నవరాత్రుల స్పెషల్ స్వీట్.. కమ్మని రుచితో సగ్గుబియ్యం సేమియా పాయసం
నవరాత్రుల్లో అమ్మవారికి నైవేద్యంగా కమ్మని సగ్గుబియ్యం సేమియా పాయసం చేసి పెట్టండి. ఎంతో రుచికరమైన, ఆరోగ్యకరమైన సగ్గుబియ్యం సేమియా పాయసాన్ని ఎలా తయారుచేయాలోఇక్కడ చూద్దాం.. ఈ పాయసం ముఖ్యంగా సమ్మర్లో శరీరానికి చలువనిస్తుంది. దీనిని పంచదార బదులు బెల్లంతో చేయడం వల్ల మరింత ఆరోగ్యకరంగా ఉంటుంది. ఏ పండగకైనా, లేదా సాధారణ రోజుల్లోనూ తీపి తినాలనిపించినప్పుడు దీనిని సులభంగా తయారుచేసుకోవచ్చు.
కావలసిన పదార్థాలు: సగ్గుబియ్యం: అర కప్పు, సేమియా: ఒక కప్పు, నెయ్యి: 2 టీస్పూన్లు (వేయించడానికి), జీడిపప్పు పలుకులు: 2 టేబుల్ స్పూన్లు, బాదం పప్పు పలుకులు: 2 టేబుల్ స్పూన్లు (కావాలంటే కిస్మిస్, ఎండు కొబ్బరి కూడా తీసుకోవచ్చు), నీళ్లు: 2 కప్పులు (పాయసం కోసం), అర కప్పు (బెల్లం కరిగించడానికి), పాలు: 3 కప్పులు ( పల్చగా కావాలంటే 6 కప్పులు తీసుకోవచ్చు), బెల్లం: ఒక కప్పు (తీపి ఎక్కువ కావాలంటే పావు కప్పు), యాలకుల పొడి: అర టీస్పూన్, పచ్చకర్పూరం: కొద్దిగా తీసుకోవాలి.
ముందుగా ఒక గిన్నెలో అరకప్పు సగ్గుబియ్యం తీసుకొని, నీళ్లతో రెండుసార్లు బాగా రుద్ది కడగాలి. ఇలా చేయడం వల్ల సగ్గుబియ్యంలోని పిండిపదార్థం తొలగిపోతుంది. శుభ్రం చేసిన సగ్గుబియ్యంలో మళ్లీ నీళ్లు పోసి కనీసం ఒక గంట, వీలైతే రెండు నుండి మూడు గంటల పాటు నానబెట్టాలి. ఇది సగ్గుబియ్యం బాగా ఉడకడానికి సహాయపడుతుంది. స్టవ్ ఆన్ చేసి పాన్ పెట్టి, అందులో రెండు టీస్పూన్ల నెయ్యి వేయాలి. నెయ్యి వేడయ్యాక, రెండు టేబుల్ స్పూన్ల జీడిపప్పు పలుకులు, రెండు టేబుల్ స్పూన్ల బాదంపప్పు పలుకులు వేసి బంగారు రంగు వచ్చేవరకు వేయించాలి. వేయించిన డ్రై ఫ్రూట్స్‌ను ఒక గిన్నెలోకి తీసుకుని పక్కన పెట్టుకోవాలి. కావాలంటే కిస్మిస్, ఎండుకొబ్బరి ముక్కలు కూడా వేయించుకోవచ్చు.
అదే పాన్‌లో ఒక కప్పు సేమియాని తీసుకొని, మంటను మీడియం ఫ్లేమ్‌లో పెట్టి, సేమియా కొద్దిగా రంగు మారేంతవరకు బాగా వేయించాలి. వేయించిన సేమియాని ఒక ప్లేట్‌లోకి తీసుకుని పక్కన పెట్టుకోవాలి. ఇక్కడ మనం తీసుకున్న అరకప్పు నానబెట్టిన సగ్గుబియ్యం ఉడికిన తర్వాత ఒక కప్పు అవుతుంది, కాబట్టి ఒక కప్పు సేమియా సమానంగా ఉంటుంది.
మళ్లీ అదే పాన్‌లో రెండు కప్పుల నీళ్లు, మూడు కప్పుల పాలు పోసి బాగా మరిగించాలి. పాలు మరిగిన తర్వాత, నానబెట్టిన సగ్గుబియ్యంలోని నీళ్లను వంపేసి, సగ్గుబియ్యాన్ని మరిగే పాలలో వేయాలి. అలాగే, వేయించి పక్కన పెట్టుకున్న సేమియాని కూడా వేయాలి. మంటను మీడియం ఫ్లేమ్‌లో పెట్టి, సగ్గుబియ్యం, సేమియా మెత్తగా ఉడికే వరకు మధ్యమధ్యలో కలుపుతూ ఉడికించాలి. ఏడు నుండి పది నిమిషాల సమయం పడుతుంది. సగ్గుబియ్యం మెత్తగా అయి, సేమియా ఉడికిందో లేదో చూసుకోవాలి. పాయసం ఉడికేలోపు, మరో పక్కన ఒక గిన్నెలో ఒక కప్పు బెల్లం, అరకప్పు నీళ్లు పోసి, బెల్లం పూర్తిగా కరిగే వరకు మరిగించాలి. బెల్లం కరిగాక, ఒక నిమిషం పాటు మరిగించి స్టవ్ ఆఫ్ చేసి పక్కన పెట్టుకోవాలి. ఈ పాయసానికి పాకం అవసరం లేదు, బెల్లం కరిగితే సరిపోతుంది. బెల్లంలో ఏమైనా మలినాలు ఉంటే వడకట్టుకోవడం మంచిది.
సగ్గుబియ్యం, సేమియా బాగా ఉడికిన తర్వాత, స్టవ్ ఆఫ్ చేసి, ఉడికించిన పాయసాన్ని ఒక నిమిషం పాటు కలుపుతూ చల్లారనివ్వాలి. ఇది చాలా ముఖ్యమైన చిట్కా. వేడి వేడి పాయసంలో బెల్లం కలిపితే పాలు విరిగిపోయే అవకాశం ఉంది. కాబట్టి కొద్దిగా చల్లార్చిన తర్వాత వడకట్టిన బెల్లం నీళ్లను పాయసంలో వేసి బాగా కలపాలి. బెల్లం నీళ్లు కలిపిన తర్వాత, స్టవ్ ఆన్ చేసి మంటను మీడియం ఫ్లేమ్‌లో పెట్టి, వేయించిన డ్రై ఫ్రూట్స్‌ను, అర టీస్పూన్ యాలకుల పొడిని వేసి బాగా కలపాలి. టెంపుల్ స్టైల్ రుచి కావాలంటే కొద్దిగా పచ్చకర్పూరం కూడా వేసుకోవచ్చు. డ్రై ఫ్రూట్స్, యాలకుల పొడి వేసిన తర్వాత పాయసాన్ని ఎక్కువ సేపు మరగబెట్టాల్సిన అవసరం లేదు. ఒకసారి కలిపి వెంటనే స్టవ్ ఆఫ్ చేయాలి.