బ్రోకోలీ, క్యాబేజీ తింటే థైరాయిడ్ పెరుగుతుందా? డాక్టర్లు ఏం చెబుతున్నారు
థైరాయిడ్ సమస్య చాలా మందిలో తీవ్రమైన గందరగోళాన్ని కలిగిస్తుంది. ఒకరు నిరంతరం నీరసం, అలసటగా ఉందని ఫిర్యాదు చేస్తే.. మరొకరు ఆకస్మికంగా బరువు పెరగడం, విపరీతమైన జుట్టు రాలడం, ఆందోళన, పొడి చర్మం లేదా బ్రెయిన్ ఫాగ్ (ఆలోచించలేకపోవడం) వంటి భిన్నమైన సమస్యలతో బాధపడుతుంటారు. చాలామంది వీటిని కేవలం మానసిక ఒత్తిడి లేదా వయసు పెరగడం వల్ల వచ్చే మార్పులుగా భావించి పొరబడుతుంటారు. కానీ, అసలు సమస్య మన గొంతు భాగం కింద ఉండే ఒక చిన్న సీతాకోకచిలుక ఆకారపు గ్రంథిలో దాగి ఉంటుంది. అదే థైరాయిడ్ గ్రంథి.
థైరాయిడ్ గ్రంథి పరిమాణంలో చాలా చిన్నదైనప్పటికీ, మన శరీరంలోని దాదాపు ప్రతి వ్యవస్థను నియంత్రిస్తుంది. ఇది శరీర మెటబాలిజం (జీవక్రియలు), ఉష్ణోగ్రత, మూడ్, గుండె వేగం మరియు శక్తి స్థాయిలను క్రమబద్ధీకరిస్తుంది. థైరాయిడ్ లోపాలకు మందులు వాడటం ఎంత ముఖ్యమో, మనం రోజువారీ తీసుకునే ఆహార ఎంపికలు కూడా అంతే కీలకం. ప్రముఖ ఎండోక్రినాలజిస్ట్ డాక్టర్ నందిని శంకర నారాయణ తెలిపిన వివరాల ప్రకారం, కేవలం ఆహారం మాత్రమే థైరాయిడ్ వ్యాధిని పూర్తిగా కలిగించలేదు లేదా నయం చేయలేదు.
కానీ, మనం తినే ఆహారం థైరాయిడ్ గ్రంథి పనితీరును మరియు మనం వేసుకునే థైరాయిడ్ మందుల ప్రభావాన్ని కచ్చితంగా మార్చగలదు. ప్రస్తుతం సోషల్ మీడియాలో వచ్చే రకరకాల ఫేక్ ట్రెండ్స్ చూసి చాలామంది అనవసరమైన భయంతో కొన్ని రకాల పౌష్టికాహారాలను పూర్తిగా మానేస్తున్నారు, ఇది శరీరంలో పోషకాల లోపానికి దారితీసి సమస్యను మరింత తీవ్రం చేస్తోంది.
ప్రాణాధారమైన మూడు ముఖ్య పోషకాలు
థైరాయిడ్ గ్రంథి సక్రమంగా పనిచేయడానికి కొన్ని ప్రత్యేక పోషకాలు చాలా అవసరం. వాటిలో మొదటిది మరియు అత్యంత ముఖ్యమైనది ‘అయోడిన్’. థైరాయిడ్ గ్రంథి మన శరీర మెటబాలిజంను కంట్రోల్ చేసే థైరాక్సిన్, ట్రైఅయోడోథైరోనిన్ హార్మోన్లను ఉత్పత్తి చేయడానికి అయోడిన్ చాలా అవసరం. అయోడిన్ లోపిస్తే థైరాయిడ్ గ్రంథి వాపునకు గురవుతుంది. ఐయోడైజ్డ్ ఉప్పు, పాల పదార్థాలు, గుడ్లు మరియు సీఫుడ్స్ ద్వారా ఇది లభిస్తుంది. అయితే, ఈ మధ్య కాలంలో చాలామంది పాలను పూర్తిగా మానేయడం లేదా మార్కెట్లో దొరికే ఐయోడైజ్డ్ లేని రాక్ సాల్ట్, పింక్ సాల్ట్ వంటి వాటి వైపు మళ్లడం వల్ల ఈ లోపం మళ్లీ పెరుగుతోంది.
రెండవది ‘సెలీనియం’. ఇది థైరాయిడ్ హార్మోన్లను యాక్టివేట్ చేయడానికి మరియు గ్రంథిని ఆక్సిడేటివ్ స్ట్రెస్ నుండి రక్షించడానికి సహాయపడుతుంది. బ్రెజిల్ నట్స్, గుడ్లు, సన్ఫ్లవర్ గింజలు, చేపలు మరియు తృణధాన్యాలలో ఇది లభిస్తుంది. మూడవది ‘జింక్’. ఇది హార్మోన్ల ఉత్పత్తిలో కీలక పాత్ర పోషిస్తుంది. శాకాహారులు తమ డైట్లో పప్పులు, శనగలు, గుమ్మడి గింజలు, జీడిపప్పు, టోఫు (Tofu) చేర్చుకోవడం ద్వారా జింక్ లోపాన్ని సహజంగా అధిగమించవచ్చు.
కొనసాగుతున్న దుష్ప్రచారం!
ఇంటర్నెట్లో అత్యధికంగా అపార్థానికి గురైన ఆహార పదార్థాలు ఏవైనా ఉన్నాయంటే అవి బ్రోకోలీ, క్యాలీఫ్లవర్, క్యాబేజీ, కేల్ (ఆకుకూర) మాత్రమే. వీటిలో ‘గోయిట్రోజెన్స్’ అనే సమ్మేళనాలు ఉంటాయి. ఇవి శరీరంలో అయోడిన్ శోషణను అడ్డుకుంటాయని సోషల్ మీడియాలో విపరీతమైన భయాందోళనలు సృష్టిస్తున్నారు. నిజానికి, శరీరంలో సరైన మొత్తంలో అయోడిన్ ఉన్నవారికి, ఈ కూరగాయలను ఉడికించి మితంగా తినడం వల్ల ఎలాంటి ప్రమాదం లేదని స్పష్టం చేశారు. వీటిని పచ్చిగా జ్యూస్ల రూపంలో విపరీతంగా తాగినప్పుడు మాత్రమే సమస్య వస్తుంది. ఉడికించడం వల్ల ఈ గోయిట్రోజెన్ ప్రభావం పూర్తిగా నశిస్తుంది. కాబట్టి వీటిని చూసి భయపడాల్సిన అవసరం లేదు.
థైరాయిడ్ సమస్యతో బాధపడతున్నవారు సోయా పాలు లేదా పాలకూర గురించి గంటల తరబడి ఆలోచిస్తూ, తమ కిచెన్ షెల్ఫ్లో ఉండే అసలైన శత్రువును నిర్లక్ష్యం చేస్తుంటారు. అదే ‘అల్ట్రా-ప్రాసెస్డ్ ఫుడ్’. ప్యాకెట్ స్నాక్స్, చక్కెర పానీయాలు, మైదా పిండి వస్తువులు మరియు ఫాస్ట్ ఫుడ్స్ నేరుగా థైరాయిడ్పై దాడి చేయవు కానీ, ఇవి శరీరంలో ఇన్సులిన్ రెసిస్టెన్స్, ఊబకాయం మరియు అలసటను పెంచి థైరాయిడ్ లక్షణాలను మరింత నరకంగా మారుస్తాయి. ఇలాంటి తరుణంలో సింపుల్ హోమ్-కుక్డ్ ఫుడ్ (ఇంట్లో వండిన ఆహారం), తగినంత ప్రోటీన్, మరియు సీజనల్ కూరగాయలు తీసుకోవడం ఎంతో ఉత్తమం.
మందులు వేసుకునే సరైన పద్ధతి
సోయాబీన్స్ లేదా సోయా ఉత్పత్తులు నేరుగా థైరాయిడ్ వ్యాధిని కలిగిస్తాయనే నమ్మకంలో ఎలాంటి నిజం లేదు. అసలు సమస్యల్లా మనం వేసుకునే థైరాయిడ్ టాబ్లెట్ తోనే ఉంది. సోయా ఆహారాలు, క్యాల్షియం సప్లిమెంట్స్, ఐరన్ టాబ్లెట్స్ లేదా ఎక్కువ ఫైబర్ ఉన్న ఆహారాలు థైరాయిడ్ మందుల పనితీరును అడ్డుకుంటాయి.
అందుకే వైద్య నిపుణులు మరియు అమెరికాకు చెందిన ఎన్ఐడీడీకే (NIDDK) సంస్థ సూచనల ప్రకారం.. థైరాయిడ్ మందులను ఎల్లప్పుడూ ఉదయాన్నే ఖాళీ కడుపుతో వేసుకోవాలి. టాబ్లెట్ వేసుకున్న తర్వాత కనీసం 30 నుండి 60 నిమిషాల వరకు టీ, కాఫీ లేదా ఎలాంటి ఆహారం తీసుకోకూడదు. ఈ చిన్న అలవాటును క్రమం తప్పకుండా పాటించడం వల్ల హార్మోన్ రీప్లేస్మెంట్ థెరపీ అద్భుతంగా పనిచేస్తుంది.
థైరాయిడ్ను పూర్తిగా నయం చేసే ప్రత్యేకమైన ‘థైరాయిడ్ డైట్’ అంటూ ఏదీ లేదు. ఇంటర్నెట్లో వచ్చే అబద్ధపు ‘థైరాయిడ్ డిటాక్స్’ పద్ధతులను నమ్మి మోసపోకండి. అనవసరమైన ఆహార భయాలను పక్కన పెట్టి, సమతుల్యమైన పౌష్టికాహారాన్ని తీసుకుంటూ, క్రమం తప్పకుండా వైద్యుల పర్యవేక్షణలో బ్లడ్ టెస్ట్ చేయించుకోవడమే సంపూర్ణ ఆరోగ్యానికి రాజమార్గం.