Fish Fry: రెస్టారెంట్ స్టైల్లో ఫిష్ ఫ్రై.. ఈ చిట్కాలు పాటిస్తే మీ వంట హిట్టే..
ఆదివారం వచ్చిందంటే చాలు నాన్వెజ్ ప్రియుల ఇళ్లల్లో ముక్క లేనిదే ముద్ద దిగదు. చికెన్, మటన్ కంటే కూడా చాలా మంది ఎంతో ఇష్టంగా తినేది చేపల కూర (Fish Curry). చేపల కూర కేవలం రుచిలోనే కాదు, ఆరోగ్య పరంగా కూడా ఎంతో మేలు చేస్తుంది. అయితే, చికెన్ వండటం సులభమే కానీ చేపల కూర వండటం ఒక పెద్ద ఆర్ట్.
చాలా మంది ఇళ్లల్లో చేపల కూర వండేటప్పుడు ముక్కలు విడిపోవడం, నలిగిపోవడం లేదా కూర నీచు వాసన రావడం వంటి సమస్యలు ఎదురవుతుంటాయి. ఎంత ప్రయత్నించినా హోటల్ లేదా రెస్టారెంట్లలో దొరికే చేపల కూర లాంటి పర్ఫెక్ట్ టెక్స్చర్, గ్రేవీ ఇంట్లో కుదరదు. కానీ కొన్ని సింపుల్ కిచెన్ టిప్స్ పాటిస్తే చేప ముక్క అస్సలు విడిపోకుండా, నోరూరించే రెస్టారెంట్ రుచితో ఇంట్లోనే ఈజీగా వండవచ్చు. ఆ రహస్యాలు ఏంటో ఇప్పుడు చూద్దాం.
చేపల కూర పర్ఫెక్ట్గా రావడానికి మొదటి మెట్టు వాటిని శుభ్రం చేయడం. చేపలను మార్కెట్ నుండి తెచ్చిన తర్వాత కేవలం నీటితో కడిగితే నీచు వాసన అస్సలు పోదు. అందుకే చికెన్ ముక్కల్లా కాకుండా, చేప ముక్కలను కడిగేటప్పుడు కొద్దిగా ఉప్పు (కల్లుప్పు), పసుపు మరియు కాస్త మజ్జిగ లేదా నిమ్మరసం వేసి బాగా కలపాలి. ఆ తర్వాత రెండు మూడు సార్లు చల్లని నీటితో కడిగితే చేపల శ్లేష్మం (జిగురు), నీచు వాసన పూర్తిగా తొలగిపోతాయి.
చేపల కూరలో ముక్కలు సాఫ్ట్గా ఉంటూనే, విడిపోకుండా ఉండాలంటే ఒక అద్భుతమైన కిచెన్ హ్యాక్ ఉంది. కూర వండటానికి కనీసం 15 నిమిషాల ముందే చేప ముక్కలకు కొద్దిగా పసుపు, కారం, ఉప్పు మరియు ఒక స్పూన్ ఆయిల్ లేదా నిమ్మరసం పట్టించి పక్కన పెట్టుకోవాలి (మారినేషన్). ఇలా చేయడం వల్ల ముక్కలకు ఉప్పు, కారం బాగా పట్టడమే కాకుండా, ఉడికేటప్పుడు ముక్క గట్టిగా ఉండి విడిపోకుండా ఉంటుంది.
అలాగే, చేపల కూరను ఎప్పుడూ ఇరుకైన పాత్రలలో కాకుండా, వెడల్పాటి గిన్నెలో (చేపల చట్టి) మాత్రమే వండాలి. దీనివల్ల ముక్కలు ఒకదానిపై ఒకటి పడకుండా సమానంగా ఉడుకుతాయి. చేపల కూర వండేటప్పుడు చేసే అతిపెద్ద పొరపాటు... కూరను గరిటెతో పదే పదే తిప్పడం. చేప ముక్కలు ఎంతో సున్నితంగా ఉంటాయి కాబట్టి గరిటె తగిలితే వెంటనే విడిపోతాయి. అందుకే చింతపండు పులుసు పోసిన తర్వాత గిన్నెను రెండు వైపులా పట్టుకుని చేతులతోనే గుండ్రంగా తిప్పాలి (టాసింగ్) తప్ప గరిటె అస్సలు పెట్టకూడదు.
ఒకవేళ ముక్కలను తిరగేయాల్సి వస్తే సన్నటి చెక్క గరిటెను మాత్రమే వాడాలి. కూరను ఎల్లప్పుడూ మీడియం నుండి లో-ఫ్లేమ్పై మాత్రమే ఉడికించాలి. చివరగా కూర ఉడికిన తర్వాత స్టవ్ ఆపి కనీసం అరగంట పాటు అలాగే వదిలేయాలి. చేపల కూర ఎప్పుడూ చల్లారిన తర్వాతే ముక్కకు పులుసు పట్టి అద్భుతమైన రుచిని ఇస్తుంది.