Silk Smitha: సిల్క్ స్మిత కథతో మరో సినిమా..ఆసక్తికరంగా గ్లింప్స్..
కొన్ని కథలు.. కొందరి జీవితాలు ఎప్పుడూ ట్రెండింగే..! ఎన్నిసార్లు చూసినా.. ఎన్నిసార్లు చదివినా ఇంకా ఏదో కొత్త విషయం ఉందేమో.. ఇంకేదైనా మిస్ అయ్యామేమో అనిపిస్తుంది. అలాంటి కథ, అలాంటి జీవితం సిల్క్ స్మిత సొంతం. అందుకే ఆమె జీవితంపై మరో సినిమా వస్తుంది. మరి ఈసారి ఎవరు బయోపిక్ తీస్తున్నారు..? వాళ్లేం కొత్తగా చూపించబోతున్నారు..?
సిల్క్ స్మిత.. పరిచయం అక్కర్లేని పేరు. 80, 90 దశకాల్లో ఈమె పేరు వినిపిస్తే చాలు సినిమా థియేటర్స్ నిండిపోయేవి. సిల్క్ బొమ్మ స్క్రీన్ మీద కనిపిస్తే కలెక్షన్లు వాటంతటవే వచ్చేవి. ఆమె లేకపోతే కనీసం సినిమాలు కూడా కొనేవాళ్లు కాదు బయ్యర్లు. అలాంటి ఇమేజ్ సొంతం చేసుకుని.. చివరికి ఒంటరిగా జీవితాన్ని చాలించారు సిల్క్ స్మిత.
సిల్క్ స్మిత జీవితంపై ఇప్పటికే కొన్ని బయోపిక్స్ వచ్చాయి. అందులో అందరికీ గుర్తుండిపోయే సినిమా డర్టీ పిక్చర్. 2011లో విద్యా బాలన్ హీరోయిన్గా వచ్చిన ఈ చిత్రం సంచలనం సృష్టించింది. అయితే ఇది ఒరిజినల్ స్టోరీ కాదని.. సిల్క్ జీవితాన్ని తప్పుగా చూపించారనే వాళ్లు లేకపోలేదు.
ఆ తర్వాత క్లైమాక్స్ అనే సినిమా కూడా సిల్క్ కథతోనే వచ్చింది. అయితే ఈ సినిమా అంతగా ఆకట్టుకోలేకపోయింది. మరోసారి సిల్క్ స్మిత కథతో ఓ సినిమా తెరకెక్కుతుంది. దీన్ని తాజాగా ప్రకటించారు మేకర్స్.
డిసెంబర్ 2న సిల్క్ స్మిత జయంతి సందర్భంగా ఆమె బయోపిక్ ప్రకటించారు. సిల్క్ స్మిత పేరుతోనే రానున్న ఈ సినిమాలో చంద్రికా రవి టైటిల్ రోల్ పోషిస్తున్నారు. జయరామ్ దర్శకుడు.
తాజాగా వచ్చిన ఈ సినిమా గ్లింప్స్ ఆసక్తికరంగా ఉంది. ప్రేక్షకులను కూడా ఆకట్టుకుంది. సిల్క్ ఒరిజినల్ బయోపిక్ ఇదే అంటున్నారు మేకర్స్. మరి ఈ సినిమా ఎలాంటి ఇంపాక్ట్ క్రియేట్ చేస్తుందో చూడాలి.