భారీ వర్షాల్లోనూ తగ్గని భక్తి.. జూమ్ వేలంలో రూ.25 లక్షలు పలికిన గణనాథుడి లడ్డూ!
భారీ వర్షాలున్నా, గణేష్ లడ్డూ వేలాల ఉత్సాహం తగ్గలేదు. మచిలీపట్నంలో 630 కిలోల లడ్డూ జూమ్ వేలంలో రూ.25 లక్షలకు అమ్ముడుపోయింది. హైదరాబాద్లోనూ కొండపూర్ (రూ.21.11 లక్షలు), ప్రగతి నగర్, రాజేంద్ర నగర్ లడ్డూలు భారీ ధరలు పలికాయి. ఈసారి బాలాపూర్ లడ్డూ ఎంత పలకనుందో అందరి దృష్టి నెలకొంది.
ఆంధ్రప్రదేశ్లో కురిసిన భారీ వర్షాలు పలు ప్రాంతాల్లో జనజీవనాన్ని ప్రభావితం చేసినప్పటికీ.. గణేష్ లడ్డూ వేలాలకు మాత్రం భక్తుల ఉత్సాహం తగ్గలేదు. మచిలీపట్నం సముద్ర తీరంలో ప్రతిష్ఠించిన 63 అడుగుల మహా గణపతి కోసం తయారు చేసిన 630 కిలోల భారీ లడ్డూను జూమ్ కాల్ ద్వారా నిర్వహించిన వేలంలో రూ.25 లక్షలకు గుమ్మడి భవానీ శంకర్ దక్కించుకున్నారు. ఆయన కుటుంబ సభ్యులు లడ్డూను స్వీకరించారు. ఈ వేలంలో ఆన్లైన్, ఆఫ్లైన్ విధానాల్లో 600 మందికి పైగా భక్తులు పాల్గొన్నారు.
మరోవైపు హైదరాబాద్లోనూ గణేష్ లడ్డూ వేలాలు భారీ ధరలు పలికాయి. కొండాపూర్లోని మై హోమ్ మంగళ గేటెడ్ కమ్యూనిటీలో లడ్డూ రూ.21.11 లక్షలకు అమ్ముడైంది. ప్రగతినగర్లోని రఘుపతి కౌంటీ లడ్డూను రూ.13.66 లక్షలకు దక్కించుకోగా.. రాజేంద్రనగర్లోని లాన్సమ్ ఎటానియా రూ.13.56 లక్షలకు విన్నింగ్ బిడ్ నమోదు చేసింది. ఇక గణేష్ చతుర్థి ఉత్సవాల చివరి రోజున జరిగే బాలాపూర్ లడ్డూ వేలంపై అందరి దృష్టి నెలకొంది. 32 ఏళ్లుగా ప్రత్యేక గుర్తింపు పొందిన బాలాపూర్ లడ్డూ ఈసారి ఎంత ధర పలుకుతుందనే ఆసక్తి నెలకొంది.
వీడియో ఇక్కడ చూడండి..
మరిన్ని ఆధ్యాత్మిక వార్తల కోసం ఇక్కడ క్లిక్ చేయండి..