తమన్నా టాక్ షో.. ‘ఆహా’ అనిపించే రేటు..!
మిల్కీబ్యూటీ తమన్నా గురించి ఇటీవల ఓ వార్త ఫిలింనగర్‌లో తెగ చక్కర్లు కొడుతోంది. వీరు, వారు అని తేడా లేకుండా సినీ ఇండస్ట్రీలోని ప్రతి ఒక్కరితో మంచి సాన్నిహిత్యం కలిగిన తమన్నా.. ఓ టాక్ షో చేయబోతోందట.
మిల్కీబ్యూటీ తమన్నా గురించి ఇటీవల ఓ వార్త ఫిలింనగర్‌లో తెగ చక్కర్లు కొడుతోంది. వీరు, వారు అని తేడా లేకుండా సినీ ఇండస్ట్రీలోని ప్రతి ఒక్కరితో మంచి సాన్నిహిత్యం కలిగిన తమన్నా.. ఓ టాక్ షో చేయబోతోందట. ఇలాంటి షోను టాలీవుడ్‌లో ఇప్పటికే రానా, మంచు లక్ష్మీ, నిహారిక వంటి వారు చేయగా.. తాజాగా ఆ లిస్ట్‌లో తమన్నా చేరబోతుందట. అంతేకాదు ఈ షోలో ఒక్కో ఎపిసోడ్‌కి ఆమెకు బాగానే ముట్టబోతున్నట్లు తెలుస్తోంది.
అసలు విషయంలోకి వెళ్తే.. ఈ ఏడాది ప్రారంభంలో విడుదలైన ఆన్‌లైన్‌ ఫ్లాట్‌ఫాం ఆహాకు యూజర్ల నుంచి మిక్స్‌డ్ టాక్ వినిపిస్తోంది. ఈ నేపథ్యంలో తమ యూజర్లను పెంచుకునేందుకు ఆహా నిర్వాహకులు పలు ప్రణాళికలు రచిస్తున్నారట. ఈ క్రమంలో తమన్నాతో ఓ టాక్ షోను చేయించాలనుకున్నారట. దీనికి సంబంధించి ఆమెను సంప్రదించడం.. ఓకే చెప్పడం జరిగిపోయాయని తెలుస్తోంది. కాగా ఇందులో ఒక్కో ఎపిసోడ్‌కి ఆమె 8 లక్షలు డిమాండ్ చేసినట్లు సమాచారం. అయితే నిర్వాహకులు అందుకు ఒప్పుకున్నట్లు తెలుస్తోంది. ఇక ప్రస్తుతం ఈ కార్యక్రమానికి సంబంధించిన పనులను ప్రారంభించినట్లు కూడా టాక్.
కాగా ఈ షోలో మొదటి ఎపిసోడ్‌కి రామ్‌ చరణ్‌, అల్లు అర్జున్ ఇద్దరు కలిసి రానున్నట్లు తెలుస్తోంది. అలాగే టాప్‌ హీరో, హీరోయిన్లు తమన్నా టాక్ షోలో పాల్గొనబోతున్నట్లు సమాచారం. అంతేకాదు యాప్‌లో ఎపిసోడ్‌లు ప్రసారం అయిన తరువాత ఓ ప్రముఖ ఛానెల్‌లోనూ ప్రసారం చేయబోతున్నట్లు వార్తలు వినిపిస్తున్నాయి. మరి ఇందులో నిజమెంతో తెలియాలంటే కొద్ది రోజులు ఆగాల్సిందే.
