నా సినిమా హీరోయిన్స్‌లో ఆమే అందరికంటే అందెగత్తె.. ఆమె కళ్లు అద్భుతంగా ఉంటాయి : వంశీ
దర్శకుడు వంశీ ఎన్నో అద్భుతమైన సినిమాలు చేసి ప్రేక్షకులను ఆకట్టుకున్నారు. ప్రస్తుతం సినిమాలు తగ్గించారు వంశీ. అలాగే వరుస ఇంటర్వ్యూల్లో పాల్గొంటూ ఆసక్తికర విషయాలను పంచుకుంటున్నారు. ఈ క్రమంలోనే ఓ ఇంటర్వ్యూలో ఓ హీరోయిన్ గురించి, ఆమెతో తన సినీ ప్రయాణం గురించి అనేక ఆసక్తికర విషయాలను వెల్లడించారు
దర్శకుడు వంశీ తన సుదీర్ఘ సినీ ప్రయాణంలో ఎదురైన అనుభవాలు, సినిమా నిర్మాణం, నటీనటుల ఎంపికపై పలు ఆసక్తికర విషయాలను ఇంటర్వ్యూలో వెల్లడించారు. తన సినిమాలకు ఎక్కువగా కొత్త నిర్మాతలే వచ్చేవారని, ఉదాహరణకు ‘లేడీస్ టైలర్’ సినిమాకు స్రవంతి రవికిషోర్ కొత్త ప్రొడ్యూసర్‌గా వచ్చారని ఆయన పేర్కొన్నారు. ఆల్ఫ్రెడ్ హిచ్‌కాక్ తన కథలను స్వయంగా రాయకుండా ఇతరుల నవలలను, కథలను స్వీకరించి అద్భుతంగా చిత్రీకరించేవారని, అదే తనకు స్ఫూర్తి అని వంశీ తెలిపారు. తాను కూడా సొంత కథలనే చేయాలని అనుకోనని, ‘చెట్టు కింద ప్లీడర్’ వంటి మలయాళ చిత్రాలను తెలుగు ప్రేక్షకుల అభిరుచికి తగ్గట్టుగా హ్యూమర్ జోడించి తెరకెక్కించానని వివరించారు. ‘చెట్టు కింద ప్లీడర్’ అనుకున్నంతగా ఆడలేదని, దీనికి కారణం హీరోయిన్ సరిగా వర్కౌట్ అవ్వకపోవడమేనని అన్నారు. వంశీ దర్శకత్వం వహించిన ‘శ్రీ కనకమహాలక్ష్మి రికార్డింగ్ డ్యాన్స్ ట్రూప్’ సినిమాను కేవలం 23 రోజుల్లోనే చిత్రీకరించిన అరుదైన విషయాన్ని పంచుకున్నారు. అప్పట్లో మూడు కెమెరాలు పెట్టి, రిహార్సల్ చేయించి, పాటను ఒకే టేక్‌లో చిత్రీకరించేవారని తెలిపారు.
తాను చిత్రీకరించిన కథానాయికలలో భానుప్రియ అత్యంత అందగత్తె అని వంశీ అన్నారు. భానుప్రియను కథానాయికగా ఎంపిక చేసేటప్పుడు ఆమె రంగు తక్కువగా ఉందని, హీరోయిన్‌గా సరిపోదని తన కెమెరామన్‌తో పాటు కొంతమంది వ్యతిరేకత వ్యక్తం చేశారని వంశీ గుర్తుచేసుకున్నారు. అప్పట్లో శంకరాభరణం వంటి చిత్రాలను నిర్మించిన కంపెనీ వారు ఇచ్చిన అవకాశాన్ని సద్వినియోగం చేసుకోమని, “నల్లటి మేడు గుడ్డుల దానిని పట్టుకుని విశాలనేత్రులు అంటావేంటి?” అని కూడా కొందరు అన్నారని వివరించారు. అయినప్పటికీ, వంశీ తన నిర్ణయానికి కట్టుబడి, భానుప్రియ పెద్ద పోటో ప్రింట్‌లను సెవెన్ స్టార్స్ కలర్ ల్యాబ్ నుండి తెప్పించి నిర్మాత ఇంట్లో పెట్టించారట. ఒకసారి అక్కడకు వచ్చిన కె. విశ్వనాథ్ కూడా భానుప్రియ బాగుందని చెప్పడంతో ఆమె ఎంపికకు మార్గం సుగమమైంది.
‘సితార’ తర్వాత భానుప్రియ బిజీ అయినప్పటికీ, మోడరన్ దుస్తులలో క్యారెక్టర్లు ఎవరూ ఇవ్వట్లేదని ఆమె అన్నారని, దీంతో ‘అన్వేషణ’ సినిమాలో ఆమెను మోడరన్ దుస్తులలో చూపించానని వంశీ తెలిపారు. అక్కడి నుండి చిరంజీవి, కృష్ణ, శోభన్‌బాబు వంటి హీరోల సినిమాలలో ఆమె నటించి, తన కెరీర్‌ను మలుపు తిప్పుకున్నారని అన్నారు. భానుప్రియ డాన్స్ గురించి వంశీ మాట్లాడుతూ, ఆమె డ్యాన్స్‌లో ఒక ఫోర్స్ ఉంటుందని, ఆమె సోదరి శాంతిప్రియ (నిశాంతి) డ్యాన్స్‌లో గ్రేస్ ఉంటుందని విశ్లేషించారు. రెండు షాట్లు చూపిస్తే ఈ తేడాని వివరించగలనని అన్నారు. ఒకానొక సందర్భంలో, ప్రఖ్యాత నృత్యకారిణి శోభనతో భానుప్రియ డాన్స్ గురించి ప్రస్తావించగా, శోభన కూడా భానుప్రియ డాన్స్ అద్భుతం అని ప్రశంసించారని వంశీ వెల్లడించారు. భానుప్రియ, వంశీ కాంబినేషన్‌లో రావాల్సిన ‘గాలికొండపురం రైల్వేగేట్’ అనే సినిమా ఆగిపోయిందని, ఈ సినిమాకు లతా మంగేష్కర్ మూడు పాటలు పాడారని వంశీ తెలిపారు. ఈ చిత్రంలో వెంకటేష్ హీరోగా అనుకోగా, నిర్మాత డి. రామానాయుడు కథ విని, ఇది హీరోయిన్‌కు, దర్శకుడికి పేరు తెస్తుందని, వెంకటేష్ వంటి కమర్షియల్ హీరోకి సరిపోదని చెప్పడంతో సినిమా ఆగిపోయిందని వంశీ వివరించారు.
మరిన్ని సినిమా వార్తల కోసం ఇక్కడ క్లిక్ చేయండి.