ఉదయం.. మధ్యాహ్నం.. రాత్రి.. పెరుగు ఎప్పుడు తినాలి..? అందరూ చేసే తప్పులు ఇవే..
మన భారతీయ భోజనంలో పెరుగు లేని రోజు ఉండదు. చివరి ముద్ద పెరుగన్నంతోనో, భోజనం ముగిశాక చల్లటి మజ్జిగతోనో ముగిస్తేనే సంపూర్ణమైన తృప్తి లభిస్తుంది. కేవలం రుచి కోసమే కాకుండా శరీరానికి అవసరమైన కాల్షియం, ప్రొటీన్, విటమిన్ బి12, జీర్ణవ్యవస్థను రక్షించే ప్రోబయోటిక్స్ వంటి కీలక పోషకాల కోసం పెరుగును నిత్యం ఆహారంలో భాగం చేసుకుంటాం. అయితే పెరుగును ఉదయం తినాలా, మధ్యాహ్నం తీసుకోవాలా లేక రాత్రిపూట పూర్తిగా మానేయాలా అనే సందేహం చాలామందిలో ఉంటుంది. ఆ వివరాలు ఈ స్టోరీలో తెలుసుకుందాం..
పోషకాహార నిపుణుల ప్రకారం.. పెరుగు తినడానికి రోజంతా ఒకే ఒక్క పర్ఫెక్ట్ సమయం ఉందనడానికి ఎలాంటి శాస్త్రీయ ఆధారాలు లేవు. ప్రతి ఒక్కరి శరీర తత్త్వం, జీర్ణవ్యవస్థ పనితీరును బట్టి పెరుగు తీసుకునే సమయం మారవచ్చు. ఉదయం వేళ అల్పాహారంతో కలిపి పెరుగును తీసుకోవడం ఆరోగ్యానికి ఎంతో మేలు చేస్తుంది. ఓట్స్, తాజా పండ్లు లేదా డ్రై ఫ్రూట్స్‌తో కలిపి తీసుకుంటే శరీరానికి అవసరమైన స్థిరమైన ప్రొటీన్, ఎనర్జీ అందుతాయి. అయితే పరగడుపున పెరుగు తిన్నప్పుడు కొందరిలో గ్యాస్, ఎసిడిటీ లేదా అసౌకర్యం కలిగే అవకాశం ఉన్నందున, అలాంటి వారు ఖాళీ కడుపుతో కాకుండా బ్రేక్‌ఫాస్ట్‌లో భాగంగా తీసుకోవడం ఉత్తమం.
భారతీయులలో అత్యధికులు మధ్యాహ్న భోజనంలో పెరుగు లేదా మజ్జిగను ఎక్కువగా ఇష్టపడతారు. అన్నం, పప్పు, కూరలతో పాటు పెరుగును చేర్చుకోవడం వల్ల జీర్ణక్రియ సులభతరం అవుతుంది. వేసవి కాలంలో పెరుగు శరీరాన్ని చల్లబరుస్తుందని భావిస్తుంటారు. కానీ వైద్యపరంగా ఇది తక్షణమే ఎసిడిటీని తగ్గించేస్తుందని స్పష్టమైన ఆధారాల్లేవు. ఎవరికైతే జీర్ణ సమస్యలు ఉంటాయో వారు తమ ఆహారపు అలవాట్లను గమనిస్తూ తగిన మోతాదులో తీసుకోవడం మంచిది. అంతేకాకుండా జిమ్, వ్యాయామాలు చేసే వారికి వర్కౌట్ తర్వాత పెరుగు అద్భుతమైన పోస్ట్‌వర్కౌట్ స్నాక్‌లా పనిచేస్తుంది. దీనిలోని హైక్వాలిటీ ప్రొటీన్ కండరాల పునరుద్ధరణకు వేగంగా తోడ్పడుతుంది.
రాత్రిపూట పెరుగు తింటే కఫం పెరుగుతుందని, జలుబు చేస్తుందని ఆయుర్వేదంలో పాతకాలం నుంచి కొన్ని నమ్మకాలు, సిఫార్సులు ఉన్నాయి. కానీ ఆధునిక న్యూట్రిషన్ సైన్స్ ప్రకారం.. సంపూర్ణ ఆరోగ్యంగా ఉన్న వ్యక్తి రాత్రి వేళ పెరుగు తిన్నంత మాత్రాన కఫం లేదా జలుబు వస్తుందనడానికి ఎలాంటి శాస్త్రీయ రుజువులు లేవు. రాత్రి భోజనంలో పెరుగు తిన్నా ఎటువంటి కడుపు ఉబ్బరం లేదా జీర్ణ ఇబ్బందులు కలగని వారు నిరభ్యంతరంగా తక్కువ మోతాదులో తీసుకోవచ్చు. ఒకవేళ రాత్రి వేళ పెరుగు తిన్న తర్వాత గ్యాస్, తేన్పులు, అజీర్ణం వంటి సమస్యలు ఎదురైతే మాత్రం రాత్రిపూట దానిని నివారించడం లేదా మధ్యాహ్నానికే పరిమితం చేసుకోవడం మంచిది.
రోజూ ఎంత మోతాదులో పెరుగు తినాలనే దానికి అందరికీ ఒకే కొలమానం ఉండదు. వయస్సు, రోజువారీ శారీరక శ్రమ, తీసుకునే ఆహార పరిమాణంపై ఇది ఆధారపడి ఉంటుంది. సాధారణంగా రోజుకు ఒకటి నుంచి రెండు కప్పుల పెరుగు సరైన పోషణను అందిస్తుంది. పాలల్లో ఉండే లాక్టోస్ పడని వారికి పాల కంటే పెరుగు సులభంగా జీర్ణమవుతుంది, ఎందుకంటే పెరుగు తయారీ ప్రక్రియలోనే లాక్టోస్ చాలావరకు లాక్టిక్ ఆమ్లంగా మారుతుంది. అయితే పాల ప్రొటీన్ అలర్జీలు ఉన్నవారు మాత్రం నిపుణుల సలహా మేరకే దీనిని ఎంచుకోవాలి. మార్కెట్లో దొరికే అధిక చక్కెరలు ఉండే ఫ్లేవర్డ్ పెరుగుల కంటే ఇంట్లో తోడుపెట్టిన సహజమైన సాదా పెరుగు లేదా గ్రీక్ యోగర్ట్ ఆరోగ్యానికి ఎంతో మంచిది.
సమయం ఏదైనా, పెరుగు శరీరానికి ఎనలేని మేలు చేసే సహజ సిద్ధమైన సూపర్ ఫుడ్ అనడంలో ఎలాంటి సందేహం లేదు. ఉదయం, మధ్యాహ్నం లేదా రాత్రి అనే కఠిన నిబంధనలు పెట్టుకోకుండా మీ శరీరానికి ఏ సమయంలో తింటే సౌకర్యవంతంగా, తేలికగా జీర్ణమవుతుందో పరిశీలించి ఆ సమయాన్ని ఎంచుకోవడమే అత్యంత ఉత్తమమైన మార్గమని నిపుణులు స్పష్టం చేస్తున్నారు.