Tollywood : కమెడియన్‌గా, విలన్‌గా రఫ్పాడించిన నటుడు.. ఇండస్ట్రీలోనే తిరుగులేని యాక్టర్.. ఆ ఒక్క విషయాన్ని పట్టించుకుని ఉంటే..
తెలుగు సినిమా స్వర్ణయుగంలో హాస్యనటుడిగా, బహుముఖ ప్రజ్ఞాశాలిగా రమణారెడ్డి అద్వితీయమైన స్థానాన్ని పొందారు. తన బాడీ లాంగ్వేజ్, నెల్లూరి యాసతో ప్రేక్షకులను కడుపుబ్బా నవ్వించిన ఆయన, కామెడీ విలన్‌గా కూడా మెప్పించారు. గుండమ్మ కథ, మాయాబజార్ వంటి చిత్రాలలో ఆయన పాత్రలు చిరస్థాయిగా నిలిచిపోయాయి. నటనతో పాటు సేవా కార్యక్రమాల్లోనూ ముందుండేవారు.
తెలుగు సినిమా స్వర్ణయుగాన్ని గుర్తుచేసుకున్నప్పుడు హీరోలు, హీరోయిన్లు, దర్శకులతో పాటు ఆ కాలాన్ని నవ్వులతో నింపిన హాస్యనటులను తలుచుకోవడం అనివార్యం. రేలంగి, రమణారెడ్డి, అల్లు రామలింగయ్య వంటి దిగ్గజాలలో రమణారెడ్డి ప్రత్యేకత వేరు. తన బాడీ లాంగ్వేజ్‌ను ఆయుధంగా మలచుకున్న ఆయన, యాస, డైలాగ్ చెప్పే పద్ధతి, కళ్ళతో ఇచ్చే ఎక్స్‌ప్రెషన్స్‌తో ప్రేక్షకులను మంత్రముగ్ధులను చేశారు. ఆయన పాత్రకు పూర్తిగా కట్టుబడి, కామెడీని అందులోనే వెతికేవారు. డైలాగ్ చెప్పకుండానే ముఖంలో కనిపించే భయం, అనుమానం, ఆశ్చర్యం, అమాయకత్వం ప్రేక్షకులను విపరీతంగా నవ్వించేవి. తిక్కవరపు రమణారెడ్డి 1921 అక్టోబర్ 1న నెల్లూరులోని జగదేవిపేటలో జన్మించారు. ఇంటర్ వరకు చదువుకున్నారు. పదిమందిని పోగేసి కబుర్లు చెప్పి నవ్వించడం ఆయనకు భలే సరదా. శానిటరీ ఇన్‌స్పెక్టర్‌గా పనిచేస్తూనే నాటకాలు వేసేవారు. లవకుశ చిత్రం తీసిన అల్లారెడ్డి శంకర రెడ్డి 1952లో మానవతి చిత్రంతో రమణారెడ్డిని వెండితెరకు పరిచయం చేశారు. ఆ తర్వాత బంగారుపాప చిత్రంతో గుర్తింపు పొంది, రోజులు మారాయి చిత్రంలో హాస్యానికి విలనీని జోడించి జనానికి దగ్గరయ్యారు. తన నెల్లూరి యాసలోనే డైలాగులు చెబుతూ ప్రేక్షకులను అలరించారు. గుండమ్మ కథలో గంటన్న, మాయాబజార్లోని చిన్నమయ్య వంటి పాత్రలలో రమణారెడ్డిని తప్ప మరొక నటుడిని ఊహించడం కష్టం.
రేలంగి వయసులో రమణారెడ్డి కంటే పెద్దవారైనా, రేలంగికి తండ్రిగాను, మామగాను రమణారెడ్డి నటించడం ఆయన నటనకు నిదర్శనం. సూర్యకాంతంతో ఆయన కాంబినేషన్ నవ్వులు పూయించింది. చిత్ర పరిశ్రమలో అందరూ ఆయన్ను ఆప్యాయంగా రమణయ్య అని పిలిచేవారు. అజాత శత్రువుగా ఆయనకు పేరుండేది. తెరపై ఎంతగా నవ్వించినా, బయట చాలా సీరియస్‌గా ఉండేవారు. సినిమా రాజకీయాలకు దూరంగా, నిరాడంబర జీవితం గడిపారు. 1957లో వచ్చిన అక్కాచెల్లెళ్లు సినిమాలో మెజీషియన్ వేషం కోసం మ్యాజిక్ నేర్చుకున్నారు రమణారెడ్డి. అప్పటి నుండి మ్యాజిక్ ఆయన జీవితంలో ఒక భాగమైంది. సినిమాల ద్వారా సంపాదించిన డబ్బును తన కుటుంబం కోసం ఖర్చు పెట్టేవారు. అయితే, మ్యాజిక్ ప్రదర్శనల ద్వారా వచ్చిన డబ్బుని మాత్రం సేవా కార్యక్రమాల కోసం ఇచ్చేవారు. 1957లో నెల్లూరు టౌన్ హాల్‌లో తొలి మ్యాజిక్ ప్రదర్శన ఇచ్చారు.
రమణారెడ్డి కేవలం హాస్య పాత్రలకే పరిమితం కాలేదు. పైకి మెత్తగా కనిపిస్తూ దుర్మార్గాలు చేసే సాఫ్ట్ విలన్ పాత్రలకు ఆయనే ఆద్యులు. కమెడియన్‌గా, కామెడీ విలన్‌గా మెప్పించారు. ముఖ్యంగా 1960వ దశాబ్దం తెలుగు సినిమాలలో రమణారెడ్డిది అని చెప్పడంలో అతిశయోక్తి లేదు. ఒకేసారి ఐదారు చిత్రాల్లో నటించడం, రోజుకి రెండు మూడు షిఫ్టుల్లో పని చేయడం ఆయన కెరీర్‌లో సాధారణం. పార్వతీ కళ్యాణం సినిమాలో నారదుడిగా నటించినప్పుడు, సాధారణ నారదుడి గెటప్‌కు భిన్నంగా, తన పర్సనాలిటీ దృష్ట్యా లాల్చీ వేసుకొని నటించిన ఏకైక నటుడు రమణారెడ్డి. రమణారెడ్డి స్వయంగా సినిమా నిర్మించకపోయినా, 1959లో హైదరాబాద్‌లో తయారైన తొలి చిత్రం మా ఇంటి మహాలక్ష్మి నిర్మాణంలో భాగస్వామి అయ్యారు. క్రౌడ్ ఫండింగ్‌తో తయారైన ఈ సినిమా కోసం ఆయన రూ. 5000 ఇచ్చి తనవంతు తోడ్పాటు అందించారు. జానపద బ్రహ్మ విఠలాచార్య తీసిన వద్దంటే పెళ్లి (1957), నిన్నే పెళ్లాడతా చిత్రాలలో ఒకే తరహా పాత్రను పోషించడం ఆయన కెరీర్‌లో ఒక ప్రత్యేక అంశం.
ఆయన ఆరోగ్యం మొదటి నుంచి అంతంత మాత్రమే. అల్సర్లు ఉన్నా పెద్దగా పట్టించుకునేవారు కాదు. 1968లో ఆపరేషన్ చేయించుకున్న తర్వాత పాత్రలు తగ్గాయి. 1974లో అల్సర్ మళ్ళీ తిరగబెట్టింది. ఆపరేషన్ చేసినా నాలుగు నెలల తర్వాత, నవంబర్ 11న రమణారెడ్డి కన్నుమూశారు. పారిశ్రామికవేత్త, నిర్మాత టి. సుబ్బరామిరెడ్డి తండ్రి, రమణారెడ్డి అన్నదమ్ములు. దర్శకుడు ఎం.ఎస్. కోటారెడ్డి కూడా ఆయనకు దగ్గర బంధువు. ఆయనకు ఇద్దరు కొడుకులు, ముగ్గురు కూతుళ్లు. రమణారెడ్డి సతీమణి సుదర్శనమ్మ 93వ ఏట 2018 అక్టోబర్‌లో మరణించారు.
ఎక్కువమంది చదివినవి : Bigg Boss 10 Telugu : షాలిని సేఫ్.. సృష్టి ఎలిమినేషన్.. స్టార్ ప్లేయర్‌గా ఝాన్సీ.. అన్న కోసం చెల్లెలి ఆర్డర్..
ఎక్కువమంది చదివినవి : మాయాబజార్ సినిమాలో వాడని పాట.. మనవరాలితో కలిసి అద్భుతంగా పాడిన సింగీతం శ్రీనివాసరావు.. వీడియో ఇదిగో..