గజలక్ష్మిగా కనకమహాలక్ష్మి అమ్మవారు.. లక్ష గాజులతో గర్భగుడి అలంకరణ, పోటెత్తిన భక్తులు
ఉత్తరాంధ్ర ఇలవేల్పు విశాఖలోని శ్రీ కనకమహాలక్ష్మి అమ్మవారి ఆలయంలో దేవీ నవరాత్రి మహోత్సవాలు వైభవంగా కొనసాగుతున్నాయి. రోజుకో అలంకరణలో భక్తులకు దర్శనమిస్తున్న అమ్మవారు, ఎనిమిదో రోజైన ఆదివారం గజలక్ష్మిగా భక్తులకు దర్శన భాగ్యం కల్పించారు. లక్ష గాజులతో అమ్మవారి గర్భగుడిని అలంకరించారు భక్తులు. అనంతరం లక్ష గాజుల పూజను వైభవంగా నిర్వహించారు.
ఉత్తరాంధ్ర ఇలవేల్పు విశాఖలోని శ్రీ కనకమహాలక్ష్మి అమ్మవారి ఆలయంలో దేవీ నవరాత్రి మహోత్సవాలు ఘనంగా జరుగుతున్నాయి. అక్టోబర్ 11 నుంచి ఆలయంలో అమ్మవారికి మొదలైన ప్రత్యేక పూజలు తొమ్మిది రోజుల పాటు కొనసాగనున్నాయి. ఒక్కో రోజు ఒక్కో రూపంలో దర్శనమిస్తున్న అమ్మవారిని ప్రత్యేకంగా అలంకరించి పూజిస్తున్నారు భక్తులు.
అక్టోబర్ 11 నుంచి అక్టోబర్ 20 వరకు ఈ శరన్నవరాత్రి ఉత్సవాలు నిర్వహిస్తున్నారు. తొలిరోజు ఆదిలక్ష్మి అలంకరణలో అమ్మవారు భక్తులకు దర్శనమివ్వగా.. ఆ రోజు అమ్మవారికి స్వర్ణ కవచ అలంకరణలో శాస్త్రోక్తంగా పూజలు నిర్వహించారు. ఇక రెండవ రోజు ధనలక్ష్మిగా అమ్మవారు భక్తులకు దర్శనమివ్వగా.. ఆ రోజు లక్ష చామంతుల అలంకరణలో అమ్మవారికి పూజలు నిర్వహించారు. ఇక మూడవ రోజు ధాన్యలక్ష్మిగా దర్శనమిచ్చిన అమ్మవారికి లడ్డూలతో పూజ చేశారు.
ఇక నాలుగవ రోజు ధైర్యలక్ష్మి అలంకారంలో అమ్మవారు భక్తులకు దర్శనమివ్వగా.. ఆ రోజు అమ్మవారికి తులసి పూజ నిర్వహించారు. ఐదవ రోజు సంతానలక్ష్మిగా అమ్మవారిని అలంకరించారు. కలువ పూజను కన్నుల పండువగా చేశారు. ఇక ఆరవ రోజు విద్యాలక్ష్మి అలంకారంలో శ్రీ పుష్పయాగాన్ని నిర్వహించారు. ఏడవ రోజు విజయలక్ష్మి అలంకారంలో గులాబీల పూజ చేశారు.
ఇక ఎనిమిదో రోజైన ఆదివారం అమ్మవారు గజలక్ష్మి అలంకారంలో భక్తులకు దర్శనమివ్వగా.. ఆ రోజు ఆలయంలో లక్ష గాజులతో అలంకరించి అమ్మవారికి ప్రత్యేక పూజ నిర్వహించారు. ఈ పూజా కార్యక్రమానికి భారీగా భక్తులు తరలివచ్చి అమ్మవారిని దర్శించుకున్నారు.
చివరి రోజైన ఈ నెల 20న అమ్మవారు కనకమహాలక్ష్మి రూపంలో భక్తులకు దర్శనమివ్వనున్నారు. ఆ రోజు స్వర్ణ కవచ అలంకరణలో అమ్మవారిని పూజించనున్నారు. 18 బంగారు పుష్పాలతో స్వర్ణ పుష్పార్చన నిర్వహిస్తారు. నవరాత్రుల్లో అమ్మవారిని దర్శించుకునేందుకు ఉత్తరాంధ్ర నుంచే కాక రెండు తెలుగు రాష్ట్రాల నుంచి భక్తులు తరలివస్తున్నారు.