Corona Pandemic: ఆ ఐదు రాష్ట్రాల ఎన్నికలూ కరోనా భూతానికి మరింత బలాన్ని ఇచ్చాయా? గణాంకాలు ఏం చెబుతున్నాయి?

Corona Pandemic

Corona Pandemic: చివరికి, భయపడినంతా జరిగింది. ప్రభుత్వం, ఎన్నికల సంఘం పశ్చిమ బెంగాల్, తమిళనాడు, కేరళ, అస్సాం, పుదుచ్చేరి ప్రజల ప్రాణాలను పణంగా పెట్టాయి. దాదాపు ఒకటిన్నర నెలలుగా కొనసాగుతున్న ఈ ఎన్నికల కార్యక్రమం  వలన వ్యాపించిన  కరోనా వైరస్ ప్రజలకు ప్రాణంతకంగా మారినట్టు గణాంకాలు చెబుతున్నాయి. ఏప్రిల్ 1 నుండి ఏప్రిల్ 14 వరకు ఈ ఐదు రాష్ట్రాల డేటాను పరిశీలిస్తే.. పశ్చిమ బెంగాల్‌లో కరోనా కేసులు 420%, అస్సాంలో 532%, తమిళనాడులో 159%, కేరళలో 103%, పుదుచ్చేరిలో 165% పెరిగాయని తెలుస్తోంది. సగటున, ఈ ఐదు రాష్ట్రాల్లో మరణాలు కూడా 45% పెరిగాయి. ఇది ప్రారంభం మాత్రమే. రాబోయే కాలంలో పరిస్థితులు మరింత దిగజారిపోయే అవకాశం ఉంది. ముఖ్యంగా ఇంకా బెంగాల్ లో ఎన్నికలు కొన్ని దశలు జరగాల్సి ఉంది. ఈ ఎన్నికల ర్యాలీలు, జనసమూహ సమావేశాలు నిర్వహించకుండా ఉన్నట్టయితే, చాలా మంది ప్రాణాలు నిలిచేవి అనిపించడం సహజం.

1.అస్సాం: అస్సాంలో కరోనా రోగులు 532% పెరిగారు. అస్సాంలో కరోనా గణాంకాలు చాలా ఆశ్చర్యకరంగా ఉన్నాయి. అస్సాంలో మార్చి 16 నుంచి 31 మధ్య 537 మందికి మాత్రమే కరోనా సోకినట్లు గుర్తించారు. ఆ సమయంలో పరిస్థితి చాలా మెరుగ్గా ఉందని చెప్పొచ్చు. అదే ఏప్రిల్ 1 నుండి 14 మధ్య చూస్తే.. ఈ 14 రోజుల్లో, రికార్డు స్థాయిలో 3398 మందిని కరోనా దెబ్బతీసింది, అంటే ఈ సమయంలో కరోనా 532% వేగంగా విస్తరించింది. మరణ కేసుల్లో కూడా ఇదే పరిస్థితి కనిపించింది. మార్చిలో 6 మంది మాత్రమే కరోనా కారణంగా ప్రాణాలు కోల్పోగా, ఈ 14 రోజులలో 15 మంది మరణించారు.

2. పశ్చిమ బెంగాల్: మార్చిలో ఇక్కడ కేవలం 8 వేల మంది రోగులు మాత్రమే ఉన్నారు, ఇప్పుడది 41 వేలకు పైగా పెరిగింది. ఈసారి ఎన్నికల పరంగా పశ్చిమ బెంగాల్ ఎన్నికలు హోరాహోరీగా సాగుతున్నాయి. అక్కడ ప్రధాని నుండి మమతా బెనర్జీ వరకు అలాగే, దేశంలోని చాలా మంది పెద్ద నాయకులు ఎన్నికల ర్యాలీలు, రోడ్ షోలు, సమావేశాలు నిర్వహిస్తున్నారు. ఈ ర్యాలీలలో, చాలా మంది కాదు..కాదు..లక్షలాది మంది జనాన్ని సమీకరిస్తున్నారు. వీరిలో 80% మంది మాస్క్ లు లేకుండానే ఉంటున్నారు. వేదికపై కూడా, మాస్క్ లు ధరించిన ఒకటి లేదా ఇద్దరు వ్యక్తులు మాత్రమే అక్కడి ఎన్నికల సభల్లో చూడగలం.

బెంగాల్‌లో గత 14 రోజుల్లో కరోనా వేగం 420% వృద్ధిని నమోదు చేసింది. మార్చి 16 నుండి 31 వరకు ఇక్కడ 8,062 మంది రోగులు మాత్రమే ఉన్నారు. ఈ సంఖ్య ఏప్రిల్ 1-14 మధ్య ఈసారి 41 వేల 927 కు పెరిగింది. ఈ సమయంలో చాలా మరణాలు సంభవించాయి. మార్చిలో కేవలం 32 మంది మాత్రమే ప్రాణాలు కోల్పోగా, ఈ 14 రోజుల్లో ఇప్పటివరకు 127 మంది మరణించారు.

3. కేరళ: మార్చిలో 30 వేల మంది రోగులు కేరళలో రికార్డు అయితే, ఇప్పుడక్కడ 61 వేలకు పైగా రోగులు ఉన్నారు. ఇప్పటికే ఇక్కడ, కరోనా ప్రజల జీవితాన్ని విచ్ఛిన్నం చేసింది. మొత్తం దేశంలో కరోనా సోకిన వారి సంఖ్య తగ్గుతున్నప్పుడు, ఇక్కడ అది వేగంగా విస్తరిస్తూ వచ్చింది.

కేరళలో ఏప్రిల్ 14 రోజుల్లో కొత్త రోగుల సంఖ్య 103% పెరిగింది. మార్చి 16-31 మధ్య, ఇక్కడ మొత్తం 30 వేల 390 మంది సోకినట్లు గుర్తించారు, ఈసారి ఏప్రిల్‌లో ఇది 61 వేల 793 కు పెరిగింది. అదేవిధంగా మరణ గణాంకాలు కూడా ఉన్నాయి. మార్చిలో 199 మంది ప్రాణాలు కోల్పోగా, ఏప్రిల్ 14 రోజుల్లో ఇప్పటివరకు 204 మరణాలు సంభవించాయి.

4. తమిళనాడు: కరోనా రోగులు తమిళనాడులో 159% వేగంతో పెరగడం ప్రారంభించారు. మార్చిలో రాష్ట్రంలో కరోనా కేసులు వేగంగా పెరుగాయి. కానీ ఇప్పుడు అంతకంటే వేగంగా విస్తరిస్తోంది కరోనా. మార్చి 16 నుండి 31 మధ్య కాలంలో గణాంకాలను పరిశీలిస్తే, ఆ కాలంలో మొత్తం 25 వేల 244 మందికి వ్యాధి సోకినట్లు గుర్తించారు, ఇది ఏప్రిల్ 1 నుండి 14 మధ్య ఒక్కసారిగా 65 వేల 458 కు పెరిగింది. సంక్రమణ రేటు 159% గా నమోదు అయింది. అదేవిధంగా మరణ గణాంకాలు కూడా ఉన్నాయి. మార్చిలో 163 ​​మంది మరణించారు. ఇప్పుడు ఈ 14 రోజుల్లో 232 మంది ప్రాణాలు కోల్పోయారు.

5. పుదుచ్చేరి: ఏప్రిల్ 14 రోజుల్లో 3 వేలకు పైగా ప్రజలు వ్యాధి బారిన పడ్డారు
కరోనా మొదటి వేవ్ అప్పడు కూడా ఇక్కడ కరోనా విస్తరణ ఎక్కువగా లేదు. గత నవంబర్ నుండి ఈ ఫిబ్రవరి చివరి వారం వరకు రోజుకు గరిష్టంగా 50 మంది రోగులు ఉండేవారు, కాని ఇప్పుడు పరిస్థితి మరింత దిగజారింది. ఇప్పుడు ప్రతిరోజూ 400 నుండి 500 మంది కరోనా బారిన పడుతున్నారు.
కరోనా కొత్త కేసుల రేటు 165% కి పెరిగింది. మార్చి 16 మరియు 31 మధ్య 1400 మంది కరోనా పాజిటివ్ కేసులు తేలితే.. ఈసారి ఏప్రిల్ 1 నుండి 14 వరకు 3,721 కు పెరిగింది. అదేవిధంగా, మరణ కేసులలో కూడా పెరుగుదల నమోదైంది. మార్చిలో, కరోనా కారణంగా 9 మరణాలు సంభవించాయి, ఇది ఈసారి 15 కి పెరిగింది.

ఇలా ఎన్నికల ప్రచారం.. సమావేశాలు కూడా కరోనా రెండోసారి ఇంత ఉధృతంగా కావడానికి ముఖ్య కారణంగా చెప్పుకోవచ్చు.