సముద్రంలో 48 గంటల ఆపరేషన్.. 3 వేల కిలోమీటర్ల దూరంలో భారత్ మెరుపు దాడి.. చివరకు..

Indian Navy Rescue Operation

భారత నావికాదళం సముద్ర భద్రతలో కీలక పాత్ర పోషిస్తుంది. సోమాలియా ఈశాన్య తీరం దగ్గర సాయుధ సముద్రపు దొంగలు హైజాక్ చేసిన ఇరానియన్ ఫిషింగ్ నౌక అజినిని భారత నావికాదళం విజయవంతంగా రక్షించింది. 48 గంటలకు పైగా సాగిన ఆపరేషన్‌లో 20 మంది సిబ్బందిని ఎలాంటి ప్రాణనష్టం లేదా గాయాలు లేకుండా సురక్షితంగా విడిపించారు. అక్టోబర్ 29న సోమాలియా ఈశాన్య తీరంలో బందర్ బైలా–హఫున్ ప్రాంతం మధ్య సాయుధ దొంగల ముఠా సుమారు 12 మంది అజిని నౌకను స్వాధీనం చేసుకుంది. ఈ నౌకను వాణిజ్య నౌకలపై మరిన్ని దాడులకు మదర్ షిప్ గా ఉపయోగించే అవకాశం ఉందని మారిటైమ్ భద్రతా సంస్థలు హెచ్చరించాయి. నౌక తూర్పు వైపు వాణిజ్య మార్గాల దిశగా కదులుతుండటంతో భారత నావికాదళం వెంటనే చర్యలు చేపట్టింది. భారత నావికాదళం యుద్ధనౌక INS కొల్‌కత్తా సహా సముద్ర నిఘా విమానం (P-8I) సహాయంతో నౌకను గుర్తించి దాని కదలికలను నిరంతరం పర్యవేక్షించింది. నౌక తప్పించుకోకుండా క్యాలిబ్రేటెడ్ నాన్-కైనెటిక్ చర్యలతో అడ్డుకుంది.

భారత వైమానిక దళం సి-17 విమానం ద్వారా మెరైన్ కమాండోలు (మార్కోస్)ను పారాడ్రాప్ చేసి త్వరితగతిన ఆపరేషన్ పూర్తి చేశారు. నవంబర్ 2న ఈ ఆపరేషన్ విజయవంతంగా ముగిసింది. దొంగల నుంచి భారీ సంఖ్యలో ఆయుధాలు స్వాధీనం చేసుకున్నారు. ఈ ఆపరేషన్ ముంబై నుంచి 3,000 కి.మీ.కు పైగా దూరంలో జరిగింది. రక్షణ మంత్రి రాజ్‌నాథ్ సింగ్ ఈ విజయాన్ని అభినందిస్తూ, మూడు వేల కిలోమీటర్ల దూరంలో 48 గంటల సమన్వయ ఆపరేషన్‌లో అజిని నౌకలోని 20 మంది సిబ్బందిని సాయుధ దొంగల నుంచి సురక్షితంగా రక్షించిన భారత నావికాదళానికి అభినందనలు తెలిపారు.

భారత వైమానిక దళం సకాలంలో అందించిన సహకారంతో జరిగిన ఈ చర్య నావికాదళం యొక్క అధిక ఆపరేషనల్ రెడీనెస్‌ను చూపిస్తుందని పేర్కొన్నారు. హిందూ మహాసముద్ర ప్రాంతంలో సముద్రయాన సిబ్బంది భద్రత, కీలక వాణిజ్య మార్గాల రక్షణ, సురక్షితమైన సముద్ర వాతావరణం నిర్ధారణకు భారత నావికాదళం కట్టుబడి ఉందని అధికారులు తెలిపారు. ఈ ఆపరేషన్ భారత నౌకాదళ సామర్థ్యానికి నిదర్శనంగా నిలిచింది.

మరిన్ని జాతీయ వార్తల కోసం ఇక్కడ క్లిక్ చేయండి..