కరెంట్ షాక్ కొడితే వెంటనే ఇలా చేయండి.. ప్రాణాలు కాపాడే టిప్స్.. లైట్ తీసుకోవద్దు..
వర్షాకాలంలో చిన్న పొరపాటు జరిగినా కరెంట్ షాక్ ప్రమాదాలు క్షణాల్లో ప్రాణాలు తీసేస్తాయి.. అలాంటి అత్యవసర సమయంలో భయపడకుండా బాధితుడిని ఎలా కాపాడుకోవాలో మీకు తెలుసా? పొరపాటున ఒట్టి చేతులతో ముట్టుకుంటే ఏమవుతుంది? కరెంట్ షాక్ తగిలినప్పుడు చేయాల్సిన, అస్సలు చేయకూడని ఆ కీలకమైన లైఫ్ సేవింగ్ రూల్స్ ఏంటో తెలుసుకుందాం..
వర్షాకాలంలో తేమ, నీటి ప్రవాహం కారణంగా ఇళ్లల్లోనూ, బయట కరెంట్ షాక్ గురయ్యే ప్రమాదాలు ఎక్కువగా జరుగుతుంటాయి. కంటికి కనిపించని విద్యుత్ ప్రవాహం క్షణాల్లో ప్రాణాలను తీయగలదు. అలాంటి అత్యవసర సమయాల్లో భయాందోళనకు గురికాకుండా సరైన ప్రథమ చికిత్స అందించడం వల్ల బాధితుడి ప్రాణాలను కాపాడవచ్చు. వర్షాకాలంలో ప్రతీ ఒక్కరూ తెలుసుకోవాల్సిన ముఖ్యమైన ప్రథమ చికిత్స నియమాలు మరియు వైద్యుల సూచనలు ఇవే..
విద్యుత్ సరఫరాను నిలిపివేయడం
కరెంట్ షాక్కు గురైన బాధితుడిని నేరుగా చేతులతో ముట్టుకోవడం అత్యంత ప్రమాదకరం. బాధితుడిని తాకడానికి ముందే ఇంట్లో లేదా పరిసరాల్లోని మెయిన్ స్విచ్ను తక్షణమే ఆఫ్ చేయాలి. ఒకవేళ నీళ్లు ఉండి, స్విచ్ ఆఫ్ చేయడం సాధ్యపడకపోతే, మీరు పొడిగా ఉండే ప్రదేశంలో నిలబడి ప్లాస్టిక్ పైపు, పొడి చెక్క కర్ర లేదా పొడి గుడ్డ సహాయంతో బాధితుడిని షాక్ నుంచి దూరంగా నెట్టాలి. తడి చేతులతోగానీ, ఇనుప వస్తువులతోగానీ బాధితుడిని తాకకూడదు.
స్పృహ – శ్వాస పరీక్ష
బాధితుడిని విద్యుత్ ప్రవాహం నుంచి విడదీసిన వెంటనే ఆయన స్పందించే స్థితిలో ఉన్నారో లేదో గమనించాలి. బాధితుడు మాట్లాడకపోయినా లేదా శ్వాస తీసుకోవడం ఆగిపోయినా ఒక్క క్షణం కూడా ఆలస్యం చేయకుండా అంబులెన్స్కు కాల్ చేయాలి అని ప్రముఖ వైద్యులు డాక్టర్ శర్మ స్పష్టం చేస్తున్నారు. అంబులెన్స్ వచ్చేలోగా అనుభవజ్ఞుల సహాయంతో వెంటనే బాధితుడికి గుండెపై ఒత్తిడి ఇస్తూ సీపీఆర్ ప్రారంభించాలి.
పైకి ఆరోగ్యంగా కనిపించినా ఆసుపత్రికి వెళ్లాల్సిందే
చాలా సందర్భాల్లో కరెంట్ షాక్ తగిలిన తర్వాత బాధితులు స్పృహ కోల్పోకుండా, పైకి సాధారణంగానే కనిపించవచ్చు. బయటకు క్షేమంగా ఉన్నట్లు అనిపించినప్పటికీ, శరీరంలోకి ప్రవహించిన విద్యుత్ వల్ల గుండె యొక్క అంతర్గత లయ దెబ్బతినే ప్రమాదం ఉంది. ఎలాంటి ప్రమాదం జరగకుండా ముందస్తు జాగ్రత్తగా ఆసుపత్రికి వెళ్లి ఈసీజీ టెస్ట్ చేయించుకోవడం అత్యంత ఆవశ్యకం.
కాలిన గాయాల సంరక్షణ
విద్యుత్ దాటికి చర్మంపై కాలిన గాయాలు ఏర్పడితే కొన్ని సాంప్రదాయ పదార్థాలను అస్సలు వాడకూడదు. కాలిన గాయాలపై ఐస్ గడ్డలు, నూనె, టూత్పేస్ట్ లేదా ఏ విధమైన ఆయింట్మెంట్లు పూయకూడదు. కేవలం గది ఉష్ణోగ్రత వద్ద ఉన్న రుచిలేని సాధారణ నీటిని లేదా పారే నీటిని గాయంపై పోయాలి.
అవయవాలు విరిగినట్లు అనిపిస్తే..
షాక్ తగిలిన తీవ్రతకు లేదా ఎత్తు నుంచి కింద పడటం వల్ల ఎముకలు విరిగే అవకాశం ఉంది. బాధితుడికి ఎముక విరిగిందని అనుమానం ఉంటే, ఆ భాగం కదలకుండా జాగ్రత్తపడాలి. విరిగిన అవయవానికి చెక్క ముక్క లేదా గట్టి గుడ్డతో మద్దతు ఇచ్చి, బాధితుడిని సురక్షితంగా ఆసుపత్రికి తరలించాలి. వర్షాకాలంలో కొద్దిపాటి అవగాహన, సమయస్ఫూర్తి,ప్రాథమిక రక్షణ నియమాలను పాటించడం వల్ల మీ కుటుంబ సభ్యులను, ఇరుగుపొరుగు వారిని ప్రమాదాల నుండి సురక్షితంగా కాపాడుకోవచ్చు.