ఐరాస మండలిలో ఇండియాకు స్థానం… చైనా మౌనం

ఐక్యరాజ్యసమితి భద్రతామండలిలో ఇండియాకు నాన్-పర్మనెంట్ స్థానం దక్కినందుకు (రెండేళ్ల పరిమిత కాలానికి)జర్మనీ, నార్వే, ఉక్రెయిన్ వంటి దేశాలు హర్షం వ్యక్తం చేయగా..చైనా మాత్రం మౌనం వహించింది. తాము శాశ్వత సభ్యదేశంగా కొత్తగా ఎన్నికైన సభ్య దేశాలన్నిటితో సహకారాన్ని పెంపొందించుకుంటామని మాత్రం ముక్తసరిగా పేర్కొంది. 192 సభ్య దేశాలకు గాను భారత్.. 184 ఓట్లతో భారీ మెజారిటీని సాధించి.. మండలిలో రెండేళ్ల కాలానికి సభ్యత్వాన్ని పొందింది. దీనిపై చైనా విదేశాంగ శాఖ అధికార ప్రతినిధి ఝావో లిజియాన్.. ఇండియా ఎన్నిక గురించి ప్రస్తావించకుండా మౌనం వహించారు. ఐరాస నియమావళి ప్రకారం శాంతి, సెక్యూరిటీల పరిరక్షణలో మండలి ముఖ్య పాత్ర వహిస్తుందని ఆయన చెప్పారు. ఐరాస సెక్యూరిటీ కౌన్సిల్ లో సభ్యత్వం పొందేందుకు ఇండియా చేస్తున్న ప్రయత్నాలకు చైనా ఎప్పటికప్పుడు అడ్డుపుల్ల వేస్తూ వచ్చింది. అయితే అమెరికా, బ్రిటన్, ఫ్రాన్స్, రష్యా ఇండియాకు మద్దతును ప్రకటించాయి. ఇలా ఉండగా… ఇండియాతో బాటు నార్వే, ఐర్లండ్, మెక్సికో దేశాలు నాన్-పర్మనెంట్ సభ్య దేశాలుగా ఎన్నికయ్యాయి. వచ్ఛే ఏడాది జనవరి 1 నుంచి రెండు సంవత్సరాల పాటు ఇవి మండలి లో (నాన్) సభ్యదేశాలుగా కొనసాగుతాయి.