ఇంట్లో తులసి మొక్కను ఏ రోజు నాటితే మంచిది.. ఇలా చేస్తే మీ తలరాతే మారిపోతుంది..
హిందూ సంప్రదాయంలో తులసి మొక్కను కేవలం ఒక మొక్కగా కాకుండా సాక్షాత్తూ మహాలక్ష్మి స్వరూపంగా పూజిస్తారు. వాస్తు శాస్త్రం ప్రకారం.. ఏ ఇంట్లో అయితే తులసి పచ్చగా కళకళలాడుతూ ఉంటుందో, ఆ ఇంట్లో ప్రతికూల శక్తి నశించి సానుకూలత వెల్లివిరుస్తుంది. విష్ణుమూర్తికి అత్యంత ప్రీతిపాత్రమైన ఈ మొక్కను ఇంట్లో నాటడానికి, పూజించడానికి కొన్ని ప్రత్యేక నియమాలు ఉన్నాయి. అవేంటో ఇప్పుడు తెలుసుకుందాం.
ఏ రోజున నాటాలి?: తులసిని ఏ రోజు పడితే ఆ రోజు నాటడం అంత శుభప్రదం కాదు. శాస్త్రం ప్రకారం తులసిని నాటడానికి గురువారం లేదా శుక్రవారం అత్యంత శ్రేష్ఠమైనవి. గురువారం విష్ణుమూర్తికి, శుక్రవారం లక్ష్మీదేవికి అంకితం చేయబడిన రోజులు కాబట్టి, ఈ రోజుల్లో మొక్కను నాటితే ఐశ్వర్యం సిద్ధిస్తుంది. ఇక నెలల విషయానికి వస్తే కార్తీక మాసం తులసి మొక్కను నాటడానికి అత్యుత్తమ సమయం. ఈ మాసంలో తులసి పూజ చేయడం వల్ల అనంతమైన పుణ్యఫలాలు లభిస్తాయి.
ఈ రోజుల్లో నాటకండి: మొక్కను నాటేటప్పుడు వారాలను గమనించడం ముఖ్యం. వాస్తు శాస్త్రం ప్రకారం.. సోమవారం, బుధవారం, శనివారం రోజుల్లో తులసిని నాటడం నిషిద్ధం. అలాగే ఆదివారాలు, ఏకాదశి రోజుల్లో కూడా మొక్కను తాకడం లేదా నాటడం చేయకూడదు.
పూజా నియమాలు - జాగ్రత్తలు: తులసి కోటను ఇంట్లో ఉంచుకున్న వారు ప్రతిరోజూ కొన్ని నియమాలను పాటించాలి. ప్రతిరోజూ ఉదయం స్నానం చేసిన తర్వాతే తులసికి నీటిని సమర్పించాలి. అయితే ఆదివారాలు, ఏకాదశి రోజుల్లో మాత్రం తులసికి నీరు పోయకూడదని శాస్త్రం చెబుతోంది.
దీపారాధన: ప్రతిరోజూ సాయంత్రం తులసి కోట వద్ద నెయ్యి లేదా నూనెతో దీపం వెలిగించడం వల్ల ఇంట్లోని వాస్తు దోషాలు తొలగిపోతాయి. తులసిని ఎల్లప్పుడూ ఇంటికి ఉత్తర లేదా తూర్పు దిశలో ఉంచాలి. ఇది సానుకూల శక్తిని ఆకర్షించడానికి ఉత్తమమైన స్థానం.
గుర్తుంచుకోవాల్సిన విషయాలు: తులసి మొక్క ఎండిపోతే వెంటనే దాన్ని తొలగించి, నదిలో లేదా పారే నీటిలో కలపాలి. ఎండిన మొక్క ఇంట్లో ఉండటం వాస్తు దోషంగా పరిగణిస్తారు. తులసి కోట చుట్టుపక్కల ప్రాంతం ఎప్పుడూ శుభ్రంగా ఉండాలి. అక్కడ చెప్పులు విడవడం లేదా మురికి వస్తువులను ఉంచడం వంటివి చేయకూడదు. ఈ నియమాలను పాటిస్తూ తులసిని పూజించే ఇంట్లో డబ్బుకు ఎప్పుడూ కొరత ఉండదని, లక్ష్మీనారాయణుల అనుగ్రహం ఎల్లప్పుడూ ఉంటుందని పండితులు చెబుతున్నారు.