ఇంటి నుంచి బయటకు వెళ్లేటప్పుడు మీ ఫోన్ వైఫై ఆఫ్ చేస్తున్నారా? ఇది మీ కోసమే..!
ప్రస్తుత డిజిటల్ యుగంలో స్మార్ట్‌ఫోన్ మన జీవితంలో ప్రధాన భాగమైపోయింది. ప్రయాణాలు చేసేటప్పుడు లేదా బయటకు వెళ్లేటప్పుడు మొబైల్ డేటాను వాడుతూ, వైఫై ఆన్ చేయడాన్ని చాలామంది పట్టించుకోరు. కానీ, చిన్నదిగా కనిపించే ఈ అలవాటు మీ వ్యక్తిగత గోప్యతకు, డేటా భద్రతకు తీవ్రమైన ముప్పును తెస్తుందని నిపుణులు హెచ్చరిస్తున్నారు. వైఫై ఆన్ ఉంటే జరిగే నష్టాలు ఏమిటి..తెలియాలంటే పూర్తి డిటెల్స్‌లోకి వెళ్లాల్సిందే..
ఇంటి నుంచి బయటకు వెళ్లేటప్పుడు స్మార్ట్‌ఫోన్ వైఫైని ఆన్ చేసి ఉంచడం మీ డిజిటల్ ప్రైవసీకి పెద్ద ముప్పుగా మారుతుంది. మీరు ఇంటి నుంచి బయటికి వెళ్లిన తర్వాత కూడా ఫోన్‌లో వైఫై ఆన్ ఉంటే, అది పరిసరాల్లో అందుబాటులో ఉండే వైఫై నెట్‌వర్క్‌ల కోసం నిరంతరం వెతుకుతూనే ఉంటుంది. ఫోన్‌లో ఆటో-కనెక్ట్ ఫీచర్ ఆన్‌లో ఉంటే, అది గతంలో కనెక్ట్ చేసిన లేదా పబ్లిక్ నెట్‌వర్క్‌లకు దానంతట అదే అనుసంధానమవుతుంది. దీనివల్ల అనేక భద్రతా సమస్యలు తలెత్తుతాయి.
పబ్లిక్ వైఫై, సైబర్ ముప్పులు:
కాఫీ షాప్‌లు, హోటళ్లు, రైల్వే స్టేషన్లు లేదా షాపింగ్ మాల్స్‌లో లభించే పబ్లిక్ వైఫై నెట్‌వర్క్‌లు ఎప్పుడూ సురక్షితంగా ఉండవు. సైబర్ నేరస్థులు ప్రసిద్ధ ప్రదేశాల పేరుతో నకిలీ హాట్‌స్పాట్‌లను సృష్టించి వినియోగదారులను మోసగిస్తుంటారు. ఇలాంటి అభద్రతాభరితమైన నెట్‌వర్క్‌లకు మీ ఫోన్ కనెక్ట్ అయితే, మ్యాన్-ఇన్-ది-మిడిల్ వంటి దాడుల ద్వారా హ్యాకర్లు మీ వ్యక్తిగత ఫోటోలు, డాక్యుమెంట్లు, వెబ్ యాక్టివిటీలను దొంగిలించే అవకాశం ఉంది.
ట్రాకింగ్, బ్యాటరీ సమస్యలు:
కేవలం హ్యాకింగ్ మాత్రమే కాకుండా, కొన్ని రిటైల్ స్టోర్లు, అడ్వర్టైజింగ్ కంపెనీలు మీ ఫోన్ వైఫై స్కానింగ్ సిగ్నల్స్ ద్వారా మీ రాకపోకల సరళిని ట్రాక్ చేస్తుంటాయి. అంతేకాకుండా, నెట్‌వర్క్ కోసం ఫోన్ నిరంతరం సెర్చ్ చేయడం వల్ల బ్యాటరీ కూడా వేగంగా డ్రైన్ అవుతుంది.
తీసుకోవాల్సిన జాగ్రత్తలు:
వైఫై ఆఫ్ చేయండి: ఇల్లు లేదా ఆఫీస్ దాటి బయటకు వెళ్లేటప్పుడు మీ ఫోన్ వైఫైని తప్పకుండా డిసేబుల్ చేయండి.
ఆటో-కనెక్ట్ నిలిపివేయండి: పబ్లిక్ నెట్‌వర్క్‌లకు ఆటోమేటిక్‌గా కనెక్ట్ అయ్యే ఫీచర్‌ను ఆఫ్ చేయడంలో జాగ్రత్త వహించండి.
పాత నెట్‌వర్క్‌లను తొలగించండి: అవసరం లేని లేదా పాత సేవ్ చేసిన వైఫై నెట్‌వర్క్‌లను మీ డివైస్ నుండి తొలగించండి.
సురక్షిత నెట్‌వర్క్ వాడకం: పబ్లిక్ వైఫై వాడేటప్పుడు బ్యాంకింగ్ లావాదేవీలు చేయకపోవడం మంచిది. అత్యవసరమైతే విశ్వసనీయమైన VPN ను ఉపయోగించండి.
చిన్నపాటి ఈ జాగ్రత్తలు పాటిస్తే మీ విలువైన డేటాను సైబర్ మోసాల నుండి సురక్షితంగా కాపాడుకోవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..