చేదు లేకుండా రెస్టారెంట్ స్టైల్ ఆలూ మేతీ మసాలా కర్రీ.. చపాతీ, పులావ్‌లోకి సూపర్ కాంబినేషన్
ఆకుకూరల్లో అత్యంత శక్తివంతమైన పోషకాలు, ఔషధ గుణాలు కలిగిన వాటిలో మెంతికూర ముఖ్యమైనది. అయితే మెంతిలోని సహజ చేదుదనం వల్ల పిల్లలు దీన్ని తినడానికి మారాం చేస్తుంటారు. అలాంటప్పుడు దాబా శైలిలో బంగాళాదుంపలు, టమాటా ప్యూరీ మరియు చిలికిన పెరుగుతో కలిపి 'ఆలూ మేతీ మసాలా కర్రీ' చేస్తే.. చేదు అనేది అస్సలు తెలియకపోగా ప్లేట్ మొత్తం క్షణాల్లో ఖాళీ అయిపోతుంది. రోజూ రొటీన్ కూరలు తిని బోర్ కొట్టినప్పుడు చపాతీలు, పూరీలు, బగారా రైస్ లేదా జీరా రైస్‌లోకి ఇది ఒక అద్భుతమైన సైడ్ డిష్.
కావలసిన పదార్థాలు: పావు కిలో తాజా మెంతికూర, 2 మీడియం సైజు బంగాళాదుంపలు, సన్నగా తరిగిన 1 పెద్ద ఉల్లిపాయ, 2 మీడియం సైజు టమాటాలు , అర టీస్పూన్ తాజా అల్లం-వెల్లుల్లి పేస్ట్, తాజా పెరుగు లేదా ఫ్రెష్ క్రీమ్, పావు టీస్పూన్ పసుపు, 2 టీస్పూన్ల కారం పొడి, 1 టీస్పూన్ ధనియాల పొడి, అర టీస్పూన్ గరం మసాలా పొడి, అర టీస్పూన్ జీలకర్ర, బిర్యానీ ఆకు 1, చిన్న దాల్చినచెక్క, లవంగాలు 3, యాలకులు 2, 2 పచ్చిమిరపకాయలు చీలికలు, రుచికి సరిపడా సాల్ట్, 2 టేబుల్ స్పూన్ల వంట నూనె, నీళ్లు – అర కప్పు
తయారీ విధానం: పావు కిలో మెంతికూరలోని ఆకులను వేరు చేసి నీటిలో శుభ్రంగా కడిగి చాలా సన్నగా తరగాలి. బంగాళాదుంపల చెక్కు తీసి చిన్న ముక్కలుగా కట్ చేసుకుని నల్లబడకుండా నీళ్ల గిన్నెలో ఉంచుకోవాలి. 2 టమాటాలను మిక్సీ జార్‌లో గ్రైండ్ చేసి ప్యూరీ సిద్ధం చేసుకోవాలి.
స్టవ్‌పై పాన్ పెట్టి 2 టేబుల్ స్పూన్ల నూనె వేడిచేయాలి. నూనె కాగిన తర్వాత అర టీస్పూన్ జీలకర్ర, బిర్యానీ ఆకు, దాల్చినచెక్క, లవంగాలు, యాలకులు వేసి వేయించాలి. ఆ తర్వాత సన్నగా తరిగిన ఉల్లిపాయ ముక్కలు, పచ్చిమిర్చి వేసి లేత బంగారు రంగు వచ్చేవరకు వేపాలి. ఉల్లిపాయలు వేగాక అర టీస్పూన్ అల్లం-వెల్లుల్లి పేస్ట్ వేసి పచ్చివాసన పోయేలా 1 నిమిషం వేయించాలి.
ఇప్పుడు టమాటా ప్యూరీ వేసి నూనె పైకి తేలే వరకు 2-3 నిమిషాలు వేపాలి. నూనె తేలిన తర్వాత బంగాళాదుంప ముక్కలను వేసి కలిపి.. మూతపెట్టి లో-మీడియం మంటపై బంగాళాదుంప ముక్కలు చేత్తో నొక్కితే మెత్తగా నలిగేంత వరకు మధ్యమధ్యలో కలుపుతూ ఉడికించాలి.
ఆలూ ముక్కలు మెత్తబడ్డాక పావు టీస్పూన్ పసుపు, 2 టీస్పూన్ల కారం, సరిపడా ఉప్పు, 1 టీస్పూన్ ధనియాల పొడి, అర టీస్పూన్ గరం మసాలా పొడి వేసి లో ఫ్లేమ్‌పై బాగా కలపాలి. మసాలాలు నూనెలో వేగిన వెంటనే సన్నగా తరిగిన మెంతికూరను వేసి కలపాలి. మూతపెట్టి లో ఫ్లేమ్‌పై 2 నిమిషాలు మగ్గిస్తే మెంతికూర నూనెలో వేగి చేదుదనం పూర్తిగా తగ్గిపోతుంది. మెంతికూర మగ్గిన తర్వాత మిక్సీలో చిలికిన పావు కప్పు తాజా పెరుగు (లేదా మీగడ/క్రీమ్) వేసి వేగంగా కలపాలి. ఆ తర్వాత గ్రేవీ కన్సిస్టెన్సీకి తగినట్లుగా అర కప్పు నీళ్లు పోసి కలపాలి.
మూతపెట్టి మీడియం మంటపై 3 నుండి 4 నిమిషాల పాటు నూనె అంచుల వెంట పైకి తేలే వరకు ఉడికించాలి. గ్రేవీ మరీ చిక్కగా కాకుండా, మరీ పల్చగా కాకుండా సరైన కన్సిస్టెన్సీకి రాగానే స్టవ్ ఆఫ్ చేయాలి. అంతే, నోరూరించే రెస్టారెంట్ స్టైల్ 'ఆలూ మేతీ మసాలా కర్రీ' సిద్ధం! వేడివేడి చపాతీలు, రోటీలు, పూరీలు లేదా బగారా రైస్, జీరా రైస్‌లోకి ఈ కూర వడ్డిస్తే మెంతికూర చేదు ఏమాత్రం లేకుండా, కమ్మటి గ్రేవీ రుచితో పిల్లలు సైతం లొట్టలేసుకుంటూ తింటారు!