Year Ender 2022: టెస్ట్ క్రికెట్‌లో ఈ ఏడాది బౌలర్లదే ఆధిపత్యం.. టాప్ 10 లిస్టులో టీమిండియా ప్లేయర్లకు నో ఛాన్స్..
Top 10 Bowlers in 2022: ఈ సంవత్సరం టెస్ట్ క్రికెట్‌లో ఫాస్ట్ బౌలర్లు ఆధిపత్యం చెలాయించారు. ఇప్పటి వరకు అత్యధిక వికెట్లు పడగొట్టిన టాప్-10 బౌలర్లు ఎవరో తెలుసుకుందాం..
Year Ender 2022: క్రికెట్‌లో టెస్టుకు అత్యున్నత హోదా ఎప్పటికీ ఉంటుందనడంలో ఎలాంటి సందేహం లేదు. ఈ ఫార్మాట్‌లో బ్యాట్స్‌మెన్స్, బౌలర్ల ఆధిపత్యాన్ని చూడొచ్చు. ఒక్కోసారి బౌలర్లు మ్యాచ్ మొత్తాన్ని మలుపు తిప్పేస్తుంటారు. ఈ ఏడాది ఇప్పటి వరకు చాలా మంది బౌలర్లు టెస్టులో తమ సత్తా చాటారు. ఇందులో ఆఫ్రికన్ ఫాస్ట్ బౌలర్ కగిసో రబాడ నంబర్‌ వన్‌గా నిలిచాడు. ఈ ఏడాది ఇప్పటివరకు టెస్టుల్లో అత్యధిక వికెట్లు పడగొట్టాడు. 2022లో టెస్టుల్లో అత్యధిక వికెట్లు తీసిన టాప్ 10 బౌలర్లు ఎవరో ఇప్పుడు చూద్దాం..
1. కగిసో రబడ: 2022లో ఇప్పటివరకు అత్యధిక టెస్టు వికెట్లు తీసిన ఆటగాళ్లలో కగిసో రబడ నంబర్‌వన్‌గా నిలిచాడు. అతను ఇప్పటివరకు 8 మ్యాచ్‌ల్లో 14 ఇన్నింగ్స్‌లలో 20.04 సగటుతో 45 వికెట్లు పడగొట్టాడు.
2. నాథన్ లియోన్: 2022లో టెస్టుల్లో అత్యధిక వికెట్లు తీసిన ఆటగాళ్లలో ఆస్ట్రేలియా స్పిన్నర్ నాథన్ లియాన్ రెండో స్థానంలో ఉన్నాడు. అతను ఇప్పటివరకు 10 మ్యాచ్‌లు ఆడి 17 ఇన్నింగ్స్‌ల్లో 29.18 సగటుతో మొత్తం 43 వికెట్లు తీశాడు.
3. జాక్ లీచ్: ఇంగ్లండ్ స్పిన్నర్ జాక్ లీచ్ 2022లో అత్యధిక టెస్టు వికెట్లు తీసిన జాబితాలో మూడో స్థానంలో ఉన్నాడు. అతను ఇప్పటివరకు 14 మ్యాచ్‌ల్లో 23 ఇన్నింగ్స్‌లలో 39.44 సగటుతో 43 వికెట్లు తీశాడు.
4.స్టువర్ట్ బ్రాడ్: ఇంగ్లిష్ ఫాస్ట్ బౌలర్ స్టువర్ట్ బ్రాడ్ ఈ ఏడాది 9 టెస్టుల్లో 17 ఇన్నింగ్స్‌లలో 25.75 సగటుతో 40 వికెట్లు పడగొట్టాడు.
5. జేమ్స్ ఆండర్సన్: ఇంగ్లండ్ వెటరన్ ఫాస్ట్ బౌలర్ జేమ్స్ ఆండర్సన్ ఈ ఏడాది టెస్టు క్రికెట్‌లో 19.80 సగటుతో 36 వికెట్లు పడగొట్టాడు.
6.మార్కో జెన్సన్: ఆఫ్రికన్ ఫాస్ట్ బౌలర్ మార్కో జాన్సెన్ 2022లో టెస్ట్ క్రికెట్‌లో బౌలింగ్ చేస్తూ ఇప్పటివరకు 35 వికెట్లు పడగొట్టాడు. 7 మ్యాచ్‌ల్లో 12 ఇన్నింగ్స్‌ల్లో ఈ వికెట్లు పడగొట్టాడు. అతని సగటు 17.02గా నిలిచింది.
7. పాట్ కమిన్స్: ఆస్ట్రేలియా ఫాస్ట్ బౌలర్ పాట్ కమిన్స్ 2022లో ఇప్పటివరకు టెస్టు క్రికెట్‌లో 35 వికెట్లు పడగొట్టాడు. 9 మ్యాచ్‌లు ఆడి 21.02 సగటుతో 15 ఇన్నింగ్స్‌ల్లో ఈ వికెట్లు తీశాడు.
8. మిచెల్ స్టార్క్: ఎడమచేతి వాటం ఆస్ట్రేలియన్ ఫాస్ట్ బౌలర్ 2022లో 10 టెస్టుల 19 ఇన్నింగ్స్‌లలో 27.59 సగటుతో 32 వికెట్లు పడగొట్టాడు.
9. ప్రభాత్ జయసూర్య: శ్రీలంక స్పిన్నర్ ప్రభాత్ జయసూర్య ఈ ఏడాది టెస్టు క్రికెట్‌లో ఇప్పటివరకు 29 వికెట్లు పడగొట్టాడు. అతను 3 మ్యాచ్‌ల్లో 20.37 సగటుతో కేవలం 6 ఇన్నింగ్స్‌ల్లోనే ఈ వికెట్ల‌ను తీశాడు.
10. అల్జారీ జోసెఫ్: వెస్టిండీస్ ఫాస్ట్ బౌలర్ అల్జారీ జోసెఫ్ 2022లో ఇప్పటివరకు 7 టెస్టుల్లో 14 ఇన్నింగ్స్‌లలో 30.85 సగటుతో 27 వికెట్లు పడగొట్టాడు.