రోటా వైరస్ కి చెక్.. పిల్లలూ ! బీ కేర్ ఫుల్ !

ఈ వర్షాకాల సీజన్ లో ముఖ్యంగా పిల్లలకు ప్రాణాంతకంగా మారుతున్న రోటా వైరస్ కి చెక్ పెట్టేందుకు తెలంగాణ ప్రభుత్వం అన్ని చర్యలూ తీసుకుంది. డయేరియాకు కారణమయ్యే ఈ వైరస్ వల్ల తీవ్రమైన జ్వరం వస్తుందని, వ్యాధి ప్రబలితే ఒక్కోసారి మరణం కూడా సంభవిస్తుందని డాక్టర్లు చెబుతున్నారు. 40 శాతం డయేరియా కేసులతో పిల్లల ఆసుపత్రులు, క్లినిక్ లు నిండిపోతున్నాయి. దీంతో ప్రభుత్వం ఆయా ఆసుపత్రుల్లో ప్రత్యేక వార్డులను ఏర్పాటు చేసింది. హెల్త్ కేర్ సెంటర్లలో ఈ వైరస్ కి చెక్ పెట్టే వాక్సీన్ ని అందుబాటులో ఉంచినట్టు ఆరోగ్య శాఖ అధికారులు తెలిపారు. ప్రధానంగా ఆరు వారాలు, 10 వారాలు, లేదా 14 వారాల వయసు బాలలకు తప్పనిసరిగా రోటా వైరస్ వాక్సీన్ ఇవ్వాల్సి ఉంటుందని, వారు ఏమాత్రం డయేరియాతో బాధ పడుతున్నట్టు తెలిసినా.. నిర్లక్ష్యం చేయకుండా ఆసుపత్రిలో చేర్పించాలని వారు సూచిస్తున్నారు. ఓరల్ గా 2.4 మిల్లీ లీటర్ల వాక్సీన్ ని, పోలియో వాక్సీన్ తో కలిపి ఇఛ్చిన పక్షంలో వ్యాధి చాలావరకు తగ్గుతుందని అంటున్నారు. అసలు రోటా వైరస్ అంటే ? నీళ్ల విరేచనాలు, వాంతులు, జ్వరం, కడుపు నొప్పి వంటి లక్షణాలే ఈ వైరస్ కారణంగా సోకుతాయట. ముఖ్యంగా చలికాలం, వర్షాకాలాల్లో ఇది ప్రబలుతుందని, పరిసరాలను పరిశుభ్రంగా ఉంచుకోవడంతో బాటు పిల్లల చేతులను కూడా ఎప్పటికప్పుడు శుభ్రంగా ఉంచాలని వైద్య నిపుణులు సలహా ఇస్తున్నారు. వారికి ఇచ్ఛే ఆహారం లేదా పాల వంటి పదార్థాలను కూడా సదా వేడి చేసి ఇవ్వాలని, సింక్స్, కిచెన్ కౌంటర్లలో తడిలేకుండా చూడాలని కోరుతున్నారు. ముందు జాగ్రత్త చర్యగా డాక్టర్ల సలహాపై పిల్లలకు టీకా మందును వెంటనే ఇఛ్చిన పక్షంలో ఈ వైరస్ సోకదని పేర్కొంటున్నారు.