Chandra Neecha: రాసిపెట్టుకోండి.. నీచ చంద్రుడితో ఇక వారికి మహర్దశ ఖాయం!
ఈ నెల (ఏప్రిల్) 4, 5, 6 తేదీలలో వృశ్చిక రాశిలో చంద్రుడు నీచబడడం జరుగుతోంది. చంద్రుడు పాప గ్రహం అయిన రాశులకు చంద్రుడు నీచబడడం వల్ల శుభ యోగాలు కలుగుతాయని జ్యోతిష శాస్త్రం చెబుతోంది. వృషభం, సింహం, ధనుస్సు, మకరం, కుంభ రాశుల వారికి ఆధిపత్యం రీత్యా చంద్రుడు పాప గ్రహం. వీరికి చంద్రుడు చెడు చేయడానికే ఎక్కువ అవకాశం ఉంటుంది. అయితే, ఈ గ్రహం నీచబడడం వల్ల వీరికి శుభప్రదమైన జీవితం కలిగే అవకాశం ఉంది. ఆ మూడు రోజుల్లో ఈ రాశివారు చేసే ప్రయత్నాలు, చేపట్టే కార్యక్రమాలు తప్పకుండా విజయవంతం అవుతాయి.
వృషభం: ఈ రాశికి తృతీయాధిపతి అయిన చంద్రుడు సప్తమ స్థానంలో నీచబడడం వల్ల సంపన్న కుటుంబానికి చెందిన వ్యక్తితో పెళ్లి సంబంధం కుదురుతుంది. ఎటువంటి ప్రయత్నం చేపట్టినా విజయం సిద్దిస్తుంది. ప్రయాణాలు లాభిస్తాయి. కొద్ది ప్రయత్నంతో ఆదాయం బాగా వృద్ధి చెందుతుంది. వీరి ప్రణాళికలు, ప్రయత్నాలు తప్పకుండా సక్సెస్ అవుతాయి. సోదరులతో ఆస్తి వివాదాలు సానుకూలంగా పరిష్కారమవుతాయి. ప్రేమ వ్యవహారాలు సుఖ సంతోషాలతో సాఫీగా సాగిపోతాయి.
సింహం: ఈ రాశికి వ్యయాధిపతిగా అత్యంత పాప గ్రహమైన చంద్రుడు చతుర్థ స్థానంలో నీచబడడం వల్ల కుటుంబ జీవితం సుఖ సంతోషాలతో సాగిపోతుంది. గృహ, వాహన ప్రయత్నాలు విజయవంతం అవుతాయి. ఆస్తి వివాదాలు అనుకూలంగా పరిష్కారమవుతాయి. ఆదాయ వృద్ధికి చేసే ప్రయత్నాలు తప్పకుండా సక్సెస్ అవుతాయి. ఈ రాశివారు ఎంత గోప్యంగా, గుంభనంగా వ్యవహరిస్తే అంత మంచిది. వీరి ఉద్యోగ ప్రయత్నాలు, పెళ్లి ప్రయత్నాలు ఊహించని సత్ఫలితాలనిస్తాయి.
ధనుస్సు: ఈ రాశికి అష్టమాధిపతిగా పూర్తి స్థాయి పాప గ్రహమైన చంద్రుడు వ్యయ స్థానంలో నీచబడడం వల్ల ఈ రాశివారికి రాజయోగాలు కలుగుతాయి. ఉద్యోగంలో తప్పకుండా పదోన్నతి లభిస్తుంది. ఇంటా బయటా ప్రాధాన్యం పెరుగుతుంది. షేర్లు, స్పెక్యులేషన్లు బాగా లాభిస్తాయి. రావలసిన సొమ్ము చేతికి అందుతుంది. వృత్తి, ఉద్యోగాలరీత్యా విదేశాలకు వెళ్లే అవకాశం కలుగుతుంది. వృత్తి, వ్యాపారాల్లో యాక్టివిటీ పెరుగుతుంది. ప్రయాణాలు లాభిస్తాయి. ఆరోగ్యం మెరుగుపడుతుంది.
మకరం: సప్తమాధిపతిగా ఈ రాశికి పాప గ్రహం, మారక గ్రహం కూడా అయిన చంద్రుడు లాభ స్థానంలో నీచబడడం వల్ల ఆదాయం అనేక మార్గాల్లో పెరిగే అవకాశం ఉంది. వ్యక్తిగత, ఆర్థిక సమస్యల నుంచి విముక్తి లభించి మానసిక ఒత్తిడి బాగా తగ్గుతుంది. ఉద్యోగంలో పదోన్నతి కలిగి, ప్రాధాన్యం బాగా పెరుగుతుంది. ఆస్తి, ఆర్థిక సమస్యలు, వివాదాలు చాలావరకు పరిష్కారమవుతాయి. ఆకస్మిక ధన ప్రాప్తికి, షేర్లు, స్పెక్యులేషన్లలో అంచనాలకు మించిన లాభాలకు అవకాశం ఉంది.
కుంభం: ఈ రాశికి షష్టాధిపతి అయిన చంద్రుడు దశమ స్థానంలో నీచబడడం వల్ల ఈ రాశివారికి నీచభంగ రాజయోగం కలుగుతుంది. రాజపూజ్యాలు కలుగుతాయి. ఉద్యోగులు, నిరుద్యోగులకు విదేశీ ఆఫర్లు అందే అవకాశం ఉంది. వృత్తి, ఉద్యోగాలరీత్యా విదేశాలకు వెళ్లే అవకాశం కలుగుతుంది. తండ్రి వైపు నుంచి ఆస్తి కలిసి వస్తుంది. గృహ, వాహన యోగాలు పట్టే సూచనలున్నాయి. శుభవార్తలు ఎక్కువగా వినడం జరుగుతుంది. అనారోగ్యాల నుంచి బాగా ఉపశమనం లభిస్తుంది.