ప్రేమలో దూరం పెంచుకుంటున్నారా? ఎమోషనల్ డిస్టెన్స్కు అసలు కారణం ఇదేనా?
ఒక రిలేషన్షిప్లో ఇద్దరి మధ్య బంధం బలపడుతోంది, ఎమోషనల్గా దగ్గరవుతున్నామనే సమయానికే అవతలి వ్యక్తి అకస్మాత్తుగా మారిపోతారు. ఫోన్లు ఎత్తకపోవడం, దూరంగా ఉండటం, లేదా కనీసం కారణం కూడా చెప్పకుండా బ్రేకప్ చెప్పేయడం.. ఇదంతా వింటుంటే మీకు ఏదైనా సినిమా కథలా అనిపిస్తోందా? కానీ, ఇది నేటి యువత రిలేషన్షిప్లో ఎదుర్కొంటున్న ఒక కొత్త సమస్య. దీనినే ‘పఫర్-ఫిషింగ్’ అని పిలుస్తున్నారు. ఈ వింత ప్రవర్తన వెనుక ఉన్న అసలు కారణం ఏంటో, ఎందుకు ఇలా జరుగుతుందో తెలుసుకుందాం.
ఎమోషనల్ ఇన్టిమసీ (భావోద్వేగ సామీప్యత) కలగగానే చాలామంది అభద్రతా భావానికి లోనవుతారు. ప్రమాదం పొంచి ఉందని భావించినప్పుడు పఫర్ ఫిష్ తనను తాను ఉబ్బుకుని, ముళ్లు బయటకు తీసి ఎలా రక్షించుకుంటుందో.. అలాగే తమను తాము కాపాడుకోవడానికి రిలేషన్షిప్ నుంచి బయటకు వచ్చేసే వారినే పఫర్-ఫిషర్స్ అంటారు. ఈ ‘పఫర్-ఫిషింగ్’ కాన్సెప్ట్ అసలు అర్థం ఏంటి? దీనివల్ల బంధం ఎలా దెబ్బతింటుంది?
పఫర్-ఫిషింగ్ అంటే ..
పఫర్-ఫిషింగ్ అనేది అకస్మాత్తుగా పుట్టిన అలవాటు కాదు, ఇదొక రక్షణ యంత్రాంగం. ప్రేమ, ఆత్మీయత అంటే ఇష్టపడే వారు, ఆ బంధం వాస్తవ రూపం దాల్చి, ఎమోషనల్గా లోతుకు వెళ్లేసరికి భయపడి దూరంగా జరుగుతుంటారు. ఇలాంటి ప్రవర్తనకు ప్రధాన కారణం ఆ వ్యక్తిలో దాగి ఉన్న బలహీనత, అభద్రతా భావం, ఎమోషనల్ వల్నరబిలిటీ పట్ల భయం. ప్రియుడు లేదా ప్రేయసిని దూరం పెట్టడం, కమ్యూనికేషన్ ఆపేయడం లేదా రిలేషన్షిప్ను అకస్మాత్తుగా ముగించడం ఈ పద్ధతిలో భాగం. వీరు ఎదుటి వ్యక్తిని అసహ్యించుకుని దూరం జరగరు, తమకు కలిగే ఎమోషనల్ ఒత్తిడిని భరించలేక, ఆ పరిస్థితి నుంచి తప్పించుకోవడానికి మాత్రమే దూరం జరుగుతుంటారు.
ఎలా అధిగమించాలి?
ఒక రిలేషన్షిప్లో ఇలాంటి ప్రవర్తన తరచుగా కనిపిస్తే, అది బంధాన్ని విషతుల్యం చేస్తుంది. అయితే, దీనికి పరిష్కారం లేకపోలేదు. మీరు ఎప్పుడు, ఎందుకు ఇలా ప్రవర్తిస్తున్నారో గమనించండి. ఏ సంఘటన మిమ్మల్ని భయపెడుతుందో తెలుసుకుంటే సగం సమస్య తీరినట్లే. మీరు అసౌకర్యంగా ఉన్నప్పుడు బంధం నుంచి అదృశ్యం కాకుండా, ఆ విషయాన్ని ఎదుటి వ్యక్తితో పంచుకోండి. “నేను కాస్త ఎమోషనల్ ఒత్తిడిలో ఉన్నాను, నాకు కొంత సమయం కావాలి” అని చెప్పడం చాలా ముఖ్యం. సెల్ఫ్-అవేర్నెస్ పెంచుకోవడం, థెరపీ తీసుకోవడం వల్ల బంధంలో భద్రతా భావం కలుగుతుంది.
ఎమోషనల్ ఇన్టిమసీ అనేది బలహీనత కాదు, అది ఒక బంధం యొక్క గొప్పతనం. మీ భయాలను జయించి, ఎదుటి వ్యక్తితో నిజాయితీగా కమ్యూనికేట్ చేయడం ద్వారా మీరు మరింత దృఢమైన సంబంధాన్ని నిర్మించుకోవచ్చు. మీరు మీ రిలేషన్షిప్లో ‘పఫర్-ఫిష్’లా మారిపోకుండా, మీ ఎమోషన్స్ను పంచుకోవడం మొదలుపెట్టండి. బంధాలు మాటలతోనే చిగురిస్తాయి!