IND vs ENG: రెండో టెస్ట్లో టీమిండియా పిచ్చి పని.. 587 పరుగులు చేసినా తప్పని ఓటమి..? ఫ్రూఫ్ ఇదిగో..
India vs England 2nd Test: ఎడ్జ్బాస్టన్ టెస్ట్ మ్యాచ్లో తొలి రెండు రోజుల్లో భారత జట్టు పూర్తి ఆధిపత్యం చూపించింది. దీంతో మొదటి ఇన్నింగ్స్లో 587 పరుగుల భారీ స్కోరును సాధించింది. అనంతరం బ్యాటింగ్ మొదలు పెట్టిన ఇంగ్లాండ్ జట్టుకు కూడా 3 బిగ్ షాక్లు ఇచ్చింది. ఇలాంటి స్టేజ్లో ఉన్నా.. మ్యాచ్ గెలిచేది మాత్రం ఇంగ్లండ్ జట్టేనంట.
India vs England 2nd Test: లీడ్స్లో జరిగిన తొలి టెస్ట్ మ్యాచ్లో ఓడిపోయిన తర్వాత, రెండో టెస్ట్ మ్యాచ్లో టీమిండియా బలమైన పునరాగమనం చేసింది. ఎడ్జ్బాస్టన్లో జరుగుతోన్న టెస్ట్ సిరీస్లోని రెండో మ్యాచ్లో తొలి రెండు రోజుల్లో ఆతిథ్య ఇంగ్లాండ్పై భారత జట్టు ఆధిపత్యం చూపించింది. కెప్టెన్ శుభ్మాన్ గిల్ చారిత్రాత్మక డబుల్ సెంచరీ సహాయంతో భారత జట్టు తొలి ఇన్నింగ్స్లో 587 పరుగుల భారీ స్కోరు సాధించింది. దీంతో ప్రస్తుత భారత జట్టు పటిష్ట స్థితిలో నిలిచింది. కానీ, ఇంత భారీ స్కోరు సాధించిన తర్వాత కూడా, ఈ మ్యాచ్లో గెలిచేది ఇంగ్లాండ్ టీం అని తెలిస్తే కచ్చితంగా షాక్ అవ్వాల్సిందే. అందుకు కారణం ఈ గణాంకాలే. అవేంటో ఓసారి చూద్దాం..
భారత్ వర్సెస్ ఇంగ్లాండ్ మధ్య రెండవ టెస్ట్ మ్యాచ్ జులై 2న ఎడ్జ్బాస్టన్లో ప్రారంభమైంది. మ్యాచ్ మొదటి రోజు, టీం ఇండియా 310 పరుగులు చేసింది. కెప్టెన్ గిల్ సెంచరీ చేశాడు. రెండవ రోజు గిల్ టెస్ట్ క్రికెట్లో తన మొదటి డబుల్ సెంచరీని సాధించాడు. అతని 269 పరుగుల రికార్డు ఇన్నింగ్స్ ఆధారంగా, టీం ఇండియా 587 పరుగులు చేసింది.
ఇంగ్లాండ్పై వారి సొంత మైదానంలో 600 పరుగులు చేయడం అంత సులభం కాదు. అలాగే, టెస్ట్ క్రికెట్లో, ఒక జట్టు మొదటి ఇన్నింగ్స్లో ఇంత పెద్ద స్కోరు సాధించినప్పుడల్లా, చాలా సందర్భాలలో భారీ స్కోర్ సాధించిన జట్టే గెలుస్తుంది లేదా మ్యాచ్ డ్రా అవుతుంది. ఇటువంటి పరిస్థితిలో, టీం ఇండియా 587 పరుగులు గిల్ సేనకు కొంత ఉపశమనం కలిగించవచ్చు. కానీ, గత 3 సంవత్సరాల గణాంకాలు చూస్తే మాత్రం గిల్ సేనకు నిద్ర పట్టదనడంలో ఎలాంటి సందేహం లేదు.
2022 తర్వాత ఇంగ్లాండ్పై ఒక జట్టు ఇన్నింగ్స్లో 550 కంటే ఎక్కువ పరుగులు చేయడం ఇది నాలుగోసారి మాత్రమే. కానీ, మునుపటి మూడు సందర్భాలలోనూ అంటే ప్రత్యర్థి జట్టు 550 కంటే ఎక్కువ పరుగులు చేసినప్పటికీ, చివరికి విజయం మాత్రం ఇంగ్లాండ్ జట్టుదే కావడం గమనార్హం. 2022లో రావల్పిండిలో పాకిస్తాన్ 579 పరుగులు చేయగా, అదే సంవత్సరం నాటింగ్హామ్లో న్యూజిలాండ్ 553 పరుగులు చేసింది. ఆ తర్వాత 2024లో ముల్తాన్లో పాకిస్తాన్ 556 పరుగులు చేసింది. ఈ స్కోర్లు ఉన్నప్పటికీ, ఇంగ్లాండ్ ఈ మూడు మ్యాచ్లను గెలిచి సత్తా చాటింది.
587 పరుగులు చేసిన తర్వాత భారత జట్టు ఊపిరి పీల్చుకుంది. కానీ, ఈ గణాంకాలను చూసిన తర్వాత, కెప్టెన్ శుభ్మన్ గిల్, కోచ్ గౌతమ్ గంభీర్ ఖచ్చితంగా టెన్షన్ పడాల్సిందే. అయితే, భారత బౌలర్లు గేమ్ మొదలుపెట్టిన విధానం, ఈ చరిత్రను మారుస్తారనే ఆశను రేకెత్తించింది. రెండవ రోజు ఆట ముగిసే సమయానికి, ఇంగ్లాండ్ కేవలం 77 పరుగులకే 3 వికెట్లు కోల్పోయింది. ఇన్నింగ్స్ మూడో ఓవర్లో వరుసగా 2 బంతుల్లో బెన్ డకెట్, ఓలీ పోప్ వికెట్లను ఆకాష్ దీప్ పడగొట్టాడు. ఆ తర్వాత మొహమ్మద్ సిరాజ్ జాక్ క్రౌలీని పెవిలియన్కు పంపిన సంగతి తెలిసిందే.