Moto G75: మోటో నుంచి మరో కొత్త ఫోన్.. తోపు ఫీచర్లతో..
ప్రముఖ ఎలక్ట్రానిక్స్‌ దిగ్గజం మోటోరోలో మార్కెట్లోకి వరుసగా కొత్త ఫోన్‌లను లాంచ్ చేస్తూ వస్తోంది. ఓవైపు ప్రీమియం మార్కెట్‌ను టార్గెట్ చేసుకొని కొత్త ఫోన్స్‌ను తీసుకొస్తున్న సంస్థ, మరోవైపు బడ్జెట్‌ ధరలో కూడా ఫోన్‌లను తెస్తోంది. ఈ క్రమంలోనే తాజాగా మరో మిడ్ రేంజ్‌ బడ్జెట్‌ ఫోన్‌ను మార్కెట్లోకి తీసుకొచ్చింది. గ్లోబల్‌ మార్కెట్లో లాంచ్ అయిన ఈ ఫోన్‌కు సంబంధించిన పూర్తి వివరాలు ఇప్పుడు తెలుసుకుందాం..
ప్రముఖ స్మార్ట్‌ ఫోన్ తయారీ సంస్థ మోటోరోలా మార్కెట్లోకి మరో కొత్త ఫోన్‌ను లాంచ్ చేసింది. మోటో జీ75 పేరుతో ఈ ఫోన్‌ను తీసుకొచ్చారు. ప్రస్తుతం ఎంపిక చేసిన కొన్ని అంతర్జాతీయ మార్కెట్లోకి తీసుకొచ్చిన ఈ ఫోన్‌ను త్వరలోనే భారత మార్కెట్లోకి తీసుకొచ్చే అవకాశాలు ఉన్నాయని తెలుస్తోంది.
భారత మార్కెట్లో ఈ ఫోన్ ధర ఎంత ఉంటుందనే దానిపై ఇప్పటి వరకు ఎలాంటి అధికారిక ప్రకటన చేయలేదు. అయితే గ్లోబల్‌ మార్కెట్ ఆధారంగా ఈ ఫోన్ ధర 299 యూరోలుగా నిర్ణయించారు. భారత కరెన్సీలో చెప్పాలంటే ఇది సుమారు రూ. 27 వేలకు సమానం. అయితే ఇండియాలో ఈ ధర మరింత తగ్గే అవకాశాలు ఉన్నాయని తెలుస్తోంది.
ఫీచర్ల విషయానికొస్తే మోటో జీ75 స్మార్ట్‌ఫోన్‌ స్నాప్‌డ్రాగన్‌ 6 జెన్‌ 3 ప్రాసెసర్‌ను అందించారు. ఈ ఫోన్ 8జీబీ ర్యామ్‌తో పని చేస్తుంది. ఇక బ్యాటరీ విషయానికొస్తే ఇందులో 15 వాట్స్‌ వైర్‌లెస్‌ ఛార్జింగ్‌కు సపోర్ట్‌ చేసే 5000 ఎంఏహెచ్‌ బ్యాటరీని అందించారు.
ఇక ఈ ఫోన్‌లో 6.78 ఇంచెస్‌తో కూడిన ఫుల్‌ హెచ్‌డీ+ హాల్‌ పంచ్‌ స్క్రీన్‌ను అందించారు. ఆండ్రాయిడ్ 14 ఆపరేటింగ్ సిస్టమ్‌తో ఈ ఫోన్ పనిచేస్తుంది. ఇందులో 120 హెచ్‌జెడ్‌ రిఫ్రెష్‌ రేట్ స్క్రీన్‌ను అందించారు.
ఇక కెమెరా విషయానికొస్తే ఇందులో 50 మెగాపిక్సెల్స్‌, 8 మెగాపిక్సెల్స్‌తో కూడిన అల్ట్రా వైడ్‌ యాంగిల్‌ మాక్రో విజన్‌ సెన్సార్‌తో కూడిన డ్యూయల్‌ కెమెరా సెటప్‌ను అందించారు. సెల్ఫీలు, వీడియో కాల్స్‌ కోసం ఇందులో 16 ఎంపీతో కూడిన ఫ్రంట్‌ కెమెరాను ఇచ్చారు.