జీఎస్‌ఎల్వీ ఎఫ్‌-10.. గెట్ రెడీ టూ కౌంట్‌డౌన్‌..

భారత అంతరిక్ష పరిశోధన సంస్థ (ఇస్రో) మరో ప్రయోగానికి సిద్ధమైంది. జీఎస్‌ఎల్వీ ఎఫ్‌-10 ప్రయోగానికి ఏర్పాట్లు పూర్తి చేసింది. విశ్వ వినువీధుల్లో సుదూర లక్ష్యాన్ని చేరుకోగలిగిన జీఎస్‌ఎల్‌వీ వాహక నౌక ద్వారా చంద్రయాన్‌కు సిద్ధమవుతున్న ఇస్రో…ఈ నెల 5న సాయంత్రం 5.43 గంటలకు జీఎస్‌ఎల్వీ ఎఫ్‌-10ను ప్రయోగించనుంది. ఇస్రో వాహక నౌక ద్వారా జీశాట్‌-1 ఉపగ్రహాన్ని రోదసిలోకి పంపనుంది. రక్షణ వ్యవస్థ, విపత్తుల సమాచారాన్ని తెలుసుకోవడమే లక్ష్యంగా జీశాట్‌-10పనిచేయనుంది.

నెల్లూరు జిల్లాలోని శ్రీహరికోట లోని సతీష్ ధావన్ స్పేస్ సెంటర్ (షార్) నుంచి మార్చి 5న జీఎస్‌ఎల్‌వీ ఎఫ్-10 వాహక నౌకను నింగిలోకి పంపేందుకు షార్ శాస్తవ్రేత్తలు సన్నాహాలు చేస్తున్నారు. ఇప్పటికే జీఎస్‌ఎల్‌వి వాహక నౌక అనుసంధానానికి కావాల్సిన అన్ని ఏర్పాట్లు పూర్తి చేశారు. దీని ద్వారా 2300 కిలోల బరువుగల జీ శాట్-1 ఉపగ్రహాన్ని నిర్ణీత కక్ష్యలోకి ప్రవేశపెట్టనున్నారు. రేపు (బుధవారం)సాయంత్రం 3.43 గంటలకు కౌంట్‌డౌన్‌ ప్రారంభం కానుంది. అయితే, ఇస్రో చేపట్టనున్న జీఎస్‌ఎల్‌వీ ఎఫ్-10 ప్రయోగం వల్ల మరోప్రయోగం వాయిదా పడే పరిస్థితి నెలకొంది.

షార్ నుంచి వచ్చే నెల 18న ప్రయోగించ తలపెట్టిన పీఎస్‌ఎల్‌వీ సి-49 ప్రయోగం వాయిదా పడే అవకాశాలు ఉన్నట్లు శాస్తవ్రేత్తలు అనుమానం వ్యక్తం చేస్తున్నారు. పీఎస్‌ఎల్‌వీ సి-49ద్వారా రీశాట్ ఉపగ్రహాన్ని కక్ష్యలోకి పంపాల్సి ఉంది. ప్రస్తుతం జీఎస్‌ఎల్‌వీ ప్రయోగం కారణంగా పీఎస్‌ఎల్‌వీ సి-49 ప్రయోగం ఏప్రిల్ మొదటి వారానికి వాయిదా వేయాలని శాస్తవ్రేత్తలు నిర్ణయం తీసుకున్నట్లు సమాచారం.