R.Madhavan: మరో వైవిధ్యమైన సినిమాతో రానున్న మాధవన్.. ఆకట్టుకుంటున్న హిసాబ్ బరాబర్ ట్రైలర్

R Madhavan

జీ5లో జ‌న‌వ‌రి 24 నుంచి తెలుగు, త‌మిళ‌, హిందీ భాష‌ల్లో ప్రీమియ‌ర్‌కు సిద్ధ‌మైందీ హిసాబ్ బరాబర్ చిత్రం. ఈ సినిమాలో మాధవన్ ప్రధాన పాత్రలో నటిస్తున్నారు. ఈ సినిమా ట్రైల‌ర్‌ను మేక‌ర్స్ విడుద‌ల చేశారు. ట్రైల‌ర్‌ను గ‌మ‌నిస్తే.. ఓ బ్యాంక్ చేసే చిన్న పొర‌పాటు ఓ వ్య‌క్తి జీవితాన్ని త‌ల‌క్రిందులు చేస్తే ..అత‌నెలా స్పందించాడు. న్యాయం కోసం అత‌ను ఎలాంటి పోరాటం చేశాడ‌నే క‌థాంశంతో ఈ సినిమా తెర‌కెక్కింది. ఆర్థిక‌ప‌ర‌మైన మోసం, అవినీతి, న్యాయం కోసం చేసే పోరాటం ఇవ‌న్నీక‌థ‌లో భాగంగా మిళిత‌మై ఎంతో ఆస‌క్తిని క‌లిగిస్తున్నాయి. విల‌క్ష‌ణ న‌టుడు ఆర్‌.మాధ‌వ‌న్, నీల్ నితిన్‌,కీర్తి కుల్హారి త‌దిత‌రులు వారి న‌ట‌న‌తో పాత్ర‌ల‌కు ప్రాణం పోశారు. ప్రేక్ష‌కులు మెచ్చేలా చ‌క్క‌టి డ్రామా, కామెడీ, సామాజిక అంశాల‌తో.. అశ్విన్ ధీర్ ద‌ర్శ‌క‌త్వంలో జియో స్టూడియోస్, ఎస్‎పి సినీకార్ప్ ఈ చిత్రాన్ని నిర్మించాయి.

రైల్వే డిపార్ట్‌మెంట్‌లో చిరు ఉద్యోగి అయిన రాధే మోహ‌న్ శ‌ర్మ పాత్ర‌లో మాధ‌వ‌న్ మ‌న‌కు ఇందులో క‌నిపిస్తారు. ఆయ‌న ఓసారి త‌న బ్యాంక్ ఖాతాలో చిన్న తేడాని గుర్తించి బ్యాంకు అధికారుల‌ను ప్ర‌శ్నిస్తాడు. దాని గురించి ఆరా తీయ‌గా అదొక పెద్ద ఆర్థిక‌మైన మోస‌మ‌ని తెలుస్తుంది. దాని చుట్టు ఉన్న మోసం, అవినీతి వంటి వాటిని స‌ద‌రు టికెట్ క‌లెక్ట‌ర్ గుర్తిస్తాడు. ఈ క్ర‌మంలో త‌ను ఆ బ్యాంక్ హెడ్ మిక్కీ మెహ‌తా (నీల్ నితిన్‌) వంటి పెద్ద వ్య‌క్తితో పోరాటం చేయాల్సి వ‌స్తుంది. ఊహించ‌ని మ‌లుపుల‌తో సాగే ఈ క‌థ‌లో రాధే మోహ‌న్ అనే సామాన్యుడు అవినీతితో వ్య‌వ‌స్థీకృత‌మైన స‌మ‌స్య నుంచి ఎలా ఎదుర్కొంటాడు.. దాన్నుంచి సుర‌క్షితంగా ఎలా బ‌య‌ట ప‌డ‌తాడు? అనే విష‌యాలు అంద‌రినీ ఆలోచింప చేస్తాయి.

ఆర్‌.మాధ‌వ‌న్ మాట్లాడుతూ ‘‘జీ5తో నేను చేసిన తొలి సినిమా ఇది. ఇలాంటి ఓ సినిమాలో భాగం కావ‌టం అనేది యాక్ట‌ర్‌గా నాకెంతో సంతోషంగా ఉంది. సామాన్యుడైన రాధే మోహ‌న్ శ‌ర్మ పాత్ర‌లో న‌టించ‌టాన్ని ఎంజాయ్ చేశాను. ఈ పాత్ర నాకు ఛాలెంజింగ్‌గా అనిపించింది. మ‌నలో ఉండే కామ‌న్ మ్యాన్ అవినీతికి వ్య‌తిరేకంగా ఎలా పోరాటం చేశాడ‌నేదే క‌థ‌. అంద‌రికీ మూవీ న‌చ్చుతుంది. ఇలాంటి వాస్త‌వ క‌థ‌నాల‌తో సినిమాలు మ‌రిన్ని రావాల‌ని కోరుకుంటున్నాను’’ అని మాధవన్ అన్నారు.

మరిన్ని సినిమా వార్తలకోసం ఇక్కడ క్లిక్ చేయండి