Gaya: గయలోనే పిండప్రదానం ఎందుకు చేస్తారు? గయాసురుడి కథ తెలిస్తే ఈ క్షేత్రం ప్రత్యేకత అర్థమవుతుంది!
Gayasur Demon Story Telugu: పితృపక్షంలో గయలో పిండప్రదానానికి ఎందుకు అంతటి ప్రాధాన్యత ఉంది? దీని వెనుక గయాసురుడి అద్భుతమైన పురాణ కథ ఉంది. శ్రీమహావిష్ణువు గయాసురుడి ఛాతిపై పాదం ఎందుకు మోపారు? గయ క్షేత్రం ఎలా ఏర్పడింది? పూర్తి వివరాలు ఇప్పుడు తెలుసుకుందాం.
Gayasur Demon Story Telugu: పితృపక్షం వచ్చిందంటే పిండప్రదానం, శ్రాద్ధకర్మల కోసం ముందుగా గుర్తొచ్చే పవిత్ర క్షేత్రం బిహార్‌లోని ‘గయ’. ఇక్కడ పిండప్రదానం చేస్తే పితృదేవతలకు సద్గతి లభిస్తుందని, వారి ఆశీస్సులు కుటుంబంపై ఉంటాయని హిందూ ధార్మిక విశ్వాసం. అయితే గయలో పిండప్రదానానికి ఇంతటి ప్రాధాన్యత ఎలా వచ్చింది? ఈ క్షేత్రం పేరు వెనుక ఉన్న పురాణ కథ ఏమిటో తెలుసా? పురాణ కథనాల ప్రకారం, గయ క్షేత్రం వెనుక ‘గయాసురుడు’ అనే అసురుడి కథ ఉంది. ఆశ్చర్యకరమైన విషయం ఏమిటంటే.. అసుర వంశంలో జన్మించినప్పటికీ గయాసురుడు క్రూరుడు కాదు. అతను ధర్మపరుడు, దయగలవాడు, ముఖ్యంగా శ్రీమహావిష్ణువుకు గొప్ప భక్తుడు అని పురాణాలు చెబుతున్నాయి.
ఎవరు ఈ గయాసురుడు?
పురాణాల ప్రకారం గయాసురుడు ఎంతో శక్తివంతమైన అసురుడు. అయితే ఇతర రాక్షసుల మాదిరిగా అతను అధర్మ మార్గాన్ని అనుసరించలేదు. భగవంతుడిని ప్రసన్నం చేసుకోవడానికి కఠోర తపస్సు చేశాడు. అతని ఘోరమైన తపస్సుకు ప్రసన్నమైన శ్రీమహావిష్ణువు ప్రత్యక్షమై వరం ప్రసాదించాడని కథనం. ఆ వర ప్రభావంతో గయాసురుడిని దర్శించినంత మాత్రాన పాపాలు తొలగిపోయి మోక్షం లభించే స్థితి ఏర్పడిందని విశ్వాసం.
గయాసురుడి వరంతో దేవతలకు ఎందుకు ఆందోళన?
గయాసురుడి గురించి తెలిసిన ప్రజలు అతని దర్శనం కోసం పెద్ద సంఖ్యలో అక్కడికి చేరుకోవడం ప్రారంభించారు. పాపాలు చేసినవారు కూడా గయాసురుడిని దర్శించగానే పాప విముక్తి పొంది మోక్షాన్ని పొందుతున్నారని పురాణ కథనం. దీంతో దేవతల్లో ఆందోళన మొదలైంది. మనిషి చేసిన కర్మలకు అనుగుణంగా ఫలితాలను అనుభవించాలి. కానీ గయాసురుడి దర్శనం ద్వారా ప్రతి ఒక్కరికీ సులభంగా మోక్షం లభిస్తే కర్మఫల సిద్ధాంతం, జనన మరణ చక్రం వంటి సృష్టి నియమాలు దెబ్బతింటాయని దేవతలు భావించారని పురాణాలు చెబుతున్నాయి. ఈ సమస్యకు పరిష్కారం కోసం దేవతలు బ్రహ్మదేవుడిని ఆశ్రయించారు.
బ్రహ్మదేవుడు గయాసురుడిని ఏం కోరాడు?
పురాణ కథనం ప్రకారం, బ్రహ్మదేవుడు ఒక మహాయజ్ఞం నిర్వహించాలనుకుని గయాసురుడి శరీరాన్ని యజ్ఞవేదికగా ఇవ్వాలని కోరాడు. గయాసురుడు ధర్మపరుడు కావడంతో దేవతల కోరికను తిరస్కరించలేదు. తన శరీరాన్ని యజ్ఞం కోసం సమర్పించేందుకు అంగీకరించాడు. అనంతరం భూమిపై పడుకుని తన శరీరంపై యజ్ఞం నిర్వహించేందుకు అవకాశం ఇచ్చాడని చెబుతారు. అయితే యజ్ఞం జరుగుతున్న సమయంలో గయాసురుడి శరీరం కదలడం ప్రారంభించిందట. అతడిని స్థిరంగా ఉంచడం దేవతలకు సాధ్యం కాలేదు. అప్పుడు స్వయంగా శ్రీమహావిష్ణువు అక్కడికి వచ్చారని పురాణ కథనం.
గయాసురుడి ఛాతిపై విష్ణువు పాదం ఎందుకు పెట్టాడు?
గయాసురుడిని స్థిరంగా ఉంచేందుకు శ్రీమహావిష్ణువు అతని ఛాతిపై తన పాదాన్ని ఉంచాడని విశ్వాసం. విష్ణుమూర్తి పాదస్పర్శతో గయాసురుడు కదలకుండా స్థిరంగా మారాడట. భగవంతుడి పాదం తన ఛాతిపై ఉన్నప్పటికీ గయాసురుడు ఎలాంటి వ్యతిరేకత చూపలేదు. పైగా, శ్రీమహావిష్ణువు పాదాలను భక్తితో స్వీకరించాడని పురాణ కథనం. గయాసురుడి భక్తి, త్యాగం, సమర్పణకు ప్రసన్నమైన శ్రీమహావిష్ణువు అతనికి ఒక ప్రత్యేకమైన వరాన్ని ప్రసాదించాడని చెబుతారు.
గయ పేరుతో ఈ క్షేత్రం ఎలా ఏర్పడింది?
పురాణ విశ్వాసం ప్రకారం, గయాసురుడి శరీరం ఉన్న ప్రాంతం ఇకపై అతని పేరుతో ‘గయ’గా ప్రసిద్ధి చెందుతుందని శ్రీమహావిష్ణువు వరమిచ్చాడు. అంతేకాదు.. ఈ పవిత్ర ప్రదేశంలో పితృదేవతలకు పిండప్రదానం, శ్రాద్ధకర్మలు నిర్వహిస్తే వారికి సద్గతి లభిస్తుందని విశ్వాసం ఏర్పడింది. అందుకే పితృకర్మలకు గయ క్షేత్రానికి ఎంతో ప్రత్యేకమైన స్థానం లభించింది. ఇక్కడి విష్ణుపద ఆలయం కూడా ఈ పురాణ కథతో ముడిపడి ఉంది. శ్రీమహావిష్ణువు పాదముద్ర ఇక్కడ ఉందని భక్తులు విశ్వసిస్తారు. ఈ పాదముద్రను దర్శించడం, పితృకర్మలు నిర్వహించడం ఎంతో పుణ్యప్రదమని హిందూ సంప్రదాయంలో నమ్మకం.
అందుకే పితృపక్ష సమయంలో దేశంలోని వివిధ ప్రాంతాల నుంచి భక్తులు గయకు చేరుకుని తమ పూర్వీకుల కోసం పిండప్రదానం, తర్పణం, శ్రాద్ధకర్మలు నిర్వహిస్తారు. గయాసురుడి త్యాగం, విష్ణుమూర్తి అనుగ్రహంతో ఈ క్షేత్రం పితృకర్మలకు పవిత్రమైన స్థలంగా మారిందనేది పురాణ విశ్వాసం.
(Disclaimer: గయాసురుడి కథ, విష్ణుపాదం, పిండప్రదానం ద్వారా పితృలకు సద్గతి వంటి అంశాలు పురాణాలు, హిందూ ధార్మిక విశ్వాసాలకు సంబంధించినవి. వీటిని విశ్వసించడం వ్యక్తిగతం.)
మరిన్ని ఆధ్యాత్మిక వార్తల కోసం ఇక్కడ క్లిక్ చేయండి.