దీపావళికి ఇల్లు క్లీన్ చేస్తున్న యజమాని.. కిటికీ పక్కన కనిపించిన ఊహించని అతిథులు
దీపావళి పండుగ దగ్గరకొచ్చింది. దీంతో చాలా మంది ఇప్పటి నుంచే ఇళ్లు క్లీన్ చేయడం మొదలు పెట్టారు. ఇలానే ఇంటిని శుభ్రం చేస్తున్న ఓ వ్యక్తికి ఊహించని పరిణామం ఎదురైంది. అతని ఇంట్లో ఏకంగా ఆరు గుడ్లగూబ పిల్లలు కనిపించాయి. అది చూసి ఆశ్చర్యానికి గురైన ఇండి యజమాని వెంటనే అటవీశాఖ అధికారులకు సమాచారం ఇవ్వడంతో అక్కడికి చేరుకున్న అధికారులు వాటిని సురక్షితంగా రక్షించి తీసుకెళ్లారు.
దీపావళికి ఇళ్లు క్లీన్ చేస్తుండగా ఇంట్లో ఆరు గుడ్లగూబ పిల్లలు కనిపించిన ఆశ్చర్యఘటన ఉత్తరప్రదేశ్‌లో వెలుగు చూసింది. వివరాల్లోకి వెళ్తే.. బిజ్నోర్‌లో ఉన్న కృష్ణ విహార్ కాలనీకి చెందిన జగదీశ్ కుమార్ అనే వ్యక్తి.. దీపావళి పండుగ దగ్గర పడుతుందని ఇంటిని శుభ్రం చేయడం స్టార్ట్ చేశాడు.. అయితే ఇంటిలోని ఓ పాత కిటికీలో గుడ్లగూబకు చెందిన ఆరు పిల్లలు కనిపించాయి. వాటిని చూసిన జగదీశ్ తొలుత ఆశ్చర్యపోయాడు. ఆ కిటికీకి జాలీ ఉండటంతో తల్లి గుడ్లగూబ తన పిల్లల వద్దకు రాలేకపోతుందని.. పిల్లలు ఇబ్బందులు పడుతున్న విషయాన్ని గమనించిన జగదీశ్ కుమార్ వెంటనే అటవీ శాఖ అధికారులకు సమాచారం అందించారు.
సమాచారం అందుకున్న అటవీ శాఖ బృందం వెంటనే అక్కడికి చేరుకుని ఆరు గుడ్లగూబ పిల్లలను సురక్షితంగా బయటకు తీసింది. అనంతరం వాటిని సంరక్షణ కోసం అటవీ శాఖ రేంజ్ కార్యాలయానికి తరలించింది. అటవీ ప్రాంతాధికారి మహేశ్ గౌతమ్ తెలిపిన వివరాల ప్రకారం.. రక్షించిన ఆరు గుడ్లగూబ పిల్లలు బార్న్ ఔల్ జాతికి చెందిని.. వీటిలో నాలుగు మగవి, రెండు ఆడవి ఉన్నట్టు తెలిపారు.
వాటిని రెండు పంజరాల్లో ఉంచి అటవీ శాఖ సిబ్బంది నిరంతరం పర్యవేక్షిస్తున్నారు. వాటి ఆరోగ్యం, ఆహారం, ఇతర అవసరాలపై ప్రత్యేక శ్రద్ధ తీసుకుంటున్నారు. సహజ వాతావరణానికి దూరంగా ఉన్నప్పటికీ ఎలాంటి ఇబ్బందులు కలగకుండా జాగ్రత్తలు తీసుకుంటున్నారు.ఈ గుడ్లగూబ పిల్లల ఆహారపు అలవాట్లు కూడా ప్రత్యేకంగా ఉంటాయని అధికారులు తెలిపారు. సాధారణంగా ఇవి పగటిపూట విశ్రాంతి తీసుకుంటూ.. చీకటి పడిన తర్వాత ఆహారం కోసం చూస్తాయని తెలిపారు. ఈ అలవాటును దృష్టిలో ఉంచుకుని అటవీ శాఖ సిబ్బంది సాయంత్రం వేళ వాటికి ఆహారం అందిస్తున్నారు.
మొదట ఈ ఆరు పిల్లలకు రోజుకు సుమారు అర కిలో చికెన్ ఇచ్చేవారు. అయితే వాటి ఆహార అవసరాలను పరిగణనలోకి తీసుకుని ప్రస్తుతం ఆ పరిమాణాన్ని పెంచారు. ఇప్పుడు ప్రతిరోజూ దాదాపు ఒక కిలో చికెన్‌ను చిన్న చిన్న ముక్కలుగా చేసి వాటికి ఆహారంగా అందిస్తున్నట్టు అధికారులు తెలిపారు. అవి పూర్తిగా ఎదిగిన తర్వాత సహజ ఆవాసంలోకి విడుదల చేస్తామని అధికారులు తెలిపారు.
మరిన్ని జాతీయ వార్తల కోసం ఇక్కడ క్లిక్ చేయండి.