వర్షాకాలంలో మజ్జిగ తాగుతున్నారా? అయితే, ఈ విషయం మీరు ఖచ్చితంగా తెలుసుకోవాల్సిందే!
ఎండ తీవ్రత నుండి ఉపశమనం పొందడానికి వేసవిలో మజ్జిగను అమృతంలా తాగుతాం. అయితే వర్షాకాలం రాగానే చాలామంది మజ్జిగ తాగడం పూర్తిగా ఆపేస్తారు. వర్షాకాలంలో మజ్జిగ తాగితే జలుబు, దగ్గు, గొంతు నొప్పి లేదా మోకాళ్ల నొప్పులు వస్తాయనే భయం చాలామందిలో ఉంటుంది. కానీ, ఆరోగ్య నిపుణుల అభిప్రాయం ప్రకారం, వర్షాకాలంలో కూడా మజ్జిగ తాగడం వల్ల శరీరానికి బోలెడంత మేలు జరుగుతుంది. కాకపోతే, ఈ సీజన్లో మజ్జిగ తీసుకునేటప్పుడు కొన్ని నియమాలు, జాగ్రత్తలు పాటించడం తప్పనిసరి.
జీర్ణవ్యవస్థ బలోపేతం: వర్షాకాలంలో మన శరీరంలో జీర్ణక్రియ (Metabolism) మందగిస్తుంది. దీనివల్ల పొట్ట ఇన్ఫెక్షన్లు, గ్యాస్, ఎసిడిటీ, ఫుడ్ పాయిజనింగ్ వంటి సమస్యలు త్వరగా వస్తాయి. మజ్జిగలో ఉండే లాక్టోబాసిల్లస్ అనే మంచి బ్యాక్టీరియా (ప్రోబయోటిక్స్) జీర్ణవ్యవస్థను చురుగ్గా ఉంచి, పొట్టను ఆరోగ్యంగా ఉంచుతుంది. హైపర్ టెన్షన్ (అధిక రక్తపోటు) తో బాధపడేవారు రోజూ మజ్జిగ తాగడం వల్ల మంచి ఫలితం ఉంటుంది.
రోగనిరోధక శక్తి పెంపు: వర్షాకాలంలో బ్యాక్టీరియా, వైరస్ల వల్ల వ్యాధులు ఎక్కువగా వ్యాపిస్తాయి. మజ్జిగను క్రమం తప్పకుండా తీసుకోవడం వల్ల శరీరంలో రోగనిరోధక శక్తి (ఇమ్యూనిటీ) పెరిగి, ఇన్ఫెక్షన్లతో పోరాడే సామర్థ్యం లభిస్తుంది. దీంతో సీజనల్ వ్యాధుల బారిన పడకుండా ఉంటారు. క్రమం తప్పకుండా మజ్జిగ తాగడం వల్ల శరీరంలోని చెడు కొలెస్ట్రాల్ స్థాయిలు తగ్గి, గుండె ఆరోగ్యం మెరుగుపడుతుంది.
శరీరానికి అవసరమైన పోషకాలు: మజ్జిగలో నీటి శాతం ఎక్కువగా ఉంటుంది. ఇది శరీరంలోని ఎలక్ట్రోలైట్ల సమతుల్యతను కాపాడుతుంది. ఇందులో క్యాల్షియం, విటమిన్ B కాంప్లెక్స్, పొటాషియం వంటి పోషకాలు పుష్కలంగా ఉంటాయి. ఇవి వర్షాకాలంలో వచ్చే నీరసాన్ని తగ్గించి శరీరానికి శక్తిని ఇస్తాయి. .ముఖ్యంగా వయసు పైబడిన వారిలో వచ్చే ఆస్టియోపోరోసిస్ వంటి సమస్యలను ఇది నివారిస్తుంది.
వర్షాకాలంలో మజ్జిగ వల్ల ఎలాంటి సైడ్ ఎఫెక్ట్స్ రాకూడదంటే కింది జాగ్రత్తలు పాటించాలి. ఈ సీజన్లో మజ్జిగను ఉదయం పూట లేదా మధ్యాహ్నం భోజనం తర్వాత మాత్రమే తీసుకోవాలి. సాయంత్రం 5 గంటల తర్వాత లేదా రాత్రి వేళల్లో మజ్జిగ తాగడం వల్ల కఫం పెరిగి, జలుబు, దగ్గు లేదా గొంతు ఇన్ఫెక్షన్ వచ్చే ప్రమాదం ఉంది. అలాగే, ఫ్రిజ్లో పెట్టిన లేదా ఐస్ వేసిన చల్లటి మజ్జిగను అస్సలు తాగకూడదు. ఎల్లప్పుడూ గది ఉష్ణోగ్రత (Room Temperature) వద్ద ఉన్న తాజా మజ్జిగను మాత్రమే తాగాలి.
మజ్జిగ చలవ చేసే గుణాన్ని సమతుల్యం చేయడానికి అందులో కొద్దిగా జీలకర్ర పొడి, కొత్తిమీర, నల్ల ఉప్పు, చిన్న అల్లం ముక్క లేదా సొంఠి పొడి కలిపి తీసుకోవాలి. ఇవి జీర్ణక్రియను మరింత వేగవంతం చేస్తాయి. వర్షాకాలంలో ఎక్కువ రోజులు నిల్వ ఉండి, పులిసిపోయిన మజ్జిగను తాగకూడదు. ఇది గొంతు నొప్పికి దారితీస్తుంది. కేవలం తాజా పెరుగుతో చేసిన మజ్జిగనే ఎంచుకోవాలి. వాతావరణంలో మార్పులు ఉన్నప్పటికీ, సరైన పద్ధతిలో, సరైన సమయంలో తీసుకుంటే వర్షాకాలంలో కూడా మజ్జిగ మన ఆరోగ్యానికి ఎంతో మేలు చేస్తుంది. కాబట్టి పైన పేర్కొన్న జాగ్రత్తలు పాటిస్తూ మజ్జిగను మీ డైట్లో చేర్చుకోండి.