Jailer 2 : ఏందీ మావ ఇది.. నిమిషానికి రూ.5 కోట్లా.. ? జైలర్ 2 సినిమాకు హృతిక్ తీసుకున్న రెమ్యునరేషన్ తెలిస్తే..
సూపర్‌స్టార్ రజనీకాంత్ నటిస్తున్న 'జైలర్ 2' చిత్రంలో బాలీవుడ్ హీరో హృతిక్ రోషన్ ఐదు నిమిషాల అతిథి పాత్రలో మెరిశారు. కేవలం రెండు రోజుల షూటింగ్ కోసం ఆయన దిమ్మతిరిగే పారితోషికం అందుకున్నట్లు వార్తలు వస్తుండటంతో, ఈ కాంబినేషన్ , హృతిక్ రెమ్యునరేషన్ ప్రస్తుతం సినీ వర్గాల్లో సంచలనంగా మారాయి.
సూపర్‌స్టార్ రజనీకాంత్ హీరోగా, టాలెంటెడ్ డైరెక్టర్ నెల్సన్ దిలీప్‌కుమార్ దర్శకత్వంలో సన్ పిక్చర్స్ నిర్మించిన మోస్ట్ అవేటెడ్ యాక్షన్ ఎంటర్‌టైనర్ ‘జైలర్ 2’ థియేటర్లలో కలెక్షన్ల సునామీ సృష్టిస్తోంది. భారీ అంచనాల మధ్య ప్రేక్షకుల ముందుకు వచ్చిన ఈ చిత్రం తొలి రోజే ప్రపంచవ్యాప్తంగా సుమారు రూ. 125 కోట్ల గ్రాస్ వసూలు చేసి ట్రేడ్ వర్గాలను విస్మయానికి గురిచేసింది. అయితే సినిమాలో రజనీకాంత్ మేనియా ఒక ఎత్తైతే, ఈ చిత్రంలో బాలీవుడ్ గ్రీక్ గాడ్ హృతిక్ రోషన్ చేసిన సంచలన అతిథి పాత్ర ఇప్పుడు ఇండియన్ ఫిల్మ్ ఇండస్ట్రీలో హాట్ టాపిక్‌గా మారింది. సినిమా ప్రీ-క్లైమాక్స్ సన్నివేశంలో హృతిక్ రోషన్ ‘రాడీ’ అనే పవర్‌ఫుల్ పాత్రలో అరుదైన మాస్ ఎంట్రీ ఇస్తారు. రజనీకాంత్ పోషించిన ‘టైగర్’ ముత్తువేల్ పాండియన్ కుటుంబం క్లిష్ట పరిస్థితిలో చిక్కుకున్నప్పుడు, గతంలో తనకు చేసిన మేలును గుర్తుంచుకుని వారిని కాపాడటానికి రాడీ రంగంలోకి దిగుతాడు.
గోడలను బద్దలు కొట్టుకుంటూ కారులో దూసుకొచ్చే విజువల్స్, రజనీ ట్రేడ్‌మార్క్ స్టైల్‌లో సన్‌గ్లాసెస్ ఫ్లిప్ చేసే సీన్ థియేటర్లలో ప్రేక్షకులకు పూనకాలు తెప్పిస్తున్నాయి. దాదాపు 40 ఏళ్ల క్రితం ‘భగవాన్ దాదా’ చిత్రంలో బాలనటుడిగా రజనీతో స్క్రీన్ పంచుకున్న హృతిక్, సరిగ్గా ఇన్ని సంవత్సరాల తర్వాత మళ్లీ ఆయనతో కలిసి నటించడం ఈ చిత్రానికి ప్రధాన హైలైట్‌గా నిలిచింది.
ఈ చిత్రంలో హృతిక్ రోషన్ స్క్రీన్‌పై కనిపించేది కేవలం 5 నిమిషాలే. రజనీకాంత్‌తో కలిసి ఆయన పాల్గొన్న షూటింగ్ కూడా కేవలం రెండు రోజుల్లోనే పూర్తయింది. అయితే ఈ కొద్ది నిమిషాల అతిథి పాత్ర కోసం హృతిక్ అందుకున్న రెమ్యునరేషన్ అందరినీ షాక్‌కు గురిచేస్తోంది. కేవలం 5 నిమిషాల నిడివి గల ఈ రోల్ కోసం ఆయన అక్షరాలా రూ. 25 కోట్లు పారితోషికంగా తీసుకున్నట్లు సమాచారం. అంటే నిమిషానికి దాదాపు రూ. 5 కోట్లు అన్నమాట! భారతీయ చలనచిత్ర చరిత్రలో అత్యంత తక్కువ స్క్రీన్ టైమ్‌కు ఈ స్థాయిలో భారీ పారితోషికం అందుకోవడం ఇదే మొదటిసారి కావడంతో, ఈ వార్త ప్రస్తుతం సోషల్ మీడియాలో విపరీతంగా వైరల్ అవుతోంది. ఈ మాస్ కాంబినేషన్ నార్త్ మార్కెట్‌లోనూ సినిమా కలెక్షన్లను విపరీతంగా పెంచుతోంది.