Expensive Fruits: ప్రపంచంలోనే అత్యంత ఖరీదైన పండ్లు.. వీటికి బదులు బంగారం కొనుక్కోవచ్చు
ప్రకృతి మనిషికి అనేక రకాల వస్తువులను ఉచితంగా ఇచ్చింది. వాటిల్లో అనేక రకాల పండ్లు కూడా ఉన్నాయి. అదే సమయంలో కొన్ని రకాల పండ్లు కొనాలంటే లక్షలు చెల్లించాల్సి ఉంటుంది. అంటే సామాన్యులు ఈ పండ్లని తినాలని కోరుకోవడం అటు ఉంచి కనీసం చూడాలని కూడా కోరుకోలేరు. ఎందుకంటే ఆ పండ్ల ఖరీదు లక్షల్లో ఉంటాయి. వీటి ఖరీదు వింటే కొనకుండానే కడుపు నిండిపోతుంది. లక్షల రూపాయల విలువైన కొన్ని పండ్లు ప్రపంచంలోనే అత్యంత ఖరీదైన పండ్లుగా నిలిచాయి. ఇవి శరీరానికి అవసరమైన పోషకాలను అందిస్తాయి. కనుక ఎక్కువగా అందరూ ఈ పండ్లు తినడానికి ఇష్టపడతారు. అవి ఏమిటో తెలుసుకుందాం..
యుబారి కింగ్ మెలోన్: యుబారి కింగ్ మెలోన్ ప్రపంచంలోనే అత్యంత ఖరీదైన పండు. అత్యంత ఖరీదైన పండు జపనీస్ ద్వీపం హక్కైడో ద్వీపంలో ఉన్న యుబారి నగరంలో మాత్రమే సాగు చేస్తారు. ధనవంతులు తమ సంపదను చూపించడానికి ఈ పండ్లను కొనుగోలు చేస్తారు. 2019లో యుబారి కింగ్ మెలోన్ జత $46,500 (రూ. 39 లక్షలు)కి విక్రయించబడింది. అంటే ఒక్క పండు ధర రూ.19.5 లక్షలు.
రూబీ రోమన్ ద్రాక్ష: రూబీ రోమన్ ద్రాక్ష ప్రపంచంలో రెండవ అత్యంత ఖరీదైన పండు. యుబారి కింగ్ మెలోన్ లాగా.. ఈ అరుదైన ద్రాక్ష జపాన్‌లో మాత్రమే లభిస్తుంది. 26 ప్రీమియం క్లాస్ రూబీ రోమన్ ద్రాక్షను కొనుగోలు చేయాలంటే సుమారు 8,400 డాలర్లు అంటే రూ. 6,99,699 చెల్లించాల్సి ఉంటుంది.
డెన్సుకే పుచ్చకాయ: ఇది ప్రపంచంలోనే మూడవ అత్యంత ఖరీదైన పండు. ఇది కూడా జపాన్ లోని హక్కైడోలో పండుతుంది. దీనిని నల్ల పుచ్చకాయ అని కూడా అంటారు. ఈ భారీ పండ్లు 11 కిలోల వరకు బరువు ఉంటాయి. ఎంతో తియ్యగా ఉండే ఈ పుచ్చకాయకు చారలు ఉండవు. 2008లో ఈ పుచ్చకాయ రూ.5 లక్షలకు పైగా అమ్ముడయింది.
మియాజాకి మామిడి: ప్రపంచంలో నాల్గవ అత్యంత ఖరీదైన పండు. ఇవి మామిడి పండ్లలో ప్రత్యేక రకాలు. వీటిని కూడా జపాన్ లోనే సాగు చేస్తారు. అవి ముదురు ఎరుపు రంగులో రుచిలో ఎంతో తియ్యగా ఉంటాయి. భారీ పరిమాణంలో ఉంటాయి. ఈ మామిడి పండు సగటు ధర రూ.3 లక్షలకు పైగా పలుకుతోంది.
హెలికాన్ పైనాపిల్: ఇది ప్రపంచంలోనే అత్యంత ఖరీదైన పైనాపిల్. ప్రపంచంలో 5వ అత్యంత ఖరీదైన పండు. ఇంగ్లండ్‌లోని ‘లాస్ట్ గార్డెన్ ఆఫ్ హెలిగాన్’లో లభించే ఈ రకం పైనాపిల్ ధర రూ.లక్ష కంటే ఎక్కువ.