్ ఖాన్, రవీంద్ర జడేజా, ధ్రువ్ జురెల్ (వికెట్ కీపర్), ఆర్. అశ్విన్, కుల్దీప్ యాదవ్, మహ్మద్ సిరాజ్, ఆకాశ్ దీప్.

ఇంగ్లండ్ – బెన్ స్టోక్స్ (కెప్టెన్), జాక్ క్రాలే, బెన్ డకెట్, ఒల్లీ పోప్, జో రూట్, జానీ బెయిర్‌స్టో, బెన్ ఫోక్స్ (వికెట్ కీపర్), టామ్ హార్ట్లీ, ఆలీ రాబిన్సన్, జేమ్స్ ఆండర్సన్ మరియు షోయబ్ బషీర్.

మరిన్ని క్రీడా వార్తల కోసం ఇక్కడ క్లిక్ చేయండి..