పురందేశ్వరికి పోస్ట్ ఇస్తే…మరి సుజనా సంగతేంటి..?

పురంధేశ్వరి.. మాజీ కేంద్రమంత్రి. ఇది చరిత్ర. మరి వర్తమానం సంగతేంటి? రెండోసారి బీజేపీ అధికారంలోకి వచ్చిన తర్వాత ఏపీ కాషాయ కండువాలకి కేంద్రంలో పదవులొస్తున్నాయి. మరి పురంధేశ్వరి సంగతేంటి ? సరిగ్గా ఇక్కడే ఈసారి రాజ్యసభ ఖాయమని పార్టీలో చర్చ జరుగుతుంది. ఈ విషయంలో సుజనా చౌదరి చాలా టెన్షన్ పడుతున్నాడట. కానీ పురంధేశ్వరికి రాజ్యసభ సీటిస్తే… సుజనాకి ఎందుకుంత టెన్షన్..?

ఏపీ బీజేపీ నేతల్లో యాక్టివ్ గా ఉండేవారిలో పురంధేశ్వరి ఒకరు. కాంగ్రెస్ లోనే మంత్రిగా పనిచేసిన పురంధేశ్వరి..బీజేపీలోకి వచ్చాక పార్లమెంట్ లో అడుగుపెట్టలేక పోయారు. 2014, 2019 రెండు సార్లు వరుసగా ఎంపీగా పోటీచేసి ఓడిపోయారు. అయితే ఎన్నికల్లో గెలుపోటములతో సంబంధం లేకుండా పార్టీలో సీరియస్ గా పనిచేస్తుంటారు. ఇప్పుడు ఆమె సేవలను జాతీయ స్థాయిలో వాడుకోవాలని బీజేపీ అధిష్టానం భావిస్తోందని రాజకీయవర్గాల్లో గుసగుసలు మొదలయ్యాయి.

ఇదిలా ఉంటే, ఏపీకి ఒక కేంద్రమంత్రి పదవి ఇవ్వాలనే ఆలోచనలో మోదీ సర్కార్ ఉందని సమాచారం. ఆ క్రమంలో ఢిల్లీ స్థాయిలో మంత్రి పదవి కోసం సుజనాచౌదరి సీరియస్ గా లాబీయింగ్ చేస్తున్నారు. అయితే సబ్జెక్ట్ పరంగా పురంధేశ్వరి ముందు సుజనాచౌదరి నిలబడలేరు. ఈ క్రమంలో ఏపీకి ఇవ్వాలనుకున్న మంత్రి పదవి పురంధేశ్వరి ఖాతాలోకి వెళ్లిపోతుందా అన్న టెన్షన్ కాస్త కాస్తగా సుజనాచౌదరిలో పెరిగిపోతుందని టాక్. అయితే బీజేపీ మనసులో ఏముందన్నది మాత్రం సస్పెన్సే..