అక్కడ మాత్రమే గాలిలో కరోనా వైరస్ వ్యాప్తి: డబ్ల్యూహెచ్‌ఓ స్పష్టత
కరోనా వైరస్ గాలి ద్వారా వ్యాపిస్తోందని.. దీన్ని పరిగణలోకి తీసుకొని మార్గదర్శకాలను సవరించాలని ఇటీవల దాదాపు 200 మందికి పైగా శాస్త్రవేత్తలు ప్రపంచ ఆరోగ్య సంస్థకు లేఖ రాసిన విషయం తెలిసిందే.
కరోనా వైరస్ గాలి ద్వారా వ్యాపిస్తోందని.. దీన్ని పరిగణలోకి తీసుకొని మార్గదర్శకాలను సవరించాలని ఇటీవల దాదాపు 200 మందికి పైగా శాస్త్రవేత్తలు ప్రపంచ ఆరోగ్య సంస్థకు లేఖ రాసిన విషయం తెలిసిందే. ఈ విషయాన్ని పరిగణలోకి తీసుకున్న డబ్ల్యూహెచ్‌ఓ పరిశీలన తరువాత గాలి ద్వారా వైరస్ వ్యాపించే అవకాశం ఉందని అంగీకరించింది. అయితే కొన్ని పరిస్థితుల్లో మాత్రమే ఇలా వ్యాపిస్తుందని స్పష్టం చేసింది. రద్దీ ఎక్కువగా ఉండే ఇండోర్ ప్రదేశాలు, ఎక్కువ వెంటిలేషన్ లేని ప్రదేశాల్లో వైరస్ సోకిన వ్యక్తుల నుంచి ఎక్కువ మందికి వ్యాపించే అవకాశం ఉందని ప్రపంచ ఆరోగ్య సంస్థ తెలిపింది. వీటితో పాటు వైరస్ సోకిన వ్యక్తులు తిరిగిన ఇండోర్ ప్రదేశాల్లోనూ గాలి ద్వారా వైరస్ వ్యాప్తి చెందే అవకాశాలు ఎక్కువగా ఉన్నాయని తెలిపింది.
కాగా వైరస్ సోకిన వ్యక్తులు మాట్లాడినప్పుడు లేదా దగ్గినప్పుడు తుంపరులు గాలిలో ఉండిపోతాయని.. ఇలా మరొకరికి కరోనా వ్యాపించే అవకాశాలు ఉన్నాయని శాస్త్రవేత్తలు వాదించారు. అయితే ఈ వాదనను డబ్య్లూహెచ్‌ఓ గత కొన్ని రోజులుగా తోసిపుచ్చుతూ వచ్చింది. కేవలం అత్యవసర పరిస్థితుల్లో రోగులను వెంటిలేషన్‌పై ఉంచిన సందర్భాల్లోనే వైరస్ అలా వ్యాపిస్తోందని చెబుతూ వచ్చింది. తాజాగా దాన్ని మరోసారి పునః పరిశీలించిన ప్రపంచ ఆరోగ్య సంస్థ.. రద్దీ ఎక్కువగా ఉన్న ప్రదేశాల్లో గాలి ద్వారా కరోనా వ్యాపించే అవకాశాన్ని కొట్టిపారేయలేమని వివరించింది. ఇక అసింప్టమాటిక్‌ వ్యక్తులతో వైరస్ వ్యాప్తి చాలా అరుదు అని డబ్ల్యూహెచ్‌ఓ మరోసారి స్పష్టం చేసింది.