గర్జించిన ఆకాశం..హైదరాబాద్‌లో భారీ వర్షం

|

Sep 16, 2020 | 6:34 PM

హైదరాబాద్‌లో ఒక్కసారిగా వాతావరణం మారిపోయింది. నగరంలో కారుచీకట్లు కమ్మేశాయి. సూర్యాస్తమయంకు ముందే నల్లటి మేఘాలు చుట్టేశాయి. ఉరుములు, మెరుపులతో కూడిన భారీ వర్షం కురిస్తోంది...

గర్జించిన ఆకాశం..హైదరాబాద్‌లో భారీ వర్షం
Follow us on

హైదరాబాద్‌లో ఒక్కసారిగా వాతావరణం మారిపోయింది. నగరంలో కారుచీకట్లు కమ్మేశాయి. సూర్యాస్తమయంకు ముందే నల్లటి మేఘాలు చుట్టేశాయి. ఉరుములు, మెరుపులతో కూడిన భారీ వర్షం కురిస్తోంది. ఉదయం ఎండ తీవ్రత ఎక్కువగా ఉన్నా… సాయంత్రానికి వాతావరణం మారిపోయింది. ఆకాశాన్ని నల్లని మబ్బులు కమ్మేశాయి.

ఉరుములు, మెరుపులతో కూడిన వాన నగరాన్ని ముంచెత్తింది. కారుమబ్బులు కమ్ముకోగా కాసేపటికే ఉరుములతో ఆకాశం గర్జించింది. కుండపోత వానకు తోడు పిడుగులు ప్రజలను భయభ్రాంతులను చేశాయి. చెవులు చిల్లులు పడే శబ్దాలతో పిడుగులు పడ్డాయి. భారీగా కురిసిన వర్షంతో ప్రధాన రహదారులు వరద కాలువలను తలపించాయి. రోడ్లపై నీరు నిలవడంతో వాహనదారులు ఇబ్బందులు పడుతున్నారు.

మాదాపూర్, హైటెక్‌ సిటీ, జూబ్లీహిల్స్, బంజారాహిల్స్, పంజాగుట్ట, మియాపూర్, ఎల్బీ నగర్, సికింద్రాబాద్, కూకట్‌పల్లి ప్రాంతాల్లో భారీగా వర్షం కురుస్తోంది. ఆకాశం మేఘావృతమై.. ఉరుములు, మెరుపులతో విరుచుకుపడుతోంది. రోడ్లన్నీ జలమయం కాగా.. ఎక్కడికక్కడ ట్రాఫిక్ నిలిచిపోయింది.

ఆంధ్రప్రదేశ్ తీరానికి దగ్గరలో పశ్చిమ మధ్య బంగాళాఖాతంలో ఏర్పడిన ఉపరితల ఆవర్తనం ప్రభావంతో అల్పపీడనం ఏర్పడింది. ఇది ఎత్తుకు వెళ్లే కొద్దీ నైరుతి దిశ వైపునకు తిరిగి ఉంది. మరింత బలపడడంతో భారీ ఉరుములు, మెరుపులతో వర్షం కురిసింది.

దీంతో తెలంగాణలోని చాలా ప్రాంతాల్లో వర్ష బీభత్సం కొనసాగుతోంది. ఉరుములు మెరుపులతో పిడుగులు కూడా పడ్డాయి. అల్పపీడనం ప్రభావంతో రాష్ట్రంలో మరో నాలుగు రోజులు భారీ వర్షాలు కురిసే అవకాశం ఉందని హైదరాబాద్‌ వాతావరణ కేంద్రం తెలిపింది.