Mars 2020: ఏప్రిల్ 11 కోసం ఆత్రుతగా ఎదురు చూస్తున్న శాస్త్రవేత్తలు.. ఎందుకో తెలుసా..?
దాదాపు 47 కోట్ల కిలోమీటర్లు నాసా పర్సీవరెన్స్ రోవర్‌తో పాటు ప్రయాణించిన ఈ మినీ హెలికాప్టర్.. రోవర్‌ను వీడి మార్స్ ఉపరితలంపై అడుగు పెట్టింది.
అమెరికా అంతరిక్ష పరిశోధన సంస్థ నాసా మరో విజయం సాధించింది. నాసాకు చెందిన మినీ హెలికాప్టర్ ఇన్‌జెన్యూయిటీ మార్స్‌పై దిగింది.
దాదాపు 47 కోట్ల కిలోమీటర్లు నాసా పర్సీవరెన్స్ రోవర్‌తో పాటు ప్రయాణించిన ఈ మినీ హెలికాప్టర్.. రోవర్‌ను వీడి మార్స్ ఉపరితలంపై అడుగు పెట్టింది.
మార్స్ అన్వేషణ కోసం నాసా ప్రయోగించిన పర్సీవరెన్స్ రోవర్ గత నెల ఫిబ్రవరి 18వ తేదీన మార్స్‌పై అడుగు పెట్టిన విషయం తెలిసిందే. ఈ పర్సీవరెన్స్ రోవర్ కింది భాగంలో ఇన్‌జెన్యూయిటీ మినీ హెలికాప్టర్‌ను కూడా ఫిక్స్ చేశారు.
ఇంతకాలం పర్సీవరెన్స్ పవర్ సిస్టమ్‌ను ఉపయోగించుకున్న ఈ మినీ హెలికాప్టర్.. ఇక మీదట సొంత బ్యాటరీ సాయంతో నడవాల్సి ఉంటుంది.
ఇంజెన్యూయిటీ మినీ హెలికాప్టర్ ఈనెల 11వ తేదీన ఎగిరే ప్రయత్నం చేయనుంది. అయితే, ఈ ప్రయత్నం కూడా చాలా రిస్క్‌తో కూడిన పని అని సైంటిస్ట్‌లు చెబుతున్నారు.
అంగారక గ్రహంపై రాత్రి వేళల్లో మైనస్ 90 డిగ్రీల కనిష్ఠ ఉష్ణోగ్రతలు ఉంటాయి. అలాంటి వాతావరణంలో ఈ మినీ హెలికాప్టర్ తట్టుకుని నిలబడాల్సి ఉంటుంది.
భూమి సాంద్రతలో కేవలం ఒకశాతం మాత్రమే మార్స్ సాంద్రత ఉంటుంది. ఈ కారణంగా హెలికాప్టర్ ఎగరడం అంత సులువు కాదు. అయితే, గురుత్వాకర్షణ విషయంలో మాత్రం హెలికాప్టర్ ఎగిరేందుకు సానుకూల అంశాలు కనిపిస్తున్నాయి. భూమి గురుత్వాకర్షణ శక్తిలో, మార్స్ గురుత్వాకర్షణ శక్తి కేవలం మూడో వంతు మాత్రమే కావడం.. ఈ హెలికాప్టర్ ఎగిరేందుకు సహకరిస్తుందని శాస్త్రవేత్తలు అంచనా వేస్తున్నారు.
హెలికాప్టర్ విజయవంతంగా ఎగిరినట్లయితే.. శాస్త్రవేత్తలు మరో ఘన విజయాన్ని సాధించినట్లే అవుతుంది. మార్స్ వాతావరణంలో సంచరిస్తూ ఆ గ్రహం ఉపరితలాన్ని చిత్రించవచ్చు.