మీ ఫోన్ సూపర్ ఫాస్ట్గా పనిచేయాలా.. వారానికి ఒక్క నిమిషం ఇలా చేస్తే చాలు..
నేటి ఆధునిక యుగంలో స్మార్ట్ఫోన్ లేనిదే క్షణం గడవదు. డిజిటల్ చెల్లింపుల నుండి వినోదం వరకు అన్నీ దానిలోనే ఉన్నాయి. అయితే మనం ఫోన్ను ఎంతలా వాడుతున్నామంటే, దానికి కనీసం స్విచ్ ఆఫ్ అయ్యే అవకాశం కూడా ఇవ్వడం లేదు. ఈ అలవాటు మన ఫోన్ ప్రాణాలను మెల్లమెల్లగా తీస్తోందని సాంకేతిక నిపుణులు హెచ్చరిస్తున్నారు. రీడర్స్ డైజెస్ట్, ప్రముఖ బ్యాటరీ తయారీ సంస్థల విశ్లేషణ ప్రకారం.. వారానికి కనీసం ఒక్కసారైనా ఫోన్ను స్విచ్ ఆఫ్ చేసి రీస్టార్ట్ చేయడం అనేది ఒక డిజిటల్ థెరపీ లాంటిది. దీనివల్ల ఎన్నో ప్రయోజనాలు ఉన్నాయని చెబుతున్నారు.
మెమరీ రీసెట్: మనం ఒక యాప్ను క్లోజ్ చేసినా, అది బ్యాక్గ్రౌండ్లో కొంత మేర RAMను ఆక్రమించే ఉంటుంది. ఇలా వందలాది ప్రాసెస్లు నిరంతరం జరగడం వల్ల ఫోన్ హ్యాంగ్ అవ్వడం మొదలవుతుంది. మీరు ఫోన్ను రీస్టార్ట్ చేసినప్పుడు, ఈ బ్యాక్గ్రౌండ్ యాప్స్ అన్నీ పూర్తిగా క్లోజ్ అయి, RAM ఫ్రీ అవుతుంది. ఫలితంగా ఫోన్ కొత్త దానిలా వేగంగా పనిచేస్తుంది.
బ్యాటరీ హెల్త్: ఫోన్ ఎప్పుడూ ఆన్లో ఉంటే, బ్యాటరీలోని కెమికల్ రియాక్షన్స్ నిరంతరం జరుగుతూనే ఉంటాయి. దీనివల్ల బ్యాటరీ వేడెక్కడం సంభవిస్తుంది. వారానికి ఒక్క నిమిషం పాటు ఆఫ్ చేయడం వల్ల ఇంటర్నల్ సర్క్యూట్లు చల్లబడతాయి. ఇది బ్యాటరీ లీకేజీని అరికట్టి దాని జీవితకాలాన్ని పెంచుతుంది.
సాఫ్ట్వేర్ గ్లిచ్ల నివారణ: స్మార్ట్ఫోన్ ఆపరేటింగ్ సిస్టమ్ నిరంతరం అప్డేట్ అవుతుంటుంది. కొన్నిసార్లు చిన్న చిన్న కోడింగ్ ఎర్రర్స్ వల్ల యాప్స్ సరిగ్గా ఓపెన్ కాకపోవడం లేదా కెమెరా పనిచేయకపోవడం వంటివి జరుగుతాయి. ఫోన్ ఆఫ్ చేసి ఆన్ చేసినప్పుడు, సిస్టమ్ ఫైల్స్ అన్నీ మళ్లీ తాజాగా లోడ్ అవుతాయి. దీనివల్ల సాఫ్ట్వేర్ గ్లిచ్లు 90శాతం వరకు తొలగిపోతాయి.
కనెక్టివిటీ సమస్యల పరిష్కారం: చాలామందికి వై-ఫై సిగ్నల్ ఉన్నా ఇంటర్నెట్ రాకపోవడం లేదా మొబైల్ డేటా స్లో అవ్వడం వంటి సమస్యలు ఎదురవుతుంటాయి. నెట్వర్క్ టవర్లకు, ఫోన్ మోడెమ్కు మధ్య కమ్యూనికేషన్ సరిగ్గా లేనప్పుడు ఇది జరుగుతుంది. రీస్టార్ట్ చేయడం వల్ల నెట్వర్క్ సెట్టింగ్స్ రీసెట్ అయి, కనెక్టివిటీ మెరుగుపడుతుంది.
కేవలం రీస్టార్ట్ చేయడమే కాకుండా సెట్టింగ్స్లోకి వెళ్లి అప్పుడప్పుడు బ్రౌజర్, సోషల్ మీడియా యాప్స్ యొక్క కాష్ డేటాను డిలీట్ చేయండి. బ్యాటరీని ఎప్పుడూ 0 వరకు రానివ్వకండి, అలాగే 100 వరకు చార్జ్ చేయకండి. 20శాతం నుండి 80శాతం మధ్య ఉంచడం వల్ల బ్యాటరీ హెల్త్ బాగుంటుంది. మీరు వాడని యాప్లను ఫోన్ నుండి తొలగించండి. అవి స్టోరేజ్నే కాకుండా బ్యాటరీని కూడా ఖర్చు చేస్తాయి.