ICC ODI Rankings : టాప్-5లో ముగ్గురు భారత బ్యాటర్లు.. నంబర్-1 సింహాసనానికి అత్యంత చేరవలో ప్రిన్స్
ICC ODI Rankings : ఐసీసీ తాజా వన్డే ర్యాంకింగ్స్లో శుభ్మన్ గిల్ ప్రపంచ నంబర్-1 బ్యాటర్గా అవతరించేందుకు కేవలం 11 పాయింట్ల దూరంలో నిలిచాడు. టాప్-5లో గిల్, విరాట్ కోహ్లీ, రోహిత్ శర్మ చోటు దక్కించుకోగా, కుల్దీప్ యాదవ్ బౌలింగ్ టాప్-10లో నిలిచాడు.
ICC ODI Rankings : ఐసీసీ తాజాగా వన్డే ఫార్మాట్కు సంబంధించిన ఆటగాళ్ల సరికొత్త ర్యాంకింగ్స్ను విడుదల చేసింది. ప్రపంచవ్యాప్తంగా జరిగే వన్డే సిరీస్లలో ఆటగాళ్లు కనబరిచే ప్రదర్శన ఆధారంగా ఐసీసీ ఈ స్థానాలను కేటాయిస్తుంది. తాజాగా భారత్, ఇంగ్లాండ్ మధ్య జరిగిన మొదటి వన్డే మ్యాచ్ ముగిసిన తర్వాత విడుదలైన ఈ అప్డేట్లో భారత క్రికెట్ అభిమానులకు అదిరిపోయే శుభవార్త అందింది. టీమిండియా యువ కెప్టెన్, ఓపెనర్ శుభ్మన్ గిల్ వన్డే క్రికెట్లో ప్రపంచ నంబర్-1 బ్యాటర్గా అవతరించేందుకు అత్యంత సమీపంలోకి దూసుకొచ్చాడు. మొదటి వన్డేలో గిల్ ఆడిన 80 పరుగుల అద్భుతమైన ఇన్నింగ్స్ అతడి రేటింగ్ పాయింట్లను భారీగా పెంచేసింది.
తాజా ఐసీసీ వన్డే బ్యాటింగ్ ర్యాంకింగ్స్ ప్రకారం.. ప్రస్తుతం న్యూజిలాండ్ స్టార్ బ్యాటర్ డెరిల్ మిచెల్ 814 రేటింగ్ పాయింట్లతో ప్రపంచ నంబర్-1 స్థానంలో కొనసాగుతున్నాడు. కాగా, భారత కెప్టెన్ శుభ్మన్ గిల్ 803 రేటింగ్ పాయింట్లతో రెండో స్థానంలో స్థిరపడ్డాడు. ప్రస్తుతం మొదటి స్థానంలో ఉన్న మిచెల్కు, గిల్కు మధ్య కేవలం 11 పాయింట్ల స్వల్ప తేడా మాత్రమే ఉంది. దీంతో ఇంగ్లాండ్తో జరగబోయే రెండో వన్డే మ్యాచ్లో గిల్ కనుక మరోసారి పవర్ఫుల్ ప్రదర్శన ఇస్తే, మిచెల్ను వెనక్కి నెట్టి ప్రపంచ నంబర్-1 వన్డే బ్యాటర్ కిరీటాన్ని సొంతం చేసుకోవడం ఖాయంగా కనిపిస్తోంది.
ఈ తాజా ఐసీసీ బ్యాటింగ్ ర్యాంకింగ్స్లో భారత సీనియర్ ఆటగాళ్లు కూడా తమ ఆధిపత్యాన్ని చాటుకున్నారు. టీమిండియా రన్ మెషీన్ విరాట్ కోహ్లీ మూడో స్థానంలో నిలవగా, హిట్ మ్యాన్ రోహిత్ శర్మ నాలుగో స్థానాన్ని కైవసం చేసుకున్నాడు. అంటే వన్డేల్లో ప్రపంచ అత్యుత్తమ టాప్-5 బ్యాటర్లలో ముగ్గురు భారతీయులే ఉండటం విశేషం. ఇక ఆఫ్ఘనిస్తాన్ స్టార్ బ్యాటర్ ఇబ్రహీం జద్రాన్ ఐదో స్థానంలో నిలిచాడు. వెస్టిండీస్ కెప్టెన్ షాయ్ హోప్ ఆరో స్థానంలో నిలవగా, ఒకప్పుడు వన్డేల్లో రారాజుగా వెలిగిన పాకిస్థాన్ స్టార్ బాబర్ ఆజం ఏడో స్థానానికి పరిమితమయ్యాడు. ఐర్లాండ్ ఆటగాడు హ్యారీ టెక్టర్ ఎనిమిదో స్థానంలో, శ్రీలంక ఆటగాళ్లు చరిత్ అసలంక తొమ్మిదో స్థానంలో, కుసాల్ మెండిస్ పదో స్థానంలో నిలిచారు.
మరోవైపు ఐసీసీ విడుదల చేసిన వన్డే బౌలింగ్ ర్యాంకింగ్స్లో ఆఫ్ఘనిస్తాన్ లెగ్ స్పిన్నర్ రషీద్ ఖాన్ నంబర్-1 బౌలర్గా తన స్థానాన్ని మరింత పటిష్టం చేసుకున్నాడు. పాకిస్థాన్ మిస్టరీ స్పిన్నర్ అబ్రార్ అహ్మద్ రెండో స్థానంలో నిలవగా, సౌతాఫ్రికా స్పిన్నర్ కేశవ్ మహారాజ్ మూడో స్థానాన్ని దక్కించుకున్నాడు. ఇంగ్లండ్ ఎక్స్ప్రెస్ పేసర్ జోఫ్రా ఆర్చర్ నాలుగో స్థానంలో, శ్రీలంక స్పిన్నర్ మహీష్ తీక్షణ ఐదో స్థానంలో నిలిచారు. ఇంగ్లండ్ స్పిన్నర్ ఆదిల్ రషీద్ ఆరో స్థానంలో, న్యూజిలాండ్ ఆల్రౌండర్ మిచెల్ సాంట్నర్ ఏడో స్థానంలో నిలిచారు. భారత్ తరఫున చైనామన్ స్పిన్నర్ కుల్దీప్ యాదవ్ ఎనిమిదో స్థానంలో నిలిచి టాప్-10లో చోటు దక్కించుకున్న ఏకైక భారత బౌలర్గా నిలిచాడు. పాకిస్థాన్ పేసర్ షాహీన్ అఫ్రిది తొమ్మిదో స్థానంలో, బంగ్లాదేశ్ ఆల్రౌండర్ మెహదీ హసన్ మిరాజ్ పదో స్థానంలో కొనసాగుతున్నారు.
మరిన్ని క్రికెట్ వార్తల కోసం ఇక్కడ క్లిక్ చేయండి