సిలిండర్లో గ్యాస్ ఎంత ఉందో తెలియక ఇబ్బంది పడుతున్నారా? ఈ చిన్న ట్రిక్స్తో చిటికెలో కనిపెట్టేయండి!
సిలిండర్ బరువును బట్టి లోపల గ్యాస్ ఎంత ఉందో అంచనా వేయడం కొన్నిసార్లు కష్టమవుతుంది. ముఖ్యంగా వంట మధ్యలో గ్యాస్ అయిపోతే వచ్చే ఇబ్బంది అంతా ఇంతా కాదు. అందుకే సిలిండర్లో గ్యాస్ ఎంత ఉందో ముందుగానే తెలుసుకోవటం మంచిది. మీ ఎల్పిజి (LPG) సిలిండర్లో గ్యాస్ లెవల్ను సులభంగా తెలుసుకునే కొన్ని పద్ధతులు ఇక్కడ ఉన్నాయి. సిలిండర్ అడుగు భాగాన్ని లేదా బరువును బట్టి చూసే పాత పద్ధతుల కంటే ఇక్కడ చూపించే కొన్ని సింపుల్ ట్రిక్స్ చాలా ప్రభావవంతంగా పనిచేస్తాయి. దీంతో మీరు సడెన్గా గ్యాస్ అయిందని టెన్షన్ పడాల్సిన పనిలేకుండా పోతుంది.
వంట చేస్తున్నప్పుడు అకస్మాత్తుగా గ్యాస్ అయిపోతే వచ్చే చిరాకు మామూలుగా ఉండదు. సిలిండర్ ఇనుముతో చేసినది కావడంతో లోపల గ్యాస్ లెవల్ బయటకు కనిపించదు. అయితే, కొన్ని సింపుల్ హ్యాక్స్ (Hacks) ద్వారా గ్యాస్ ఎంత మిగిలి ఉందో మనం సులభంగా తెలుసుకోవచ్చు.
తడి బట్ట ట్రిక్ (అత్యంత ప్రభావవంతమైనది): ఒక కాటన్ బట్టను నీళ్లలో తడిపి, సిలిండర్ చుట్టూ తుడవండి. సిలిండర్ మొత్తం తడిగా మారిన తర్వాత ఒక నిమిషం పాటు వేచి చూడండి. గ్యాస్ లేని పైన ఉన్న ఖాళీ భాగం చాలా త్వరగా ఆరిపోతుంది. కానీ, లోపల గ్యాస్ ఉన్న భాగం మాత్రం తడిగా లేదా చల్లగా ఉంటుంది. ద్రవ రూపంలో ఉండే గ్యాస్ వేడిని గ్రహించడం వల్ల ఆ భాగం ఆరడానికి సమయం పడుతుంది. ఈ రేఖను బట్టి గ్యాస్ ఎంత ఉందో చెప్పవచ్చు.
గ్యాస్ లెవల్ ఇండికేటర్లు: ప్రస్తుతం మార్కెట్లో గ్యాస్ లెవల్ ఇండికేటర్లు సులభంగా లభిస్తున్నాయి. ఇవి ఒక చిన్న మ్యాగ్నెటిక్ స్ట్రిప్ లా ఉంటాయి. వీటిని సిలిండర్ కు అంటిస్తే, లోపల ఉన్న గ్యాస్ పరిమాణాన్ని బట్టి రంగు మారుతాయి.
మంట రంగును గమనించండి: సాధారణంగా గ్యాస్ స్టవ్ మంట నీలం రంగులో ఉంటుంది. కానీ, సిలిండర్ లోపల గ్యాస్ నిల్వలు తక్కువగా ఉన్నప్పుడు లేదా ప్రెజర్ తగ్గినప్పుడు మంట రంగు పసుపు లేదా ఎరుపు రంగులోకి మారుతుంది. ఇది గ్యాస్ అయిపోవడానికి సిద్ధంగా ఉందనడానికి ఒక ప్రధాన సంకేతం.
వేడి నీళ్ల పద్ధతి: సిలిండర్ పక్క నుండి కొద్దిగా వేడి నీళ్లను పోయండి. ఆ తర్వాత చేత్తో తాకి చూస్తే.. గ్యాస్ లేని భాగం వేడిగా ఉంటుంది, గ్యాస్ ఉన్న భాగం చల్లగా అనిపిస్తుంది. వంట గదిలో ఇలాంటి చిన్న చిన్న జాగ్రత్తలు పాటించడం వల్ల సమయానికి గ్యాస్ బుక్ చేసుకోవడానికి వీలవుతుంది. అయితే, గ్యాస్ అయిపోయే వరకు వేచి ఉండకుండా ఎప్పుడూ ఒక బ్యాకప్ సిలిండర్ ఉంచుకోవడం ఉత్తమం.