Kangana Ranaut: ‘రేప్‌లు, మర్డర్లు జరిగినా పర్వాలేదా?’ చెంప దెబ్బ కొట్టిన కానిస్టేబుల్‌ను సమర్థించడంపై కంగనా
ప్రముఖ బాలీవుడ్ నటి, ఎంపీ కంగనా రనౌత్‌కు ఇటీవల ఒక చేదు అనుభవం ఎదురైంది. చండీగఢ్ విమానాశ్రయంలో సెంట్రల్ ఇండస్ట్రియల్ సెక్యూరిటీ ఫోర్స్‌కు చెందిన కుల్విందర్ కౌర్ అనే మహిళా ఉద్యోగి కంగనా రనౌత్‌ను చెంపదెబ్బ కొట్టింది. ఈ సంఘటన తీవ్ర కలకలం రేపింది
ప్రముఖ బాలీవుడ్ నటి, ఎంపీ కంగనా రనౌత్‌కు ఇటీవల ఒక చేదు అనుభవం ఎదురైంది. చండీగఢ్ విమానాశ్రయంలో సెంట్రల్ ఇండస్ట్రియల్ సెక్యూరిటీ ఫోర్స్‌కు చెందిన కుల్విందర్ కౌర్ అనే మహిళా ఉద్యోగి కంగనా రనౌత్‌ను చెంపదెబ్బ కొట్టింది. ఈ సంఘటన తీవ్ర కలకలం రేపింది. దీనిపై స్పందించిన సీఐఎస్ఎఫ్ కుల్విందర్ కౌర్ పై సస్పెన్షన్ వేటు వేసింది. దీనిపై పోలీస్ కేసు కూడా నమోదైంది. విచారణ జరుగుతోంది. ఇది కాకుండా ఈ ఘటనలో కుల్విందర్ కౌర్ తీరును పలువురు ఖండించారు. ఆమె ఇలా చేయి చేసుకోవాల్సింది కాదంటూ సూచించారు. అదే సమయంలో మరికొందరు కుల్విందర్ కౌర్ మద్దతుగా నిలిచారు. తాజాగా ఈ ఘటనపై మరోసారి కంగనా రనౌత్ స్పందించింది. ‘ఇక అత్యాచారాలు, హత్యలు జరిగినా మీకేం ఫర్వాలేదా?’ అంటూ ట్విట్టర్ వేదికగా సీఐఎస్ఎఫ్ మహిళా కానిస్టేబుల్‌కు మద్దతిచ్చిన వారికి స్ట్రాంగ్ కౌంటర్ ఇచ్చింది.
‘అత్యాచారానికి పాల్పడినవాడు.. హంతకుడు.. దొంగ.. ఇలా నేరం చేసినవారు ఎవరైనా భావోద్వేగ, మానసిక, ఆర్థికపరమైన కారణాలు చెబుతుంటారు. కారణం లేకుండా ఏ నేరం జరగదు. అయినా సరే చేసిన నేరానికి వారిని దోషిగా తేల్చి శిక్ష విధిస్తారు. అలా కాదని చట్టాన్ని ఉల్లంఘించి నేరాలకు పాల్పడిన క్రిమినల్స్‌ ఎమోషన్స్ కు విలువిస్తే.. అనుమతి లేకుండా ఓ వ్యక్తి శరీరాన్ని తాకడం, వారిపై దాడి చేయడం వంటి ఘటనలను మీరు సమర్థిస్తే.. అత్యాచారాలు, హత్యల వంటివి జరిగినా మీకేం ఫర్వాలేదనే అర్థం. మీ మానసిక ఆరోగ్యంపై శ్రద్ధ వహించాలి. దయచేసి మీరు ధ్యానం, యోగా చేయండి. లేకపోతే జీవితం చేదుగా, భారంగా మారుతుంది. ఇంత చెత్త, ద్వేషం, అసూయలు మోయకండి. వాటి నుంచి త్వరగా విముక్తి పొందండి’ అని కంగనా రనౌత్ ట్విట్టర్‌లో సుదీర్ఘమైన పోస్ట్ షేర్ చేసింది.
Every rapist, murderer or thief always have a strong emotional, physical, psychological or financial reason to commit a crime, no crime ever happens without a reason, yet they are convicted and sentenced to jail. If you are aligned with the criminals strong emotional impulse to…
— Kangana Ranaut (Modi Ka Parivar) (@KanganaTeam) June 8, 2024
ప్రస్తుతం కంగనా రనౌత్ పోస్ట్ సామాజిక మాధ్యమాల్లో వైరల్ గా మారింది. కంగనా రనౌత్‌పై దాడి చేసిన కుల్విందర్ కౌర్ తరపున గాయకుడు విశాల్ దద్లానీ సోషల్ మీడియాలో పోస్ట్ చేశారు. సెంట్రల్ ఇండస్ట్రియల్ సెక్యూరిటీ ఫోర్స్ కుల్విందర్‌ను తొలగిస్తే, ఆమె కోసం మంచి ఉద్యోగం ఇప్పిస్తానని విశాల్ చెప్పాడు. అలాంటి వారి కోసమే కంగనా రనౌత్ ఈ పోస్ట్ చేసింది. అయితే ఎక్కడా నేరుగా పేరు ప్రస్తావించలేదు.
మరిన్ని సినిమా వార్తల కోసం ఇక్కడ క్లిక్ చేయండి.
