Kobbari Junnu: ఇంట్లో పచ్చికొబ్బరి ఉందా? జెల్లీలా నోట్లో కరిగిపోయే కొబ్బరి జున్ను
సాధారణంగా ఆవు లేదా గేదె ఈనినప్పుడు దొరికే జున్నుపాలతోనే జున్ను చేయడం మనకు తెలుసు. అయితే అలాంటి జున్నుపాలు ఎల్లప్పుడూ అందుబాటులో ఉండవు; కానీ ఇంట్లో ఉండే తాజా పచ్చికొబ్బరితో అచ్చం జున్నులాగే సాఫ్ట్‌గా, జెల్లీలా నోట్లో వేస్తే వెన్నలా కరిగిపోయే కొబ్బరి జున్ను చాలా సులభంగా తయారుచేసుకోవచ్చు. ఎలాంటి రసాయనాలు లేదా జిలాటిన్ వాడకుండా స్వచ్ఛమైన కొబ్బరిపాలతో చేయడం వల్ల ఇది ఆరోగ్యానికి ఎంతో మంచిది, పిల్లలు అమితమైన ఇష్టంతో తింటారు.
కావలసిన పదార్థాలు: 2 కప్పుల పచ్చికొబ్బరి ముక్కలు, 3 కప్పుల నీళ్లు (కొబ్బరిపాలు తీయడానికి: మొదట 2 కప్పులు + తర్వాత 1 కప్పు), అర కప్పు కార్న్‌ఫ్లోర్, అర కప్పు పంచదార, 2 టేబుల్ స్పూన్ల కండెన్స్‌డ్ మిల్క్, 2 యాలకులు, చిటికెడు ఉప్పు, గిన్నెకు గ్రీస్ చేయడానికి కొద్దిగా నెయ్యి లేదా నూనె
తయారీ విధానం: ఒక మీడియం సైజు కొబ్బరికాయలోని కొబ్బరిని చిన్న చిన్న ముక్కలుగా కట్ చేసుకుని కొలిస్తే 2 కప్పులు రావాలి. ఈ ముక్కలను మిక్సీ జార్‌లో వేసి 2 యాలకులు వేసి మొదట నీళ్లు లేకుండా తురిమినట్లుగా గ్రైండ్ చేయాలి. ఆ తర్వాత 2 కప్పుల నీళ్లు పోసి మెత్తటి నునుపైన ప్యూరీలా రుబ్బుకోవాలి. ఒక వెడల్పాటి స్ట్రైనర్‌లో ఈ మిశ్రమాన్ని పోసి స్పాచులాతో ఒత్తుతూ కొబ్బరిపాలను వేరుచేయాలి. ఆ కొబ్బరి పిప్పిని మళ్లీ మిక్సీ జార్‌లో వేసి మరో కప్పు నీళ్లు పోసి గ్రైండ్ చేసి రెండోసారి పాలు పిండాలి.
తీసిన కొబ్బరిపాలలో అర కప్పు కార్న్‌ఫ్లోర్, అర కప్పు పంచదార, 2 టేబుల్ స్పూన్ల కండెన్స్‌డ్ మిల్క్, చిటికెడు ఉప్పు వేయాలి. విస్కర్ లేదా గరిటెతో పిండి ఉండలు ఏమీ లేకుండా బాగా కలపాలి. ఈ సమయంలోనే తీపి సరిచూసుకుని అవసరమైతే మరికాస్త పంచదార కలుపుకోవచ్చు. ఉడికే లోపు ఒక కేక్ టిన్ లేదా స్టీల్ గిన్నెకు కొద్దిగా నూనె లేదా నెయ్యి రాసి పక్కన పెట్టుకోవాలి. ఇప్పుడు కొబ్బరిపాల మిశ్రమం ఉన్న కడాయిని స్టవ్‌పై పెట్టి మంటను మీడియం ఫ్లేమ్‌లో ఉంచాలి. గరిటెతో అస్సలు ఆపకుండా కంటిన్యూస్‌గా కలుపుతూ ఉడికించాలి.
సుమారు 5 నిమిషాల్లో మిశ్రమం చిక్కబడటం ప్రారంభమవుతుంది. వెంటనే మంటను లో ఫ్లేమ్‌కి తగ్గించి.. అడుగు పట్టకుండా మరో 10 నుండి 15 నిమిషాల పాటు చిక్కటి జెల్లీ కన్సిస్టెన్సీ వచ్చే వరకు కలుపుతూ ఉడికించాలి. యాలకులు వేయకపోతే ఈ స్టేజ్‌లో కొద్దిగా వెనిలా ఎసెన్స్ వేసుకోవచ్చు. మిశ్రమం బాగా దగ్గరపడిన వెంటనే స్టవ్ ఆఫ్ చేసి.. ముందుగా గ్రీస్ చేసి ఉంచుకున్న కేక్ టిన్‌లోకి వేడి మిశ్రమాన్ని పోయాలి. గది ఉష్ణోగ్రత వద్ద పూర్తిగా చల్లారే వరకు కదపకుండా ఉంచాలి.
పూర్తిగా చల్లారిన తర్వాత ఈ టిన్‌ను 2 నుండి 3 గంటల పాటు ఫ్రిజ్‌లో పెట్టాలి. ఫ్రిజ్ నుండి తీశాక చాకుతో అంచులను తేలికగా విడిపించి, పైనుంచి ఒక ప్లేట్ పెట్టి రివర్స్ చేస్తే జున్ను కేక్‌లా సులభంగా ఊడి బయటకు వస్తుంది. మీకు నచ్చిన సైజులో ముక్కలుగా కట్ చేసుకోవాలి. అంతే, నోరూరించే చల్లచల్లని 'కొబ్బరి జున్ను' సిద్ధం! ప్లేట్‌లో పెట్టి ముక్క కోస్తుంటే జెల్లీలా కదులుతూ, నోట్లో వేస్తే కొబ్బరిపాల కమ్మదనంతో వెన్నలా కరిగిపోతూ సరికొత్త డెసర్ట్ అనుభూతినిస్తుంది!