ఎండ వేడికి తట్టుకోలేకపోతున్నారా? చిన్న ఆహార మార్పులతో వేడిని జయించండి
వేసవి కాలం వచ్చిందంటే చాలు భానుడు తన ప్రతాపాన్ని చూపిస్తాడు. బయట అడుగు పెడితే చాలు విపరీతమైన ఎండ, వేడి గాలులు మనల్ని ఉక్కిరిబిక్కిరి చేస్తాయి. ఈ తీవ్రమైన ఎండల ప్రభావం మన శరీరంపై చాలా నిశ్శబ్దంగా పడుతుంది. ఎండలు పెరిగే కొద్దీ శరీరంలో శక్తి స్థాయిలు పడిపోవడం, జీర్ణక్రియ మందగించడం, డీహైడ్రేషన్ వంటి సమస్యలు తలెత్తుతాయి. అందుకే ఈ సమయంలో మనం తీసుకునే ఆహారం విషయంలో చాలా అప్రమత్తంగా ఉండాలి.
సరైన ఆహారం మనల్ని ఉత్సాహంగా ఉంచితే, తప్పుడు ఆహార ఎంపికలు మనల్ని మరింత నీరసపరుస్తాయి. నిపుణుల సూచనల ప్రకారం కఠినమైన డైటింగ్ కాకుండా, మన ఇంట్లో దొరికే పదార్థాలతోనే కొన్ని చిన్న చిన్న మార్పులు చేయడం ద్వారా ఈ ఎండల నుండి ఎలా తప్పించుకోవచ్చో వివరంగా తెలుసుకుందాం..
స్నాక్స్, పానీయాల్లో మార్పులు
సాధారణంగా మనం ఆరోగ్యకరమైనవి అని భావించే వేయించిన వేరుశెనగలు, మిక్సెడ్ నట్స్, పల్లి చిక్కి వంటివి వేసవిలో చాలా భారంగా అనిపిస్తాయి. ఇవి జీర్ణం కావడానికి ఎక్కువ సమయం పడుతుంది, ఫలితంగా శరీరంలో వేడి పెరుగుతుంది. వీటికి బదులుగా సబ్జా గింజల పానీయం, నానబెట్టిన బాదం పప్పులు, పచ్చి కొబ్బరి ముక్కలను తీసుకోవాలని సలోని సూచిస్తున్నారు.
ఇవి శరీరానికి చల్లదనాన్ని ఇవ్వడమే కాకుండా సులభంగా జీర్ణమవుతాయి. ఇక పానీయాల విషయానికి వస్తే, కేవలం బాటిల్ వాటర్ లేదా ప్యాక్ చేసిన జ్యూస్లు, కూల్ డ్రింక్స్పై ఆధారపడటం కంటే.. కొబ్బరి నీళ్లు, నిమ్మరసం, బెల్లం పానీయాలు (బేల్ డ్రింక్) తీసుకోవడం ఉత్తమం. ఇవి శరీరానికి అవసరమైన ఎలక్ట్రోలైట్లను అందించి హైడ్రేటెడ్ గా ఉంచుతాయి.
పండ్ల ఎంపికలో కూడా చాలా మంది పొరపాట్లు చేస్తుంటారు. మామిడి పండ్లు, సపోటా, పైనాపిల్ వంటివి తియ్యగా ఉన్నప్పటికీ, ఇవి శరీరంలో వేడిని ఉత్పత్తి చేస్తాయి. వీటికి బదులుగా పుచ్చకాయ, కర్బూజ, దానిమ్మ వంటి నీటి శాతం ఎక్కువగా ఉన్న పండ్లను ఎంచుకోవాలి. ఇవి దాహాన్ని తీర్చడమే కాకుండా తక్షణ శక్తిని అందిస్తాయి. అలాగే ఎండుద్రాక్ష, ఖర్జూరం వంటివి కూడా వేసవిలో తక్కువగా తీసుకోవాలి, వీటికి ప్రత్యామ్నాయంగా అంజీర్ లేదా తాజా సీజనల్ పండ్లను తీసుకోవడం ఎంతో మేలు చేస్తుంది.
మసాలాలు, జీవనశైలి
మన వంటల్లో వాడే మసాలా దినుసులు కూడా శరీర ఉష్ణోగ్రతపై ప్రభావం చూపుతాయి. శీతాకాలంలో మేలు చేసే వాము, మిరియాలు, లవంగాలు వేసవిలో వేడిని కలిగిస్తాయి. వీటికి బదులుగా సోంపు, జీలకర్ర, ధనియాలను వంటల్లో వాడటం వల్ల శరీరం చల్లగా ఉంటుంది. ముఖ్యంగా సోంపు నీళ్లు తాగడం వల్ల జీర్ణక్రియ మెరుగుపడుతుంది. ఆహార నియమాలతో పాటు సరైన సమయంలో భోజనం చేయడం, పగటిపూట ఎక్కువగా నీరు తాగడం అలవాటు చేసుకోవాలి.
ఈ వేసవిని సులభంగా ఎదుర్కోవడానికి ఆహారపు అలవాట్లను పూర్తిగా మార్చాల్సిన అవసరం లేదు. కేవలం కొన్ని చిన్న మార్పులు చేసుకుంటే సరిపోతుంది. ఏది తింటే మన శరీరం తేలికగా ఉంటుందో గమనించి, అటువంటి ఆహారాన్నే ఎంచుకోవాలి. ఈ చిన్నపాటి జాగ్రత్తలు మిమ్మల్ని ఎండల నుండి రక్షించడమే కాకుండా, వేసవిలో కూడా ఆరోగ్యంగా, ఉత్సాహంగా ఉండేలా చేస్తాయి. ప్రకృతి మనకు అందించే సహజ సిద్ధమైన పానీయాలు, పండ్లే వేసవి తాపానికి అసలైన విరుగుడు అని గుర్తుంచుకోండి.