విజయదశమి నాడే ఆయుధ పూజ ఎందుకు చేయాలి? వాహనాలు, పనిముట్ల పూజ ప్రాశస్త్యం ఇదే!

విజయదశమి, ఆయుధ పూజ పండుగకు హిందూ సంప్రదాయంలో విశేష ప్రాధాన్యత ఉంది. ప్రతి సంవత్సరం విజయదశమి రోజున ప్రజలు తమ వృత్తికి ఉపయోగపడే పరికరాలు, యంత్రాలు, వాహనాలు, ఆయుధాలను పూజించడం ఆనవాయితీగా వస్తోంది. దీని వెనుక అసలు కారణం ఏంటో తప్పక తెలుసుకోవాలి.

ఆయుధ పూజకు సంబంధించి రెండు ప్రధాన పురాణ గాథలు ప్రచారంలో ఉన్నాయి. మొదటిది, మహిషాసురుడనే రాక్షసుడిని వధించడానికి దుర్గాదేవి తొమ్మిది రాత్రులు దేవుళ్లతో కలిసి పోరాడింది. ఈ క్రమంలో వివిధ దేవతలు తమ శక్తివంతమైన ఆయుధాలను అమ్మవారికి బహూకరించారు. విజయదశమి రోజున మహిషాసుర సంహారం పూర్తయిన తర్వాత, ఆ ఆయుధాలను శుభ్రం చేసి పూజించినట్లు పురాణాలు చెబుతున్నాయి.

రెండవది, మహాభారతంలో పాండవులు తమ 12 సంవత్సరాల వనవాసం, ఒక సంవత్సరం అజ్ఞాతవాసం పూర్తి చేసుకున్న తర్వాత జమ్మి చెట్టు పై దాచిన తమ దివ్యాస్త్రాలను తిరిగి తీశారు. విజయదశమి రోజున ఆ ఆయుధాలకు పూజలు చేసి, విరాట రాజు గోవులను బంధించిన కౌరవులపై విజయం సాధించారు. అందువల్ల ఈ రోజున పూజలు చేస్తే ఏ పని తలపెట్టినా విజయమే సిద్ధిస్తుందని భక్తులు నమ్ముతారు.

ఇవి కూడా చదవండి

నోటి పూత ఎందుకు వస్తుంది? తగ్గించుకోవడానికి ఈ సింపుల్ చిట్కాలు

షుగర్, కొలెస్ట్రాల్ రెండింటినీ అదుపులో ఉంచుతుందా? ఉల్లిపాయ రహస్యం

బ్లాక్ కాఫీలో ఈ పొడి పావు చెంచా కలుపుకుని తాగితే చాలు.. ఆ సమస్యకు

రోజూ మోకాళ్లు, మోచేతులకు కొబ్బరినూనె రాయటం అలవాటు చేసుకోండి!

వాహనాలు, వృత్తి పరికరాల పూజ:

నేటి ఆధునిక కాలంలో ఆయుధ పూజ భావన మరింత విస్తృతమైంది. రైతులు తమ నాగలి, ట్రాక్టర్లను, యంత్రాలపై పనిచేసేవారు తమ పనిముట్లను, వ్యాపారులు తమ ఖాతా పుస్తకాలను, వాహనదారులు తమ వాహనాలను అత్యంత నియమ నిష్టలతో పూజిస్తారు. వాహనాలను శుభ్రం చేసి, పూలమాలలు వేసి, పసుపు కుంకుమలు పెట్టి దిష్టి తీస్తారు.

ఆయుధ పూజ వల్ల కలిగే ఫలితాలు:

మనం రోజువారీ జీవితంలో జీవనోపాధి కోసం ఉపయోగించే ప్రతీ వస్తువులోనూ దైవత్వాన్ని చూడటమే ఈ పూజ ముఖ్య ఉద్దేశం. కృతజ్ఞతా భావాన్ని ప్రకటిస్తూ చేసే ఈ ఆయుధ పూజ వల్ల ప్రయాణాల్లో ప్రమాదాలు నివారించబడతాయని, వృత్తి వ్యాపారాలలో ఆటంకాలు తొలగి ఐశ్వర్యం, అభివృద్ధి లభిస్తాయని విశ్వసిస్తారు.