బిర్యానీ vs పులావ్.. ఈ రెండింటి మధ్య తేడా ఏంటో తెలుసా..? 99శాతం మందికి తెలియదు..
Biryani vs Pulao: బిర్యానీ అంటే ఎవరికి ఇష్టం ఉండదు. అందులోనూ హైదరాబాద్ బిర్యానీ అంటే లొట్టలేసుకుంటూ తింటారు. బిర్యానీతో పాటు పులావ్ కూడా చాలా ఫేమస్. పండగైనా, పబ్బమైనా, స్నేహితుల విందైనా ఈ రెండు వంటకాలు లేనిదే ముద్ద దిగదు. అయితే చాలామంది బిర్యానీకి, పులావ్కు పెద్దగా తేడా లేదని, రెండూ ఒకటేనని పొరబడుతుంటారు. కానీ ప్రముఖ సెలబ్రిటీ చెఫ్ కునాల్ కపూర్ ప్రకారం.. ఇవి చూడటానికి ఒకేలా కనిపించినప్పటికీ, వీటిని తయారుచేసే విధానం, రుచి, సంప్రదాయంలో గణనీయమైన తేడాలు ఉన్నాయి.
మాంసాన్ని వండే విధానం: చెఫ్ కునాల్ కపూర్ తెలిపిన వివరాల ప్రకారం.. ఈ రెండింటి మధ్య ఉన్న ప్రధాన తేడా మాంసాన్ని వండే విధానంలోనే ఉంది. బిర్యానీ వండేటప్పుడు మాంసాన్ని ముందుగా వివిధ రకాల సుగంధ ద్రవ్యాలు, పెరుగు, నూనెతో బాగా మ్యారినేట్ చేసి, ఆపై వేయిస్తారు. దీనివల్ల మసాలాల ఘాటు, రుచి మాంసంలోకి లోతుగా ఇంకుతుంది. పులావ్లో మాంసాన్ని లేదా కూరగాయలను నేరుగా నూనెలో వేయించకుండా, సాధారణంగా నీటిలో ఉడకబెడతారు. ఆ ఉడికించిన మాంసం రసాన్ని అన్నం వండటానికి ఉపయోగిస్తారు. అందుకే దీనికి మృదువైన, సహజమైన రుచి వస్తుంది.
వంట ప్రక్రియ: బిర్యానీ అనేది ఒక కళ. ఇందులో అన్నాన్ని ముందుగా 70-80శాతం విడిగా ఉడికిస్తారు. ఆ తర్వాత ఒక పాత్రలో ముందుగా వండిన మాంసం ఒక పొరగా, దానిపై సగం ఉడికిన అన్నాన్ని మరో పొరగా వేస్తారు. ఇలా లేయర్లుగా అమర్చి, పాత్రకు మైదా పిండితో మూతను సీల్ చేసి దమ్ పద్ధతిలో వండుతారు. పులావ్ అనేది ఒకే పాత్రలో త్వరగా అయిపోయే వంటకం. ఇందులో బియ్యం, మాంసం, కూరగాయలు, నీరు అన్నీ కలిపి ఒకేసారి ఉడికిస్తారు. ఇక్కడ లేయరింగ్ లేదా దమ్ పెట్టే పద్ధతి ఉండదు.
మసాలాల మోతాదు: మసాలాల మోతాదు, రుచి పరంగా కూడా ఈ రెండింటికీ అసలు పోలికే ఉండదు. బిర్యానీ మరింత కారంగా, ఘాటుగా, సువాసనల భరితంగా ఉంటుంది. ఇందులో కుంకుమపువ్వు, పుదీనా, కొత్తిమీర, వేయించిన ఉల్లిపాయలు, కేవ్రా వాటర్ వంటివి ఎక్కువగా వాడుతారు. ప్రతి ముద్దలోనూ బలమైన మసాలా రుచి తగులుతుంది. పులావ్ రుచి చాలా తేలికగా, సాపేక్షంగా తక్కువ కారంతో ఉంటుంది. ఇందులో హోల్ స్పైసెస్ వాడినప్పటికీ, అవి అన్నానికి ఒక సున్నితమైన సువాసనను మాత్రమే ఇస్తాయి తప్ప బిర్యానీ అంత ఘాటును ఇవ్వవు.
వీటిని వడ్డించే, తినే విధానంలో కూడా స్పష్టమైన వ్యత్యాసాలు ఉన్నాయి. బిర్యానీ అనేది ఒక సంపూర్ణమైన, భారీ వంటకం. దీని మసాలాల ఘాటును సమతుల్యం చేయడానికి సాధారణంగా చల్లని రైతా లేదా మిర్చి కా సాలన్తో మాత్రమే వడ్డిస్తారు. మరోవైపు పులావ్ రుచి చాలా తేలికగా ఉంటుంది కాబట్టి దీనిని ఒంటరిగా తినడం కంటే, దీనికి తోడుగా ఏదైనా ఘాటైన గ్రేవీ కూర కలిపి నంజుకుంటూ తినడానికి ప్రజలు ఇష్టపడతారు.
మొత్తంగా చూస్తే బిర్యానీ ఒక ప్రత్యేకమైన రాయల్ వంటకం అయితే, పులావ్ అనేది మనసుకు హాయినిచ్చే వంటకం. బిర్యానీ కారంగా, ఘాటుగా, సువాసనగా ఉంటే.. పులావ్ రుచిలో తేలికగా ఉంటుంది. అందుకే ఈ రెండింటి రూపాలు దగ్గరగా ఉన్నప్పటికీ వాటి రుచి, శైలి పరంగా దేని ప్రత్యేకత దానిదే. ఈ వైవిధ్యం కారణంగానే ప్రపంచవ్యాప్తంగా ఉన్న భోజన ప్రియులలో రెండింటికీ విడివిడిగా భారీ సంఖ్యలో అభిమానులు ఉన్నారు.