Buttermilk: మజ్జిగ వీరికి విషంతో సమానం.. తాగితే బాడీలో ఏం జరుగుతుందో తెలుసా..?
ఎండలు ముదురుతున్నాయి. దాహం తీర్చుకోవడానికి, శరీరాన్ని చల్లబరుచుకోవడానికి మనందరికీ గుర్తొచ్చే మొదటి డ్రింక్ మజ్జిగ. కాల్షియం, విటమిన్లు, ప్రోబయోటిక్స్తో నిండిన మజ్జిగను ఆరోగ్యానికి అమృతంగా భావిస్తారు. అయితే ఈ చల్లని పానీయం అందరికీ మేలు చేయదని మీకు తెలుసా..? కొన్ని ప్రత్యేక ఆరోగ్య సమస్యలు ఉన్నవారు మజ్జిగ తాగితే సమస్యలు మరింత ఎక్కువ అవుతాయని ఆరోగ్య నిపుణులు హెచ్చరిస్తున్నారు. అసలు మజ్జిగ ఎవరెవరు తాగకూడదో ఇప్పుడు వివరంగా తెలుసుకుందాం.
కిడ్నీ వ్యాధిగ్రస్తులు జాగ్రత్త: మూత్రపిండాల సంబంధిత సమస్యలతో బాధపడేవారు మజ్జిగకు దూరంగా ఉండటమే మంచిది. మజ్జిగలో పొటాషియం మరియు ఫాస్ఫరస్ అధికంగా ఉంటాయి. కిడ్నీలు బలహీనంగా ఉన్నప్పుడు ఈ ఖనిజాలను వడపోయడం శరీరానికి కష్టమవుతుంది. దీనివల్ల రక్తంలో వీటి స్థాయి పెరిగి కిడ్నీలపై అదనపు భారం పడుతుంది, ఇది పరిస్థితిని మరింత సీరియస్ చేయవచ్చు.
జలుబు, దగ్గు: మజ్జిగకు సహజంగానే చల్లబరిచే గుణం ఉంటుంది. మీకు ఇప్పటికే గొంతు నొప్పి, జలుబు లేదా దగ్గు వంటి సమస్యలు ఉంటే మజ్జిగ తాగడం వల్ల శ్లేష్మం పెరిగే అవకాశం ఉంది. ముఖ్యంగా రాత్రి వేళల్లో మజ్జిగ తాగడం వల్ల శ్వాసకోశ సమస్యలు తీవ్రమవుతాయి. గొంతు ఇన్ఫెక్షన్ ఉన్నప్పుడు మజ్జిగ తాగడం వల్ల నొప్పి మరింత పెరుగుతుంది.
లాక్టోస్ ఇంటలరెన్స్ ఉన్నవారు: చాలామందికి పాలు లేదా పాల పదార్థాలు పడవు. దీనినే లాక్టోస్ అసహనం అంటారు. మజ్జిగను పాలను పెరుగుగా మార్చి తయారు చేస్తారు కాబట్టి ఇందులోనూ లాక్టోస్ ఉంటుంది. ఇలాంటి వారు మజ్జిగ తాగితే కడుపు ఉబ్బరం, గ్యాస్, విరేచనాలు వంటి జీర్ణ సంబంధిత సమస్యలు తలెత్తుతాయి.
ఆర్థరైటిస్, కీళ్ల నొప్పులు: ఆయుర్వేదం ప్రకారం.. కీళ్ల నొప్పులు లేదా వాత సంబంధిత సమస్యలు ఉన్నవారు పుల్లటి మజ్జిగ తాగకూడదు. పుల్లని మజ్జిగ కీళ్లలో వాపును మరియు నొప్పిని పెంచే అవకాశం ఉంది. ఒకవేళ తాగాలనుకుంటే తాజా మజ్జిగను మాత్రమే తీసుకోవాలి.
నిపుణులు ఏమంటున్నారు?: మజ్జిగ తాగేటప్పుడు కొన్ని నియమాలు పాటిస్తే ఆరోగ్యానికి మంచిదని నిపుణులు సూచిస్తున్నారు. ఎప్పుడూ తాజా పెరుగుతో చేసిన మజ్జిగనే తాగాలి. జీలకర్ర పొడి, కొత్తిమీర, అల్లం కలిపిన మజ్జిగ జీర్ణక్రియకు మరింత మేలు చేస్తుంది. మధ్యాహ్నం భోజనంతో పాటు మజ్జిగ తీసుకోవడం అత్యంత ఉత్తమం. రాత్రిపూట మజ్జిగ తాగడం వల్ల జలుబు చేసే ప్రమాదం ఉంది.