అమ్మవారికి ఇష్టమైన ప్రసాదం.. ఒక్కసారి ఇలా చేసి చూడండి.. పిల్లలు కూడా మంచిగా తింటారు
దేవి శరన్నవరాత్రుల్లో అమ్మవారికి నైవేద్యంగా సమర్పించేందుకు కొబ్బరన్నం మంచి ఎంపిక. పచ్చి కొబ్బరి, పచ్చిమిర్చి, అల్లం, కరివేపాకు, పల్లీలు, జీడిపప్పు, పోపుతో తయారు చేసే ఈ వంటకం సువాసనతో, కమ్మని రుచితో ఉంటుంది. ఇంట్లో సులభంగా తయారు చేసుకునే కొబ్బరన్నాన్ని అమ్మవారికి ప్రసాదంగా సమర్పించడంతో పాటు అల్పాహారంగా లేదా లంచ్ బాక్స్‌లోనూ తీసుకెళ్లవచ్చు.
దేశవ్యాప్తంగా శరన్నవరాత్రి వేడుకలు వైభవంగా జరుగుతున్నాయి. రోజుకొక అలంకారంలో దర్శనమిస్తున్న దుర్గాదేవి అమ్మవారికి భక్తులు దర్శించుకోవడంతోపాటు ప్రత్యేక పూజలు నిర్వహిస్తున్నారు. ముఖ్యంగా.. అమ్మవారికి పలు నైవేధ్యాలను సమర్పించి పూజలు చేస్తుంటారు.. దేవి నవరాత్రులలో అమ్మవారికి నైవేద్యంగా సమర్పించే ప్రసాదాలలో కొబ్బరన్నం ఒకటి.. కొబ్బరన్నం అనేది తెలుగు వంటకాల్లో ఒక ప్రత్యేకమైన స్థానాన్ని కలిగి ఉంది. ఇది కేవలం ప్రసాదంగానే కాకుండా, ఉదయం అల్పాహారంగా, పిల్లల లంచ్ బాక్సులకు కూడా సరిపోయే ఆరోగ్యకరమైన, రుచికరమైన వంటకం. ఈ కథనంలో కమ్మనైన కొబ్బరన్నం తయారీ విధానాన్ని తెలుసుకోండి..
కొబ్బరన్నం తయారీకి కావాల్సిన పదార్థాలు:
- పచ్చి కొబ్బరి ముక్కలు: 1 కప్పు
- పచ్చిమిర్చి: 5 (కారం తక్కువ తినేవారు 4)
- అల్లం: 1 ఇంచ్ ముక్క
- కరివేపాకు: 2 రెమ్మలు
- ఉప్పు: రుచికి సరిపడా (పావు టీ స్పూన్ మిక్సీలో, 1 టీ స్పూన్ కూరలో)
- నూనె: 3 టేబుల్ స్పూన్లు
- నెయ్యి: 1 టేబుల్ స్పూన్
- పల్లీలు: 3 టేబుల్ స్పూన్లు
- జీడిపప్పు: కొన్ని
- పచ్చి శెనగపప్పు: 1 టేబుల్ స్పూన్
- మినప గుళ్ళు: 1 టేబుల్ స్పూన్
- ఆవాలు: 1/2 టీ స్పూన్
- ఇంగువ: 1/8 టీ స్పూన్ (పావు టీ స్పూన్ లో సగం)
- ఉడికించిన అన్నం: 1 కప్పు బియ్యంతో వండినది (2 కప్పుల నీటితో)
తయారీ విధానం:
కొబ్బరి తయారీ: ముందుగా, మిక్సీ జార్‌లోకి ఒక కప్పు పచ్చి కొబ్బరి ముక్కలు వేసుకొని, మధ్య మధ్యలో ఆపుకుంటూ కొంచెం పలుకులుగా ఉండేలాగా గ్రైండ్ చేసుకోవాలి. ఇలా గ్రైండ్ చేసుకున్న కొబ్బరిని ఒక గిన్నెలోకి తీసుకుని పక్కన పెట్టుకోవాలి.
అల్లం-పచ్చిమిర్చి పేస్ట్: అదే మిక్సీ జార్‌లోకి ఐదు పచ్చిమిర్చి, చిన్న ముక్కలుగా కట్ చేసిన ఒక ఇంచ్ అల్లం ముక్క, రెండు రెమ్మల కరివేపాకు, పావు టీ స్పూన్ సాల్ట్ వేసి నీళ్లు పోయకుండా కొంచెం బరకగా ఉండేలాగా గ్రైండ్ చేసుకోవాలి. దీనిని కూడా పక్కన పెట్టుకోవాలి.
పల్లీలు, జీడిపప్పు వేయించడం: ఇప్పుడు స్టవ్ పైన వెడల్పుగా ఉన్న ఒక పాన్ పెట్టి, అందులో మూడు టేబుల్ స్పూన్ల నూనె, ఒక టేబుల్ స్పూన్ నెయ్యి వేసి వేడి చేయాలి. నూనె కాగిన తర్వాత మూడు టేబుల్ స్పూన్ల పల్లీలు వేసి సగం వేగిన తర్వాత కొన్ని జీడిపప్పు వేసి బంగారు రంగు వచ్చేవరకు వేయించి, ఒక గిన్నెలోకి తీసుకుని పక్కన పెట్టుకోవాలి.
పోపు తయారీ: అదే పాన్‌లో మిగిలిన నూనెలో ఒక టేబుల్ స్పూన్ పచ్చి శెనగపప్పు, ఒక టేబుల్ స్పూన్ మినప గుళ్ళు, అర టీ స్పూన్ ఆవాలు వేసి ఎర్రగా వేయించుకోవాలి.
మసాలా వేయించడం: పోపు బాగా వేగిన తర్వాత, మనం గ్రైండ్ చేసుకున్న అల్లం-పచ్చిమిర్చి-కరివేపాకు పేస్ట్‌ను వేయాలి. ఫ్లేమ్‌ను లో మీడియంకు అడ్జస్ట్ చేసి, అల్లం-పచ్చిమిర్చి పచ్చి వాసన పోయే వరకు బాగా వేయించుకోవాలి.
కొబ్బరి వేయించడం: ఈ దశలో గ్రైండ్ చేసుకున్న కొబ్బరిని వేసి, ఫ్లేమ్‌ను లోకి, మీడియంకి అడ్జస్ట్ చేసుకుంటూ కొబ్బరి నుండి కమ్మటి వాసన వచ్చేంత వరకు బాగా వేయించుకోవాలి. కొబ్బరి బాగా వేగితేనే కొబ్బరన్నానికి మంచి రుచి వస్తుంది.
చివరి మెరుగులు: కొబ్బరి బాగా వేగిన తర్వాత, రెండు రెమ్మల కరివేపాకు, 1/8 టీ స్పూన్ ఇంగువ, రుచికి సరిపడా ఉప్పు (పచ్చిమిర్చి గ్రైండ్ చేసేటప్పుడు వేసిన ఉప్పును గుర్తుంచుకొని వేయాలి) వేసి బాగా కలపాలి.
అన్నం కలపడం: చివరగా, ఉడికించుకున్న అన్నం (ఒక కప్పు బియ్యంతో వండినది), వేయించి పెట్టుకున్న పల్లీలు, జీడిపప్పు వేసి అన్నీ కలిసేలా సున్నితంగా కలుపుకోవాలి.
ఈ విధంగా తయారు చేసుకున్న కొబ్బరన్నం సువాసనతో, కమ్మగా ఉంటుంది. అల్లం, పచ్చిమిర్చిని కచ్చా పచ్చాగా గ్రైండ్ చేసి వేయడం వల్ల కొబ్బరన్నానికి ప్రత్యేకమైన రుచి వస్తుంది. ఈ పద్ధతిలో ఒక్కసారి కొబ్బరన్నం తయారు చేసి, దేవి నవరాత్రులలో అమ్మవారికి ప్రసాదంగా సమర్పించండి లేదా అల్పాహారంగా ఆస్వాదించండి.