Success Story: పేదరికాన్ని జయించి.. ఒకరికొకరు అండగా నిలిచి.. ఐదుగురు స్నేహితులకు పోలీసు ఉద్యోగాలు
యూపీలోని బస్తీ జిల్లా నందేకువాన్‌ గ్రామానికి చెందిన ఐదుగురు చిన్ననాటి స్నేహితులు పోలీస్‌ కానిస్టేబుళ్లుగా ఎంపికయ్యారు. ఆర్థిక ఇబ్బందులను అధిగమిస్తూ, ఒకరికొకరు సహకరించుకుంటూ లక్ష్యాన్ని సాధించారు. ఉద్యోగం చేస్తూనే చదువుకున్న వీరి విజయం ప్రభుత్వ ఉద్యోగాల కోసం సిద్ధమవుతున్న యువతకు స్ఫూర్తిదాయకం..
లక్నో, అక్టోబర్ 17: స్నేహం, పట్టుదల, కష్టపడి చదివే తత్వం ఉంటే లక్ష్యాన్ని సాధించవచ్చని ఉత్తరప్రదేశ్‌కు చెందిన ఐదుగురు యువకులు నిరూపించారు. చిన్నప్పటి నుంచి స్నేహితులుగా ఉన్న ఐదుగురు ఒకే గ్రామం నుంచి ఉత్తరప్రదేశ్‌ పోలీస్‌ కానిస్టేబుళ్లుగా ఎంపికయ్యారు. ఆర్థిక ఇబ్బందులు ఎదురైనా, ఒకరికొకరు అండగా నిలుస్తూ లక్ష్యం దిశగా సాగిన వీరి ప్రయాణం గ్రామస్థుల్లో ఆనందాన్ని నింపింది. ఉత్తరప్రదేశ్‌లోని బస్తీ జిల్లా, దుబౌలియా బ్లాక్‌ పరిధిలోని నందేకువాన్‌ గ్రామానికి చెందిన అంకేశ్‌ సత్యం దూబే, ఆదర్శ్‌ ద్వివేది, దీపక్‌ దూబే, ఆదిత్యనాథ్‌ దూబే, రోహిత్‌ ప్రజాపతి పోలీస్‌ కానిస్టేబుళ్లుగా ఎంపికయ్యారు. వీరి విజయంతో కుటుంబ సభ్యులు, గ్రామస్థులు గర్వంగా భావిస్తున్నారు.
ఐదుగురు స్నేహితులు వేర్వేరు పాఠశాలల్లో ఇంటర్మీడియట్‌ విద్యను పూర్తి చేశారు. ఆ తర్వాత ప్రభుత్వ ఉద్యోగం సాధించి ప్రజాసేవలోకి రావాలని నిర్ణయించుకున్నారు. అయితే, పోటీ పరీక్షలకు సిద్ధమయ్యే క్రమంలో ఆర్థిక సమస్యలు వారికి సవాలుగా మారాయి. అయినప్పటికీ అంకేశ్‌ సత్యం దూబే, ఆదర్శ్‌ ద్వివేది తమ చదువు ఖర్చుల కోసం ఉపాధి మార్గాలను ఎంచుకున్నారు. అంకేశ్‌ తన గ్రామానికి సమీపంలోని ఓ ప్రైవేట్‌ పాఠశాలలో ఉపాధ్యాయుడిగా పనిచేశాడు. ఆదర్శ్‌ ఇంటి వద్దే ఉంటూ సాయంత్రం వేళల్లో చిన్న పిల్లలకు పాఠాలు చెప్పేవాడు. ఇలా వచ్చిన ఆదాయంతో తమ పరీక్షల సన్నద్ధతకు అయ్యే ఖర్చులను భరించారు. మిగతా ముగ్గురు స్నేహితులు కూడా తమకు ఎదురైన ఇబ్బందులను అధిగమిస్తూ పోటీ పరీక్షలకు సిద్ధమయ్యారు.
ఈ ఐదుగురి విజయానికి వారి స్నేహం కూడా కీలకంగా నిలిచింది. ప్రతిరోజూ సాయంత్రం కలుసుకుని మొబైల్‌ ఫోన్ల సాయంతో ముఖ్యమైన అంశాలను చదివేవారు. ఒకరితో మరొకరు చర్చిస్తూ, తమకు బలహీనంగా ఉన్న అంశాలను గుర్తించి మెరుగుపరుచుకునేవారు. నిరుత్సాహం ఎదురైనప్పుడు ఒకరికొకరు ధైర్యం చెబుతూ లక్ష్యంపై దృష్టి సారించేవారు. ఒంటరిగా చదువుకోవడం కంటే కలిసి చదువుతూ తమ జ్ఞానాన్ని పెంచుకున్నారు. ఆర్థిక ఇబ్బందులు, ఇతర సమస్యలు ఎదురైనా చదువులో క్రమశిక్షణను కొనసాగించారు. ఈ పరస్పర సహకారం వారి సన్నద్ధతకు తోడ్పడింది. ఈ ఐదుగురు స్నేహితులు గతంలోనూ పలు పోటీ పరీక్షల్లో విజయం సాధించారు. ఆదర్శ్‌ ద్వివేది గతంలో రెవెన్యూ లేఖ్‌పాల్‌ ఉద్యోగానికి ఎంపికయ్యాడు. ఆదిత్యనాథ్‌ దూబే ఎస్‌ఎస్‌సీ జనరల్‌ డ్యూటీ (జీడీ) పరీక్షలో ఉత్తీర్ణత సాధించాడు. వీరిలో కొందరు గత నియామక ప్రక్రియల్లో ఢిల్లీ పోలీస్‌కు కూడా ఎంపికయ్యారు. తాజాగా ఉత్తరప్రదేశ్‌ పోలీస్‌ కానిస్టేబుళ్లుగా ఎంపిక కావడంతో వారి ప్రభుత్వ ఉద్యోగ ప్రయాణంలో మరో ముఖ్యమైన మైలురాయిని చేరుకున్నారు.
తల్లిదండ్రుల ఆశీర్వాదమే బలమంటూ..
తమ విజయానికి తల్లిదండ్రుల ఆశీర్వాదాలు, వారు నేర్పిన విలువలే కారణమని ఈ యువకులు పేర్కొన్నారు. తమకు అండగా నిలిచిన కుటుంబ సభ్యుల సహకారాన్ని గుర్తుచేసుకున్నారు. ఐదుగురు స్నేహితులు ఒకేసారి పోలీస్‌ ఉద్యోగాలకు ఎంపిక కావడంతో నందేకువాన్‌ గ్రామంలో సంతోషం నెలకొంది. ప్రభుత్వ ఉద్యోగాల కోసం సిద్ధమవుతున్న ఇతర యువతకు వీరి ప్రయాణం స్ఫూర్తిదాయకం. ఆర్థిక ఇబ్బందులు ఎదురైనా పట్టుదలతో చదువుతూ, స్నేహితుల సహకారం తీసుకుంటూ, నిరంతర సాధన కొనసాగిస్తే లక్ష్యానికి చేరువ కావచ్చని ఈ ఐదుగురు నిరూపించారు.