Best Mileage Cars: మార్కెట్లో దుమ్మురేపుతున్న మైలేజ్ ఫ్రెండ్లీ కార్లు.. ది బెస్ట్ కార్లు ఇవే..!
సొంత కారు కొనుగోలు చేయడం అనేది భారతదేశంలోని ప్రతి మధ్య తరగతి ప్రజల కలగా ఉంటుంది. ఈ కలను నెరవేర్చుకోవడానికి వారు తమ పొదుపుతో పాటు వాహన రుణం తీసుకుని మరీ కారును కొనుగోలు చేస్తూ ఉంటారు. అయితే కారు కొనుగోలు అనేది సులభంగా అయినా దాని నిర్వహణ అనేది కష్టం కాకూడదని మైలేజ్ ఎక్కువనిచ్చే కార్లను ఎంచుకుంటూ ఉంటారు. ఈ నేపథ్యంలో ప్రస్తుతం రూ.7 లక్షల కంటే తక్కువ ధరలో బెస్ట్ మైలేజ్ ఇచ్చే కార్ల గురించి మరిన్ని వివరాలను తెలుసుకుందాం.
మారుతి సుజుకి మైలేజ్ పరంగా చాలా మంచి కారు. న్యూ జెనరేషన్ మారుతి సుజుకి స్విఫ్ట్ ధర రూ. 6.49 లక్షలు (ఎక్స్-షోరూమ్) నుంచి ప్రారంభమవుతుంది. దీని మాన్యువల్ గేర్బాక్స్ వేరియంట్ 24.8 కిలోమీటర్ల మైలేజీని ఇస్తుంది. అలాగే ఆటోమేటిక్ మోడల్ 25.75 కిలో మీటర్ల మైలేజీని ఇస్తుంది. ఇది 1.2 లీటర్ త్రీ సిలిండర్ జెడ్ సిరీస్ ఇంజిన్తో వస్తుంది. ఈ కారు 5700 ఆర్పీఎం వద్ద 80.4 బీహెచ్పీ, 4300 ఆర్పీఎం వద్ద 113 ఎన్ఎం టార్క్ను ఉత్పత్తి చేస్తుంది.
హ్యుందాయ్ ఎక్స్టర్లో 12 కలర్ ఆప్షన్లు అందుబాటులో ఉన్నాయి. ఈ కారు ధర రూ. 5.99 లక్షల (ఎక్స్-షోరూమ్) నుంచి ప్రారంభమవుతుంది. ఈ కారు మాన్యువల్ పెట్రోల్ వేరియంట్ 19.4 కిలోమీటర్ల మైలేజీని ఇస్తుంది. అలాగే ఆటోమేటిక్ వేరియంట్ 19.2 కిలోమీటర్ల మైలేజీని ఇస్తుంది.
టాటా టియాగో కారు ధర రూ. 5 లక్షలు (ఎక్స్-షోరూమ్) నుంచి ప్రారంభమవుతుంది. ఇందులో 6 కలర్ ఆప్షన్లు అందుబాటులో ఉన్నాయి. ఈ కారు మాన్యువల్ వేరియంట్ 20.09 కిలోమీటర్ల మైలేజీని ఇస్తుంది. అలాగే ఆటోమేటిక్ వేరియంట్ 19 కిలోమీటర్ల మైలేజీని ఇస్తుంది. ఇందులో 1.2-లీటర్ ఇంజన్ ఉంది. ఈ కారు 6000 ఆర్పీఎం వద్ద 84.8 బీహెచ్పీ, 3300 ఆర్పీఎం వద్ద 113 ఎన్ఎం టార్క్ ఉత్పత్తి చేస్తుంది.
మారుతి సుజుకి వ్యాగన్ ఆర్ నాలుగు వేరియంట్లు, 9 రంగు ఎంపికల్లో అందుబాటులో ఉంటుంది. ఈ కారు ధర రూ. 5.54 లక్షల (ఎక్స్-షోరూమ్) నుంచి ప్రారంభమవుతుంది. మారుతి సుజుకి వ్యాగన్ ఆర్ మాన్యువల్ వేరియంట్ 23.56 కిలోమీటర్ల మైలేజీని ఇస్తుంది. అలాగే ఆటోమేటిక్ వేరియంట్ 24.43 కిలోమీటర్ల మైలేజీని ఇస్తుంది.
రెనాల్ట్ క్విడ్ ధర రూ. 4.69 లక్షలు (ఎక్స్-షోరూమ్) వద్ద ప్రారంభమవుతోంది. ఇందులో 6 కలర్ ఆప్షన్లు అందుబాటులో ఉన్నాయి. ఈ కారులో 1.0-లీటర్ ఇంజన్ ఉంటుంది. ఈ కారు ఆటోమేటిక్ వేరియంట్ 22.3 కిలోమీటర్ల మైలేజీని ఇస్తుంది. అలాగే మాన్యువల్ వేరియంట్ 21.46 కిలోమీటర్ల మైలేజీని ఇస్తుంది.