Events: ఆలోచనలు మారుతున్నాయా.? భారీ ఈవెంట్స్ ఆంధ్ర బాట పట్టనున్నాయా.?
తెలుగు ఇండస్ట్రీ హైదరాబాద్‌లో పాతుకుపోయింది.. ఇక్కడ్నుంచి కదలడం అనేది దాదాపు అసాధ్యం. కానీ ఇప్పుడు జరుగుతున్న పరిస్థితులు చూసాక.. సినీ పెద్దల్లో ఏమైనా ఆలోచనలు మారుతున్నాయా..? భారీ ఈవెంట్స్ ఏపీలో ఎక్కువ జరిగే వీలుందా..? ఇక్కడ అనుమతులు కష్టమనా.. అక్కడైతే ఈజీగా వస్తాయనా..? అసలేం జరుగుతుంది..? ఎక్స్‌క్లూజివ్‌గా చూద్దాం..
ప్రీ రిలీజ్ ఈవెంట్‌లకు కేరాఫ్ అడ్రస్ హైదరాబాద్. ఎంత పెద్ద సినిమా వేడుకలైనా భాగ్య నగరంలోనే జరగడం ఆనవాయితీ. కొన్నేళ్లుగా ఒకటి తెలంగాణలో.. మరోటి ఏపీలో చేస్తూ వస్తున్నారు మేకర్స్. అయితే తాజాగా ఏపీలో సినిమా ఈవెంట్స్ ఎక్కువవుతున్నాయి.. అక్కడ వేడుకలు చేసుకోడానికి ఆసక్తి చూపిస్తున్నారు దర్శక నిర్మాతలు.
గేమ్ ఛేంజర్ మూవీ టీం ఏపీలో రాజమండ్రిలో జనవరి 4న భారీ ప్రీ రిలీజ్ ఈవెంట్ ప్లాన్ చేసింది. దీనికి పవన్ కళ్యాణ్ ముఖ్య అథితిగా వస్తున్నారు. అయితే హైదరాబాద్‌లోనూ ఈ మూవీ వేడుక ఒకటి చేయనున్నారు.
ఇక బాలయ్య, బాబీ కాంబోలో రూపొందుతున్న డాకూ మహరాజ్ ఈవెంట్స్ రెండూ కూడా ఏపీలోనే జరగనున్నట్లు తెలుస్తుంది. ఇందులో జనవరి 8న ఓ ఈవెంట్ ఏపీలో ఉందని తెలిపారు చిత్ర నిర్మాత సూర్య దేవర నాగవంశీ.
దేవర ప్రీ రిలీజ్ ఈవెంట్‌కు పర్మిషన్ ఇచ్చినా కూడా లెక్కకు మించి అభిమానులు రావడంతో చివరి నిమిషంలో అది రద్దు అయిపోయింది. ఇక ప్రీమియర్స్‌కు అనుమతులు ఇచ్చిన తర్వాత.. సంధ్య థియేటర్ దగ్గర జరిగిన తొక్కిసలాట ఇండస్ట్రీపై భారీ ఎఫెక్ట్ చూపించింది. ఈ రెండు ఘటనల తర్వాత కొన్ని పరిస్థితులు మారిపోయాయి.. అందుకే అనుమతులు కాస్త కష్టం అవుతున్నాయి.
అనుమతులు వచ్చినా.. అందులో చాలా కండీషన్స్ కనిపిస్తున్నాయి. అందుకే ఇక్కడ పరిస్థితులు కూల్ అయ్యే వరకు ఏపీలోనే ఎక్కువగా సినిమా ఈవెంట్స్ చేయాలని చూస్తున్నారు మేకర్స్. గేమ్ ఛేంజర్ ఈవెంట్ USAలో ఇప్పటికే పూర్తైంది.. డాకూ మహరాజ్ ఈవెంట్ USAలో జనవరి 4న చేస్తున్నారు. మొత్తానికి ఈ పరిస్థితులు ఇంకొన్ని రోజులు కంటిన్యూ అయ్యే అవకాశం లేకపోలేదు.