గ్రీన్ టీ vs బ్లాక్ టీ.. బరువు తగ్గడానికి ఏది బెస్ట్..? ఈ తప్పులు చేశారో కథ మళ్లీ మొదటికే..
Green Tea vs Black Tea: నేటి కాలంలో బరువు తగ్గడం అనేది చాలా మందికి ఒక పెద్ద టాస్క్గా మారింది. ఈ వెయిట్ లాస్ జర్నీలో ఎక్కువ మంది ఆశ్రయించేది హెల్తీ డ్రింక్స్నే. ముఖ్యంగా బరువు తగ్గాలనుకునే వారు గ్రీన్ టీ లేదా బ్లాక్ టీ తాగడానికి ఇష్టపడతారు. అయితే ఈ రెండింటిలో ఏది బరువు తగ్గడానికి మెరుగ్గా పనిచేస్తుంది. అసలు వీటిలో ఏ చాయ్ ఎంచుకోవాలి అనే విషయంలో చాలా మందికి సందేహాలు ఉంటాయి.
గ్రీన్ టీ విషయానికి వస్తే.. ఇందులో ఉండే యాంటీ ఆక్సిడెంట్లు బరువు తగ్గడంలో కీలక పాత్ర పోషిస్తాయి. ముఖ్యంగా గ్రీన్ టీలో ఎపిగాలోకాటెచిన్ గాలెట్ అనే శక్తివంతమైన యాంటీ ఆక్సిడెంట్ ఉంటుంది. ఇది శరీరంలోని సహజ కెఫిన్తో కలిసినప్పుడు మెటబాలిజం రేటును ఒక్కసారిగా పెంచుతుంది. ఎవరైతే క్రమం తప్పకుండా వర్కవుట్స్ చేస్తూ గ్రీన్ టీ తాగుతారో.. వారి శరీరంలో ఫ్యాట్ బర్నింగ్ ప్రక్రియ చాలా వేగంగా, సమర్థవంతంగా జరుగుతుందని నిపుణులు చెబుతున్నారు.
మరోవైపు ఎప్పటి నుంచో ఉదయాన్నే పాలు, చక్కెర లేకుండా కాస్త స్ట్రాంగ్గా ఉండే డికాషన్ తాగే అలవాటు ఉన్నవారికి బ్లాక్ టీ ఒక అద్భుతమైన ప్రత్యామ్నాయం. బ్లాక్ టీ తయారీలో ఆకులు ఎక్కువగా ఆక్సిడైజ్ అవుతాయి. దీనివల్ల అందులో థెయాఫ్లావిన్స్, థెయారుబిగిన్స్ వంటి కాంప్లెక్స్ ఫ్లేవనాయిడ్స్ ఏర్పడతాయి. ఇవి శరీరంలో కొవ్వును శోషించుకునే ప్రక్రియను సో చేయడంతో పాటు పొట్ట చుట్టూ పేరుకుపోయిన మొండి కొవ్వును కరిగించడంలో సహాయపడతాయి.
అయితే కేవలం గ్రీన్ టీ లేదా బ్లాక్ టీ తాగడం వల్లే రాత్రికి రాత్రే మ్యాజిక్ జరిగి బరువు తగ్గిపోరనే నిజాన్ని గ్రహించాలి. ఈ రెండు పానీయాలు కూడా శరీరంలో ఫ్యాట్ బర్నింగ్ ప్రాసెస్ను కేవలం వేగవంతం మాత్రమే చేయగలవు. సరైన డైట్ కంట్రోల్, పోషకాలతో కూడిన ఆహారం, రోజువారీ శారీరక శ్రమ తోడుగా ఉన్నప్పుడు మాత్రమే ఈ చాయ్లు బరువు తగ్గించడంలో పూర్తిస్థాయిలో ప్రభావం చూపిస్తాయి.
ఈ హెల్త్ డ్రింక్స్ తాగేటప్పుడు కొన్ని ముఖ్యమైన నియమాలను ఖచ్చితంగా పాటించాలి. బరువు తగ్గడమే లక్ష్యంగా పెట్టుకున్నప్పుడు ఈ టీలలో ఎలాంటి చక్కెర కానీ, పాలు కానీ అస్సలు కలపకూడదు. ఎందుకంటే పాలు, చక్కెర యాడ్ చేయడం వల్ల టీలో ఉండే యాంటీ ఆక్సిడెంట్ల ప్రభావం తగ్గిపోవడమే కాకుండా శరీరంలో క్యాలరీలు పెరిగిపోతాయి. అలాగే ఉదయాన్నే ఖాళీ కడుపుతో చాలా స్ట్రాంగ్ బ్లాక్ టీ లేదా గ్రీన్ టీ తాగడం వల్ల కొందరిలో ఎసిడిటీ, వికారం వంటి సమస్యలు రావచ్చు. కాబట్టి ఉదయం తేలికపాటి ఆహారం లేదా స్నాక్స్ తీసుకున్న తర్వాత వీటిని తాగడం సురక్షితం.
చివరగా, గ్రీన్ టీ, బ్లాక్ టీ రెండూ కూడా వాటి వాటి పద్ధతుల్లో బరువు తగ్గడానికి ఎంతో మేలు చేస్తాయి. మీ శరీర తత్వానికి ఏది బాగా సెట్ అవుతుందో గమనించి, మీ లైఫ్ స్టైల్కు తగ్గట్టుగా సరైన చాయ్ని ఎంచుకోవాలి. కాబట్టి ఇంకెందుకు ఆలస్యం, మీ వెయిట్ లాస్ లక్ష్యాలకు అనుగుణంగా ఈ రోజు నుంచే ఒక కప్పు హెల్తీ టీని మీ దినచర్యలో భాగం చేసుకోండి.